ມີຂ່າວສຸຂະພາບທີ່ປະເທດສາຫະລັດອະເມລິກາ ກ່ຽວກັບເລື່ອງປະໂຫຍດຂອງການບໍລິໂພກ ວິຕາມິນ ເພື່ອໃຫ້ຄວາມຮູ້ຄວາມເຂົ້າໃຈທີ່ຖືກຕ້ອງ ນັບວ່າເປັນຂ່າວຮືຮາ ພໍສົມຄວນ ເນື່ອງຈາກປະຈຸບັນເງິນໝູນວຽນໃນອຸດສາຫະກຳການບໍລິໂພກ ວິຕາມິນ ໃນສາຫະລັດອາເມລິກາ ມີມູນຄ່າສູງມະຫາສານ ແລະ ຜູ້ໃຫຍ່ຊາວອາເມລິກາ ປະມານ 50% ກິນ ວິຕາມິນ ເສີມຢ່າງນ້ອຍໜຶ່ງໂຕເປັນປະຈຳ ແລະ ປະມານ 1 ໃນ 3 ກິນ ວິຕາມິນລວມເສີມເປັນປະຈຳ ໂດຍມີຄວາມເຊື່ອວ່າ ຈະສົ່ງຜົນດີີຕໍ່ສຸຂະພາບ ແຕ່ຜົນການສຶກສາລ່າສຸດ ນອກຈາກຈະບໍ່ຊ່ວຍຫຍັງໃນຜູ້ໃຫຍ່ທີ່ຮ່າງກາຍປົກກະຕິແຂງແຮງຢູ່ແລ້ວ ຍັງເປັນອັນຕະລາຍຕໍ່ສຸຂະພາບນໍາອີກ
ຫນ່ວຍງານວິໄຈການປ້ອງກັນສຸຂະພາບຂອງສະຫະລັດອາເມລິກາ ໂດຍທີມນັກວິທະຍາສາດ ແລະ ນັກວິໄຈຊັ້ນນຳ 16 ຄົນ ຮ່ວມກັນທົບທວນຜົນການສຶກສາທົ່ວໂລກທີ່ກ່ຽວຂ້ອງກັບການໃຊ້ ວິຕາມິນ ຕໍ່ສຸຂະພາບໃນໄລຍະ 10 ປີທີ່ຜ່ານມາ ເພື່ອອັບເດດຂໍ້ສະຫລຸບເລື່ອງນີ້ທີ່ເຄີຍເຮັດໄວ້ວ່າ ມີຂໍ້ມູນຫຍັງໃໝ່ໆ ທີ່ສະໜັບສະໜູນ ຫລື ບໍ່ ໂດຍມີ 5 ລາຍງານທີ່ສຶກສາເລື່ອງ ວິຕາມິນລວມ ແລະ 24 ລາຍງານທີ່ສຶກສາ ວິຕາມິນ ສະເພາະໂຕ ຫລື ເປັນຄູ່ ໃນສ່ວນຂອງ ວິຕາມິນລວມ 3 ໃນ 5 ລາຍງານ ບໍ່ພົບວ່າການກິນວິຕາມິນ ລວມມີປະໂຫຍດຫຍັງ ມີພຽງໜຶ່ງລາຍງານທີ່ ວິຕາມິນ ອາດຈະຊ່ວຍຫລຸດຄວາມສ່ຽງການເປັນມະເຮັງໃນຊາຍສູງອາຍຸໄດ້ໜ້ອຍໜຶ່ງ ໃນຂະນະທີ່ລາຍງານທີ່ສຶກສາ ວິຕາມິນ ສະເພາະໂຕ ຫລື ເປັນຄູ່ ພົບວ່າ ມີພຽງ 2-3 ລາຍງານຈາກທັງໝົດ 24 ລາຍງານທີ່ມີຂໍ້ມູນພຽງພໍ ແຕ່ຂະໜາດໂດດຂອງ ວິຕາມິນ ທີ່ໃຫ້ ກໍແຕກຕ່າງກັນເຮັດໃຫ້ບໍ່ສາມາດຫາຂໍ້ສະຫລຸບໄດ້
