ຫຼາຍປະເທດໃນອາຊີພ້ອມໃຫ້ການຊ່ວຍເຫຼືອ ພາຍຫຼັງເກີດເຫດແຜ່ນດິນໄຫວຄັ້ງໃຫຍ່ໃນວັນຈັນທີ່ຜ່ານມານີ້ ເຮັດໃຫ້ຄົນເສຍຊີວິດເກືອບ 8.400 ຄົນ ໃນປະເທດຕວັກກີ ແລະ ຊີເຣຍ.
ເຫດແຜ່ນດິນໄຫວຂະໜາດ 7,8 ຣິກເຕີ ໃນຕວັກກີ ແລະ ພາກເໜືອຂອງຊີເຣຍ ໃນວັນທີ 6 ກຸມພາ ເຮັດໃຫ້ຄົນເສຍຊີວິດຫຼາຍເຖິງ 8.364 ຄົນ ແລະ ບາດເຈັບຫຼາຍກວ່າ 37.011 ຄົນ (ອີງຕາມການລາຍງານຫຼ້າສຸດໃນຕວກກີ).
ຍີ່ປຸ່ນ: ທ່ານ ຟຸມິໂອະ ຄິຊິດະ ນາຍົກລັດຖະມົນຕີຂອງຍີ່ປຸ່ນ ໄດ້ສົ່ງທີມຊ່ວຍເຫຼືອ 18 ຄົນ ອອກເດີນທາງໄປຊ່ວຍເຫຼືອໃນວັນຈັນທີ່ຜ່ານມາ ແລະ ຍັງມີອີກ 75 ຄົນທີ່ກຳລັງຈະສົ່ງໄປ.
ຈີນ: ທ່ານ ສີ ຈິ້ນຜິງ ປະທານາທິບໍດີຂອງ ສປ ຈີນ ໄດ້ໃຫ້ການຊ່ວຍເຫຼືອເງິນຈຳນວນ 40 ລ້ານຢວນ ລວມເຖິງໜ່ວຍກູ້ໄພ ແລະ ທີມແພດ.
ອົດສະຕຣາລີ ແລະ ນິວຊີແລນ: ທ່ານ ແອນໂທນີ ອັລບານິສ ນາຍົກລັດຖະມົນຕີອົດສະຕຣາລີ ແລະ ທ່ານ ຄຣິສ ຮິບສກິນ ນາຍົກລັດຖະມົນຕີນິວຊີແລນ ກ່າວວ່າ ໄດ້ໃຫ້ຄວາມຊ່ວຍເຫຼືອດ້ານມະນຸດສະທຳເບື້ອງຕົ້ນຈຳນວນ 10 ລ້ານໂດລາສະຫະລັດ ໃຫ້ແກ່ຜູ້ທີ່ໄດ້ຮັບຜົນກະທົບຕໍ່ເຫດການແຜ່ນດິນໄຫວ.
ກຳປູເຈຍ: ລັດຖະບານກຳປູເຈຍ ໄດ້ມອບເງິນຊ່ວຍເຫຼືອດ້ານມະນຸດສະທຳຈຳນວນ 100.000 ໂດລາສະຫະລັດ.
ໄຕ້ຫວັນ: ທ່ານ ໄຊ່ ອິງເວິນ ປະທານາທິບໍດີຂອງໄຕ້ຫວັນ ໄດ້ສົ່ງເຈົ້າໜ້າທີ່ 40 ຄົນ ເດີນທາງໄປຕວັກກີໃນວັນຈັນທີ່ຜ່ານມາ ແລະ ຍັງສົ່ງໄປຕື່ມອີກ 130 ຄົນ ພ້ອມກັບທີມໝາຄົນຫາ 5 ໂຕ ແລະ ອຸປະກອນການຊ່ວຍເຫຼືອຕ່າງໆ.
ມາເລເຊຍ, ຟີລິບປິນ ແລະ ເກົາຫຼີໃຕ້: ທ່ານ ນາງ ອັລວາ ອິບຣາຮິມ ນາຍົກລັດຖະມົນຕີຂອງມາເລເຊຍ ໄດ້ສົ່ງເຈົ້າໜ້າທີ່ໄປຊ່ວຍເຫຼືອຈຳນວນ 70 ຄົນ, ທ່ານ ບົງບົງ ມາກອສ ປະທານາທິບໍດີຟິລິບປິນ ສົ່ງເຈົ້າໜ້າທີ່ໄປຊ່ວຍເຫຼືອຈຳນວນ 85 ຄົນ ແລະ ທ່ານ ຢຸນ ຊຸກ ຢອລ ປະທານາທິບໍດີເກົາຫຼີໃຕ້ ສົ່ງເຈົ້າໜ້າທີ່ໄປຊ່ວຍເຫຼືອພ້ອມກັບທີມແພດ ຈຳນວນ 118 ຄົນ ອີກດ້ວຍ.
ອິນເດຍ: ທີມແພດຂອງກອງທັບ ເຈົ້າໜ້າທີ່ກອງກຳລັງບັນເທົາໄພພິບັດແຫ່ງຊາດ (NDRF) ແລະ ແພດຈາກອິນເດຍ ກໍໄດ້ເດີນທາງໄປເຖິງຕວັກກີແລ້ວເຊັ່ນກັນ.
ໄທ: ໃນຂະນະດຽວກັນ ລັດຖະບານໄທຍັງລະບຸວ່າ ຍິນດີທີ່ຈະສົ່ງທີມກູ້ໄພ ແລະ ໃຫ້ການຊ່ວຍເຫຼືອ.
ສ່ວນ ສປປ ລາວ ຍັງບໍ່ມີສົ່ງສານສະແດງຄວາມເສຍໃຈຢ່າງເປັນທາງການຈາກບັນດາທ່ານຜູ້ນຳ ໃຫ້ແກ່ຕວັກກີ-ຊີເຣຍ ແລະ ຍັງບໍ່ໄດ້ໃຫ້ການສະໜັບສະໜູນດ້ານໃດໆ.