ເຈົ້າໜ້າທີ່ປັບໃໝປະຊາຊົນທີ່ມີໃບເສຍຄ່າທຳນຽມທາງແບບໃໝ່ ເນື່ອງຈາກວ່າ ອາດຍັງບໍ່ທັນຮູ້ການປັບປ່ຽນໃບເສຍຄ່າທຳນຽມທາງໃນຮູບແບບໃໝ່.
ຈາກການລາຍງານຂອງປະຊາຊົນ ທີ່ລາຍງານມາທາງເພຈໃຫ້ຮູ້ວ່າ: ວັນທີ 6 ກໍລະກົດ 2023 ໄດ້ເດີນທາງມາແຕ່ແຂວງຫົວພັນ ມາຕາມທາງ ເຈົ້າໜ້າທີ່ກະໄດ້ຂໍກວດເອກະສານລົດຕາມແຕ່ລະຈຸດປົກກະຕິ ກໍບໍ່ມີບັນຫາຫຍັງ, ພໍມາຮອດເມືອງຄູນ ແຂວງຊຽງຂວາງ ເຈົ້າໜ້າໄດ້ຂໍກວດເອກະສານລົດ ກໍໄດ້ເອົາເອກະສານໃຫ້ກວດຕາມປົກກະຕິ ແລະ ເອກະສານກະມີຄົບທຸກຢ່າງເຊັ່ນ : ໃບຂັບຂີ່, ກວດກາເຕັກນິກ, ໃບເສຍຄ່າທໍານຽມທາງ, ສັນຍາປະກັນໄພ.
ແຕ່ເຈົ້າໜ້າທີ່ບອກວ່າ: “ໃບເສຍຄ່າທໍານຽມທາງໃຊ້ບໍ່ໄດ້” ໃບທີ່ໃຊ້ໄດ້ໃບໃຫຍ່ກ່ວາໃບທີ່ມີຢູ່ມານໍາລົດ ແລະ ໃບສັນຍາປະກັນກໍມີຕິດມານໍາ ແຕ່ພັດບອກວ່າບໍ່ມີ ເຈົ້າໜ້າທີ່ໄດ້ຂຽນໃບມອບເງິນໃຫ້ ດ້ວຍຄວາມທີ່ບໍ່ຮູ້ຜູ້ກ່ຽວຈຶ່ງເສຍເງິນໄປຕາມໃບບິນ.
ອີງຕາມແຈ້ງການຂອງກະຊວງການເງິນ ເລກທີ 0529/ຫກ ເລື່ອງການນຳໃຊ້ແບບພິມໃບເສຍຄ່າທຳນຽມທາງແບບໃໝ່ ໄດ້ຮູ້ວ່າ ທາງກະຊວງການເງິນໄດ້ມີການພັດທະນາ ເຊິ່ງມີການປັບປຸງແບບພິມຂອງໃບເສຍຄ່າທຳນຽມທາງ.
ດັ່ງນັ້ນ ຈຶ່ງຂໍໃຫ້ບັນດາພາກສ່ວນທີ່ກ່ຽວຂ້ອງລົງຝຶກອົບຮົມ ແລະ ແຈ້ງໃຫ້ແກ່ບັນດາເຈົ້າໜ້າທີ່ໃຫ້ຊາບຢ່າງທົ່ວເຖິງກ່ຽວກັບເລື່ອງນີ້ດ້ວຍ.
