ການປັບປຸງ ແລະ ສ້ອມແປງທາງຫຼວງແຫ່ງຊາດ ເລກທີ 13 ໃຕ້ ໄລຍະທາງຜ່ານແຂວງບໍລິຄໍາໄຊ ມີຄວາມຄືບໜ້າຢ່າງຕໍ່ເນື່ອງ, ໃນນີ້ ສະເພາະການກໍ່ສ້າງໃນສັນຍາທີ 1 ແມ່ນຈະສໍາເລັດສົມບູນພາຍໃນເດືອນກໍລະກົດ 2023 ນີ້.
ທ່ານ ສີສົມພັນ ພິມສີປະສົມ, ຫົວໜ້າໂຄງການປັບປຸງ ແລະ ສ້ອມແປງທາງ 13 ໃຕ້ ໄລຍະທາງຜ່ານແຂວງບໍລິຄໍາໄຊ ໃຫ້ສໍາພາດຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍສຽງແຫ່ງຊາດລາວ ໃນວັນທີ 17 ກໍລະກົດ 2023 ວ່າ: ໂຄງການດັ່ງກ່າວນີ້, ແບ່ງອອກເປັນ 2 ສັນຍາ ຄື:
ສັນຍາ 1 ມີຄວາມຍາວ 40 ກິໂລແມັດ (ແຕ່ກິໂລແມັດ 71 ຫາ ກິໂລແມັດ 111), ນໍາໃຊ້ທຶນກູ້ຢືມຈາກທະນາຄານໂລກ ມູນຄ່າ 17,5 ລ້ານກວ່າໂດລາສະຫະລັດ ເພື່ອປັບປຸງຍົກລະດັບຈຸດນ້ຳຖ້ວມ ແລະ ຂະຫຍາຍໜ້າທາງເກົ່າ ຈາກ 9 ແມັດ ເປັນ 12 ແມັດ, ມີ 2 ຊ່ອງທາງຈາລະຈອນ (2X3,5 ແມັດ) ແລະ ບ່າທາງເບື້ອງລະ 2,5 ແມັດ ພ້ອມທັງກໍ່ສ້າງຂົວໃໝ່ 2 ແຫ່ງ ແທນໃສ່ຈຸດເກົ່າ, ລວງຍາວແຫ່ງລະປະມານ 25 ແມັດ ແລະ ກ້ວາງ 12 ແມັດ, ໂຄງສ້າງທາງແມ່ນອອກແບບເປັນໜ້າທາງແບບປູຢາງຂົ້ວ (ເບຕົງອັສ ຟານ). ເລີ່ມຈັດຕັ້ງປະຕິບັດແຕ່ວັນທີ 1 ເມສາ 2021 ມາຮອດປັດຈຸບັນສໍາເລັດ 97% ແລະ ຈະໃຫ້ສໍາເລັດພາຍໃນເດືອນກໍລະກົດ 2023.
ສ່ວນສັນຍາທີ 2 ມີຄວາມຍາວ 79 ກິໂລແມັດ (ແຕ່ກິໂລແມັດ 111 ຫາ ກິໂລແມັດ 190) ໃນນີ້, ແຕ່ກິໂລແມັດ 111 ຫາ ກິໂລແມັດ 151, ຄວາມກ້ວາງໜ້າທາງ 12 ແມັດ ແລະ ກິໂລແມັດ 151 ຫາ 190 ຄວາມກ້ວາງໜ້າທາງ 9 ແມັດ, ນໍາໃຊ້ເງິນກູ້ຢືມຈາກທະນາຄານ ການລົງທຶນຂອງເອີຣົບ (EIB) ມູນຄ່າ 28 ລ້ານກວ່າໂດລາສະຫະລັດ.
ທ່ານໃຫ້ຮູ້ຕື່ມວ່າ: ສໍາລັບຄວາມຫຍຸ້ງຍາກໃນການຈັດຕັ້ງປະຕິບັດທັງສອງສັນຍາ ແມ່ນຄ້າຍຄືກັນ ເພາະໄລຍະຈັດຕັ້ງປະຕິບັດໂຄງການມີການລະບາດຂອງພະຍາດໂຄວິດ-19 ເຮັດໃຫ້ມີບັນຫາໃນການນໍາເຂົ້າກົນຈັກ ແລະ ແຮງງານຂອງບໍລິສັດທີ່ຮັບເໝົາກໍ່ສ້າງ. ນອກຈາກນີ້, ຍັງພົບຄວາມຫຍຸ້ງຍາກໃນການຫາຊື້ນໍ້າມັນເຊື້ອໄຟໄລຍະໜຶ່ງເຊິ່ງເປັນບັນຫາລວມໃນທົ່ວປະເທດ ຍ້ອນການສະໜອງນໍ້າມັນເຊື້ອໄຟບໍ່ພຽງພໍກັບຄວາມຕ້ອງການໃນສັງຄົມ.
ຢ່າງໃດກໍຕາມ, ປັດຈຸບັນ ການປັບປຸງ ແລະ ສ້ອມແປງທາງຫລວງແຫ່ງຊາດ ເລກທີ 13 ໃຕ້ ໄລຍະທາງຜ່ານແຂວງບໍລິຄໍາໄຊ ທັງ 2 ສັນຍາ ພວມສືບຕໍ່ຈັດຕັ້ງປະຕິບັດຢ່າງຕໍ່ເນື່ອງ. ສະນັ້ນ, ຜູ້ໃຊ້ລົດໃຊ້ຖະໜົນຜ່ານເສັ້ນທາງດັ່ງກ່າວ ຄວນເພີ່ມສະຕິລະມັດລະວັງໃຫ້ສູງຂຶ້ນກວ່າເກົ່າ ແລະ ປະຕິບັດຕາມການແນະນໍາການສັນຈອນຂອງຜູ້ຮັບເໝົາສ້ອມແປງຢ່າງເຂັ້ມງວດ ເພື່ອຮັບປະກັນບໍ່ໃຫ້ມີອຸບັດຕິເຫດເກີດຂຶ້ນ.
ແຫຼ່ງຂ່າວ FM90