ເມືອງຈໍາພອນ ແຂວງສະຫວັນນະເຂດ ກໍ່ເປັນເມືອງໜຶ່ງທີ່ຂຶ້ນຊື່ໃນການຜະລິດກະສິກໍາເປັນສິນຄ້າ ເວົ້າລວມ ເວົ້າສະເພາະກໍ່ຄືປະຊາຊົນບ້ານໄຜ່ ທີ່ໄດ້ປູກພືດລະດູແລ້ງເປັນສິນຄ້າ ໂດຍສະເພາະ ແມ່ນປູກໝາກເຜັດ.
ທ່ານ ກອງມະນີ ແກ້ວວົງກົດ ຮອງນາຍບ້ານບ້ານໄຜ່ ໄດ້ໃຫ້ຮູ້າວ່າ: ປະຊາຊົນບ້ານໄຜ່ ສ່ວນຫຼາຍ ແມ່ນເຮັດວຽກກະສິກໍາເປັນຫຼັກ ແລະ ປູກພືດລະດູແລ້ງ ເປັນສໍາຮອງ ເຊັ່ນ: ມັນຕົ້ນ, ໝາກໄມ້ກິນໝາກ ຈຸດສໍາຄັນກໍແມ່ນປູກໝາກເຜັດດໍ ໃນແຕ່ລະຄອບຄົວ ເຊິ່ງໃນທົ່ວບ້ານມີຄອບຄົບປູກໝາກເຜັດ 132 ຄອບຄົວ, ໃນເນື້ອທີ່ 16 ເຮັກຕາ ເຊິ່ງໃນປີຜ່ານມາ ແມ່ນປູກໃນຈໍານວນ 20 ເຮັກຕາ ສໍາລັບປີນີ້ແມ່ນໄດ້ປູກຫຼຸດລົງເນື່ອງຈາກວ່າໃນຕົ້ນປີ ໝາກເຜັດລາຄາຖືກລົງ ມີແຕ່ 13ພັນກີບ-15ພັນກີບ ຕໍ່ກິໂລ, ໝາກເຜັດແຫ້ງລາຄາ 75 ພັນກີບຕໍ່ກິໂລ ເຊິ່ງໃນນີ້ມີໝາກເຜັດມີ 3 ສາຍພັນຄື: ສາຍພັນຂາວຊີ້, ສາຍພັນຂາວຢ່ອນ ແລະ ສາຍພັນຂຽວສະເຫວີຍ ເຊິ່ງໄລຍະການປູກໃຊ້ເວລາພຽງແຕ່ 3 ເດືອນກໍ່ສາມາດເກັບຜົນຜະລິດຂາຍໄດ້, ມາຮອດປັດຈຸບັນຖືວ່າລາຄາໝາກເຜັດສູງຂຶ້ນກວ່າເກົ່າ ຈຶ່ງເຮັດໃຫ້ຊາວສວນ ມີລາຍຮັບທີ່ສູງຂຶ້ນ ສະເລ່ຍລາຍໄດ້ຄອບຄົວລະ 30ລ້ານກີບ ຫາ 40 ລ້ານກີບ, ຕໍ່ລະດູການ ໃນການຂາຍແມ່ນມີແມ່ຄ້າພາຍໃນເມືອງ ແລະ ແຂວງມາເກັບຊື້ກັບທີ່ ນອກນັ້ນກໍໄດ້ສົ່ງອອກຕ່າງແຂວງຄື: ແຂວງຈຳປາສັກ, ແຂວງວຽງຈັນ.
ໂອກາດນີ້ທ່ານ ກອງມະນີ ກໍໄດ້ຮຽກຮ້ອງມາຍັງໜ່ວຍງານພາກສ່ວນທີ່ກ່ຽວຂ້ອງ ຫາຕະຫຼາດຮັບຮອງໃຫ້ລາຄາໝາກເຜັດໃຫ້ສູງຂຶ້ນ ແລະ ຄົງທີ່ , ພ້ອມທັງຮຽກຫ້ອງການນໍາພັກ-ລັດຊ່ວຍຊຸກຍູ້ຝາຍເກັບນໍ້າເພື່ອກັກເກັບນໍ້າໄວ້ໃຫ້ພຽງພໍໃນການຜະລິດ.
ທ່ານ ໂອບີ ບຸນທະວີ ປະຊາຊົນບ້ານໄຜ່ ອາຊີບຕົ້ນຕໍແມ່ນເຮັດນາ ແລະ ປູກພືດເປັນອາຊີບສໍາຮອງ ໂດຍສະເພາະ ແມ່ນປູກໝາກເຜັດ ເຊິ່ງທ່ານໄດ້ໃຫ້ສໍາພາດຕື່ມວ່າ: ການປູກໝາກເຜັດປີນີ້ແມ່ນປູກໜ້ອຍກວ່າປີຜ່ານມາ ຍ້ອນວ່າ ແຕ່ກ່ອນລາຄາໝາກເຜັດດິບມີພຽງແຕ່ 3 ພັນຫາ 7 ພັນກີບຕໍ່ກິໂລ ສໍາລັບປີນີ້ລາຄາຖືວ່າສູງຂຶ້ນ 13-15 ພັນກີບຕໍ່ກິໂລ ການລົງທຶນປູກລົງທຶນປະມານ 3ລ້ານກີບ ໃນການເກັບກູ້ແມ່ນໄດ້ຈ້າງແຮງງານພາຍໃນບ້ານເກັບ 1 ກິໂລຕໍ່ 2 ພັນກີບ ບັນຫາທີ່ພົບຄື ໝາກເຜັດເປັນບວມເນົ່າບໍ່ສາມາດຮັກສາໄດ້, ສະນັ້ນຢາກໃຫ້ວິຊາການກໍຄືຫ້ອງການກະສິກໍາ-ປ່າໄມ້ໄດ້ລົງມາແນະນໍາການຮັກສາການເນົ່າຂອງໝາກເຜັດໃຫ້ມັນດີຂຶ້ນກວ່າເກົ່າ.
ທີ່ມາ MDL