ແມ່ຕູ້ອາຍຸ 64 ປີ ຕໍ່ສູ້ກັບໝີດຳດ້ວຍການເອົາມືສົກ ເພື່ອຫວັງຊ່ວຍໝາຂອງຕົນເອງ.
ເລື່ອງຂອງ ລິນ ເຄລລີ່ (Lynn Kelly) ແມ່ຕູ້ອາຍຸ 64 ປີ ອາໄສຢູ່ລັດເມນ ສະຫະລັດອາເມຣິກາ ໄດ້ກາຍເປັນຂ່າວດັງໄປທົ່ວໂລກ ເພາະວ່າລາວໄດ້ສູ້ກັບໝີດຳດ້ວຍມື ແລະ ໄດ້ຮັບບາດເຈັບພຽງເລັກໜ້ອຍ.
ໃນຂະນະທີ່ລາວກຳລັງເຮັດວຽກຢູ່ສວນຫຼັງບ້ານ ຢູ່ດີໆໝາຂອງລາວກໍເລີ່ມເຫົ່າ ແລະ ແລ່ນເຂົ້າໄປໃນປ່າ ຫຼັງຈາກນັ້ນໄດ້ບໍ່ດົນ ໝາກໍແລ່ນອອກມາຈາກປ່າໂດຍມີ ໝີດຳ ແລ່ນໄລ່ຕາມມາ.
ເຄລລີ່ ໄດ້ເລົ່າວ່າ: “ໝີເບິ່ງມາຫາຂ້ອຍ ແລະ ຂ້ອຍກໍເບິ່ງໝີ ຂ້ອຍຄິດວ່າເຮົາຕ່າງຢ້ານກັນ”.
ເມື່ອໝີລຸກຂຶ້ນ ແມ່ຕູ້ຄົນນີ້ຈຶ່ງພະຍາຍາມຢືນໃຫ້ສູງເທົ່າທີ່ຈະເຮັດໃຫ້ ເຊິ່ງໂຕໝີກໍສູງກວ່າລາວ 30 ຊັງຕີແມັດ ໂດຍເຄລລີ່ບອກວ່າ ທີ່ຕົນເອງຕ້ອງສູ້ ແລະ ບໍ່ແລ່ນໜີ ເພາະຄິດວ່າເຮັດຈັງໃດໝີກໍໄລ່ຕາມມາຄືເກົ່າ.
ໃນຂະນະນັ້ນ ເຄລລີ່ ໄດ້ໃຊ້ມືສົກໄປທີ່ດັງຂອງໝີ ແລະ ໝີກໍກັດມືເບື້ອງຂວາຂອງລາວ ຈາກນັ້ນກໍປ່ອຍມື ແລະ ຟ້າວແລ່ນກັບເຂົ້າໄປໃນປ່າ ໂດຍທີ່ໝາຂອງລາວບໍ່ໄດ້ຮັບອັນຕະລາຍ ສ່ວນເຄລລີ່ຖືກນຳສົ່ງເຂົ້າໂຮງໝໍເພື່ອຮັກສາ ແລະ ສາມາດກັບບ້ານໄດ້.
ທາງເຈົ້າໜ້າທີ່ດ້ານສັດປ່າ ເປີດເຜີຍວ່າ: ກ່ອນໜ້ານີ້ບໍ່ເຄີຍພົບໝີ ຫຼັງຈາກທີ່ເກີດເຫດກັບເຄລລີ່ ກໍບໍ່ມີໃຜພົບໝີໂຕນັ້ນອີກເລີຍ ທັ້ງນີ້ໜ່ວຍງານທີ່ກ່ຽວຂ້ອງກໍວາງກັບດັກໄວ້ເພື່ອພະຍາຍາມຈັບໝີດັ່ງກ່າວ.
ແຫຼ່ງຂ່າວ cbsnews