ສປປ ລາວ ເປັນເຈົ້າພາບກຽມຈັດວັນການທ່ອງທ່ຽວພູເຂົາສາກົນ ຄັ້ງທີ 5

0
2129

ໃນວັນທີ 11 ພຶດສະພາ 2023 ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ (ຖວທ) ຜູ້ຕາງໜ້າສະຫະພັນການທ່ອງທ່ຽວ ພູເຂົາສາກົນ ສປ ຈີນ ເພື່ອປຶກສາຫາລື ແລະ ກະກຽມຈັດຕັ້ງວັນການທ່ອງທ່ຽວພູເຂົາສາກົນ ຄັ້ງທີ 5 ແລະ ກອງປະຊຸມປິ່ນອ້ອມກ່ຽວຂ້ອງ ຢູ່ ສປປ ລາວ ພາຍໃຕ້ຫົວຂໍ້ “ມ່ວນຊື່ນໃນຄວາມມະຫັດສະຈັນຂອງພູເຂົາ ເພື່ອຟື້ນຟູອຸດ ສາຫະກຳການທ່ອງທ່ຽວ”. ງານດັ່ງກ່າວຈະມີໄດ້ຮັບຊົມການວາງສະແດງບັນດາຮູບພາບ ແຫຼ່ງທ່ອງທ່ຽວທາງພູເຂົາ, ຊົມການວາງສະແດງ ເຄື່ອງຫັດຖະກຳ, ວັດທະນະທຳ ແລະ ຜະລິດຕະພັນ ການທ່ອງທ່ຽວລາວ, ກອງປະຊຸມສຳມະນາ, ເວທີປຶກສາຫາລືເພື່ອສົ່ງເສີມ ແລະ ຟື້ນຟູອຸດສາຫະກໍາການ ທ່ອງທ່ຽວ ແລະ ກອງປະຊຸມສົນທະນາແລກປ່ຽນລະຫວ່າງພາກທຸລະກິດ ແລະ ເປີດກວ້າງການດຳເນີນທຸລະກິດ.

ໂອກາດນີ້, ທ່ານ ຮອງລັດຖະມົນຕີ ຖວທ ໄດ້ສະແດງຄວາມຍິນດີຕ້ອນຮັບ ແລະ ຍ້ອງຍໍຊົມເຊີຍຂອບໃຈ ມາຍັງສະຫະພັນທີ່ໄດ້ເລືອກເອົາ ສປປ ລາວ ເປັນສະຖານທີ່ຈັດງານໃນຄັ້ງນີ້, ທັງໄດ້ເອົາໃຈໃສ່ຫ້າງຫາກະກຽມຈັດງານອັນມີຜົນສຳເລັດຫຼາຍດ້ານ; ພ້ອມນັ້ນ, ທ່ານຍັງໄດ້ຕີລາຄາສູງຕໍ່ການຈັດຕັ້ງປະຕິບັດກິດຈະກຳຕ່າງໆ ຈະເປັນໂອກາດອັນດີໃນການເປີດກວ້າງ ການຮ່ວມມືດ້ານການທ່ອງທ່ຽວ ເຊິ່ງ ສປປ ລາວ ກໍມີທ່າແຮງໃນການທ່ອງທ່ຽວພູເຂົາ. ພາຍຫຼັງການຟື້ນຟູອຸດສາຫະກຳ ການທ່ອງທ່ຽວຂອງໂລກ ຈາກການແຜ່ລະບາດຂອງພະຍາດ ໂຄວິດ-19 ກໍໄດ້ມີກິດຈະກຳສົ່ງເສີມການທ່ອງທ່ຽວ ຢູ່ສປປ ລາວ ຢ່າງເນື່ອງ ໂດຍສະເພາະ ພິທີຕ້ອນຮັບນັກທ່ອງທ່ຽວ ແລະ ຜູ້ໂດຍສານທີ່ເດີນທາງ ໃນຂະບວນທຳອິດ ການເປີດບໍລິການໂດຍສານສາກົນ ລົດໄຟລາວ-ຈີນ ຄັ້ງວັນທີ 13 ເມສາ 2023 ທີ່ສະຖາ ນີລົດໄຟ ນະຄອນຫຼວງວຽງຈັນ ແລະ ບໍ່ເຕ່ນ, ແຂວງຫຼວງນ້ຳທາ ທີ່ຜ່ານມາ ອັນໄດ້ກາຍເປັນຂີດໝາຍທີ່ເຕັມໄປດ້ວຍຄວາມໝາຍ ຄວາມສໍາຄັນຕໍ່ປະຊາຊົນສອງຊາດ ລາວ-ຈີນ ໂດຍສະເພາະຕໍ່ວຽກສົ່ງເສີມການທ່ອງທ່ຽວ ຖືວ່າເປັນການໂຄສະນາການທ່ອງທ່ຽວລາວ ໃຫ້ແກ່ຕະຫຼາດທ່ອງທ່ຽວ ສປ ຈີນ ກວ້າງຂວາງສົມຄວນ ເຮັດໃຫ້ນັກທ່ອງທ່ຽວ ຈີນ ກາຍເປັນເປົ້າໝາຍຕະຫຼາດການທ່ອງທ່ຽວ ທີ່ມີກຳລັງຊື້ຫຼາຍທີ່ສຸດຂອງລາວ.

ວັນການທ່ອງທ່ຽວພູເຂົາສາກົນ ຄັ້ງທີ 5 ແລະ ກອງປະຊຸມປິ່ນອ້ອມກ່ຽວຂ້ອງ ພາຍໃຕ້ຫົວຂໍ້ “ມ່ວນຊື່ນໃນຄວາມມະຫັດສະຈັນຂອງພູເຂົາ ເພື່ອຟື້ນຟູອຸດສາຫະກຳການທ່ອງທ່ຽວ” ມີແຜນການຈະຈັດຂື້ນໃນລະຫວ່າງວັນທີ 28 ພຶດສະພາ ຫາ 1 ມີຖຸນາ 2023 ທີ່ນະຄອນຫຼວງວຽງຈັນ ແລະ ແຂວງຫຼວງພະບາງ, ທ່ານ ຮອງລັດຖະມົນຕີ ກໍໄດ້ມອບໝາຍໃຫ້ກົມວິຊາການ ສົມທົບກັບ ສະຫະພັນການທ່ອງທ່ຽວພູເຂົາສາກົນ ເພື່ອແລກປ່ຽນປະສານງານດ້ານວິຊາການ ໃນການຮ່ວມກັນຈັດຕັ້ງປະຕິບັດ ໃຫ້ສຳເລັດຕາມລະດັບຄາດໝາຍ ແລະ ຈະໄດ້ເຊີນບັນດາສະຖານທູດຕ່າງປະເທດ ປະຈຳ ສປປ ລາວ, ພາກລັດ, ຜູ້ປະກອບການທຸລະກິດ ແລະ ສື່ມວນຊົນ ເຂົ້າຮ່ວມ.

ແຫຼ່ງຂ່າວ ຂປລ

ພາບ PAI WA