ແຕ່ທີ່ໜ້າສົນໃຈທີ່ສຸດຈາກການທົບທວນຜົນການສຶກສາຄື ຜົນຂອງ ວິຕາມິນອີກັບ ເບຕ້າແຄໂລທີນ ທີ່ເປັນທີ່ນິຍົມກັນຫລາຍໃນໝູ່ຜູ້ມັກກິນ ວິຕາມິນ ມີບົດສະຫລຸບທີ່ຊັດເຈນວ່າ ຈາກການທົບທວນລາຍງານທີ່ເປັນແບບສຸ່ມ ແລະ ມີການຄວບຄຸມຈຳນວນ 6 ລາຍງານ ພົບວ່າ ວິຕາມິນອີ ແລະ ເບຕ້າແຄໂລທີນ ບໍ່ໄດ້ຊ່ວຍຫລຸດຄວາມສ່ຽງໃນການເກີດ ຫລື ຊ່ວຍປິ່ນປົວພະຍາດມະເຮັງ ແລະ ພະຍາດຫົວໃຈ ນອກຈາກນັ້ນການທົບທວນລາຍງານການສຶກສາທາງຄິີນິກອີກ 6 ລາຍງານກໍບໍ່ພົບວ່າ ເບຕ້າແຄໂລທີນຊ່ວຍຫຍັງໄດ້ບໍ່ ຊ້ຳບໍ່ໜໍາຍັງພົບວ່າ ມີ 2 ລາຍງານທີ່ມີຜົນເສຍຕໍ່ສຸຂະພາບນໍາອີກ ໂດຍສະເພາະຄົົນທີ່ມີຄວາມສ່ຽງທີ່ຈະເປັນມະເຮັງປອດຫລາຍກວ່າຊາວບ້ານທົ່ວໄປຢູ່ແລ້ວເຊັ່ນ ຄົົນທີ່ສູບຢາ ການກິນເບຕ້າແຄໂລທີນຫລາຍເກີນຄວາມຈຳເປັນ ຍັງເພີ່ມຄວາມສ່ຽງຂອງການເປັນມະເຮັງປອດໃນຄົນກຸ່ມນີ້ 24% ນໍາອີກ
ໄດ້ຮັບຮູ້ຂໍ້ມູນການທົບທວນບົດຄວາມທາງວິຊາການຈາກທົ່ວໂລກໃນຮອບ 10 ປີລ່າສຸດທີ່ຜ່ານມາຢ່າງເປັນທາງການແບບນີ້ແລ້ວ ນອກຈາກຈະຊ່ວຍຊໍ້າເຕີ່ມຕາມທີ່ທັງ 2 ສະມາຄົມວິຊາຊີບ ຄື ສະມາຄົມພະຍາດຫົວໃຈແຫ່ງສະຫະລັດອາເມລິກາ ແລະສະມາຄົມພະຍາດມະເຮັງແຫ່ງສະຫະລັດອາເມລິກາ ທີ່ບອກວ່າ ຕະຫລອດວ່າ ວິຕາມິນ ບໍ່ໄດ້ຊ່ວຍປ້ອງກັນ ຫລື ຊ່ວຍປິ່ນປົວພະຍາດທັງສອງແຕ່ຢ່າງໃດ ກໍຫວັງວ່າບັນດາຄົນທີ່ຮ່າງກາຍແຂງແຮງຢູ່ແລ້ວແຕ່ກຳລັງຫລົງຜິດ ກິນ ວິຕາມິນ ປະເພດຕ່າງໆ ດ້ວຍຄວາມຫວັງວ່າ ຈະຊ່ວຍບຳລຸງສຸຂະພາບ ແລະ ປ້ອງກັນພະຍາດມະເຮັງ ພະຍາດຫົວໃຈ ແລະ ອີກສາລະພັດພະຍາດ ວິຕາມິນ ມີໄວ້ໃຫ້ຄົົນທີ່ມີພາວະຂາດ ວິຕາມິນກິນ ເຊັ່ນ ເດັກນ້ອຍ ຜູ້ຍິງຖືພາ ຜູ້ສູງອາຍຸ ສ່ວນຜູ້ໃຫຍ່ທີ່ຮ່າງກາຍປົກກະຕິແຂງແຮງຢູ່ແລ້ວ ກິນອາຫານສົດໆຈາກທຳມະຊາດໃຫ້ຄົບທັງ 5 ໝູ່ກໍພຽງພໍແລ້ວ