ຕາມການໃຫ້ຂໍ້ມູນຂອງ ໜ່ວຍງານຕຳຫຼວດຈາລະຈອນ-ມອດໄຟ ກອງບັນຊາການ ປກສ ເມືອງສິງ ແຂວງຫຼວງນ້ຳທາ ໃຫ້ຮູ້ວ່າ 6 ເດືອນຕົ້ນປີ 2023 ຜ່ານມານີ້ ທົ່ວເມືອງສິງ ມີອຸບັດຕິເຫດເກີດຂື້ນທັງໝົດ 41 ລາຍ. ໃນນັ້ນ ລົດໃຫຍ່ຕໍາລົດໃຫຍ່ 1 ລາຍ, ລົດໃຫຍ່ຕຳລົດຈັກ 14 ລາຍ, ລົດຈັກຕຳລົດຈັກ 18 ລາຍ, ລົດຈັກຕຳລົດໃຫຍ່ 4 ລາຍ, ລົກຈັກຕຳຄົນຍາງ 4 ລາຍ.
ອຸບັດຕິເຫດທີ່ເກີດຂື້ນເຮັດໃຫ້ພາຫະນະເປ່ເພທັງໝົດ 63 ຄັນ, ລົດໃຫຍ່ 18 ຄັນ, ລົດຈັກ 45 ຄັນ, ເປ່ເພສົມຄວນ 37 ຄັນ, ເປ່ເພເລກນ້ອຍ 39 ຄັນ, ມີຜູ້ໄດ້ຮັບບາດເຈັບ 46 ຄົນ, ຍິງ 14 ຄົນ, ບາດເຈັບສົມຄວນ 21 ຄົນ, ຍິງ 4 ຄົນ, ບາດເຈັບສາຫັດ 07 ຄົນ, ຍິງ 2 ຄົນ, ບາດເຈັບເລັກນ້ອຍ 18 ຄົນ, ເສຍຊິວິດ 1 ຄົນ, ສ້າງຄວາມເສຍຫາຍທັງໝົດ ປະມານ 550.900.000 ກີບ.
ພັຕ ສີວັນໄຊ ຈັນທະພິໄຊ ຫົວໜ້າກອງຕຳຫຼວດຈາລະຈອນ-ມອດໄຟ ປກສ ເມືອງສິງ ໃຫ້ຮູ້ຕື່ມອີກວ່າ ຄະດິອຸບັດຕິເຫດດັ່ງກ່າວ ຖ້າທຽບໃສ່ໃນຊ່ວງໄລຍະ 6 ເດືອນທ້າຍປີ 2022 ແມ່ນເພີມຂື້ນ 5 ລາຍ, ສາເຫດສ່ວນໃຫຍ່ທີ່ພາໃຫ້ເກີດອຸບັດຕິເຫດ ແມ່ນເກີດມາຈາກ ການດື່ມສິ່ງມຶນເມົາແລ້ວຂັບຂີ່ຍານພາຫະນະ, ແລ່ນໄວ້ເກີນກຳນົດ ແລະ ບໍ່ເຄົາລົບລະບຽບການສັນຈອນຕາມທ້ອງຖະໜົນຫຼວງ ຈຶ່ງພາໃຫ້ເກີດອຸບັດຕິເຫດ. ສະນັ້ນ ກໍຢາກຝາກເຖີ່ງຜູ້ຂັບຂີ່ຍານພາຫະນະທຸກຄົນຕ້ອງມີສະຕິໃນການຂັບຂີ່ ຄ່ອຍໄປ-ຄ່ອຍມາ ແລະ ພ້ອມກັນເອົາໃຈໃສ່ປະຕິບັດກົດລະບຽບການສັນຈອນ ຕາມທ້ອງຖະໜົນຫຼວງ ໃຫ້ເຂັ້ມງວດ ເພື່ອຫຼີກລ່ຽງ ຈາກການເກີດອຸບັດຕິເຫດ.
ແຫຼ່ງຂ່າວ ຂ່າວ ປກສ ແຂວງຫລວງນ້ຳທາ