ເຂດອະນຸລັກທຳມະຊາດວໍ່ຫຼົງ ເຜີຍແຜ່ວິດີໂອ “ໝີແພນດ້າເຜືອກ” ຍ່າງໄປຫາຄູ່ແມ່ລູກແພນດ້າ ໂດຍຜູ້ຊ່ຽວຊານຄາດວ່າ ແພນດ້າຍັກໂຕແມ່ ກໍເປັນແມ່ຂອງແພນດ້າສີເຜືອກໂຕນີ້ເຊັ່ນກັນ.
ສຳນັກຂ່າວ ຊິນຫົວ ຂອງຈີນ ໄດ້ລາຍງານວ່າ: ໜ່ວນງານອະນຸລັກທຳມະຊາດວໍ່ຫຼົງ ມົນທົນເສສວນ ເຜີຍແຜ່ວິດີໂອໃນວັນທີ 27 ພຶດສະພາ ທີ່ຜ່ານມາ ດ້ວຍກ້ອງອິນຟາເຣດຂອງເຂດອະນຸລັກ ສາມາດບັນທຶກພາບໝີແພນດ້າຍັກຂົນສີຂາວລ້ວນ ທີ່ຍ່າງໄປຫາຄູ່ແມ່ລູກແພນດ້າຄູ່ໜຶ່ງ.
ໂດຍວິດີໂອດັ່ງກ່າວ ບັນທຶກຕອນທ້າຍເດືອນກຸມພາ ທີ່ຜ່ານມານີ້ ສະແດງໃຫ້ເຫັນໝີແພນດ້າຍັກໂຕສີຂາວລ້ວນ ຍ່າງໄປຫາແມ່ລູກແພນດ້າຄູ່ໜຶ່ງ ທີ່ກຳລັງພັກຜ່ອນໃນໂພງຕົ້ນໄມ້ ແລະ ສົ່ງສັນຍານການສ້າງປະຕິສຳພັນ ເຊິ່ງແມ່ແພນດ້າບໍ່ໄດ້ອອກຈາກໂພງຕົ້ນໄມ້ ແລະ ຮັກສາທ່າທີສະຫງົບ.
ຫຼັງຈາກ ທີ່ຄູ່ແມ່ລູກແພນດ້າອອກຈາກໂພງຕົ້ນໄມ້ແລ້ວ ແພນດ້າໂຕສີຂາວກໍກັບມາໂພງຕົ້ນໄມ້ ແລ້ວດົມກິ່ນທົ່ວບໍລິເວນທີ່ແມ່ແພນດ້າອາໄສຢູ່.
ລູກແພນດ້າໃນວິດີໂອນີ້ອາດມີອາຍຸ 1-2 ປີ ສ່ວນໝີແພນດ້າໂຕສີຂາວມີຂະໜາດເກືອບເທົ່າແພນດ້າທີ່ໃຫຍ່ເຕັມທີ່ແລ້ວ, ໃນຊ່ວງເດືອນກຸມພາ ໝີແພນດ້າປ່າຈະເຂົ້າລະດູຕິດສັດ ເຊິ່ງເປັນຊ່ວງທີ່ໝີແພນດ້າເພດເມຍ ແລະ ລູກ ຈະດຸຮ້າຍຫຼາຍ ຖ້າມີໝີແພນດ້າໂຕອື່ນເຂົ້າມາໃກ້, ແຕ່ກົງກັນຂ້າມ ໝີແພນດ້າແມ່ໂຕນີ້ ກັບມີທ່າທີສະຫງົບ ຈົນບໍ່ສອດຄ່ອງກັບທຳມະຊາດທົ່ວໄປ ເຊິ່ງອາດມີຄວາມເປັນໄປໄດ້ວ່າ ໝີແພນດ້າໂຕສີຂາວລ້ວນກໍເປັນລູກຂອງໝີແພນດ້າແມ່ໂຕນີ້.