ລັດຖະບານ ສ ເກົາຫຼີ ໄດ້ມອບເຂົ້າສານຈ້າວຈຳນວນ 1.314 ໂຕນ ລວມມູນຄ່າ 1,26 ລ້ານໂດລາ ໃຫ້ແກ່ລັດຖະບານລາວ ເພື່ອນຳໄປຊ່ວຍປະຊາຊົນ ຜູ້ທຸກຍາກ ແລະ ຜູ້ທີ່ໄດ້ຮັບຜົນກະທົບຈາກໄພພິບັດທາງທຳມະຊາດໃນຂອບເຂດທົ່ວປະເທດ.
ພິທີມອບ-ຮັບເຂົ້າຈຳນວນດັ່ງກ່າວໄດ້ຈັດຂຶ້ນໃນວັນທີ 13 ມັງກອນ ນີ້ ທີ່ນະຄອນຫຼວງວຽງຈັນ ໂດຍແມ່ນ ທ່ານ ຢຸງ ຊູຈຸງ ເອກອັກຄະລັດຖະທູດ ສ ເກົາຫຼີ ປະຈຳລາວ ເປັນຜູ້ກ່າວມອບ ແລະ ທ່ານ ນາງ ໃບຄໍາ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ເປັນຜູ້ກ່າວຮັບ ໂດຍມີພາກສ່ວນທີ່ກ່ຽວຂ້ອງເຂົ້າຮ່ວມ.
ເພື່ອສະໜັບສະໜູນປະຊາຊົນ ສປປ ລາວ ໃນການແກ້ໄຂຜົນກະທົບທາງດ້ານເສດຖະກິດຈາກການແຜ່ລະບາດຂອງພະຍາດໂຄວິດ-19 ແລະ ຄວາມທ້າທາຍທາງດ້ານງົບປະມານທີ່ເກີດຈາກວິກິດການດ້ານສະບຽງອາຫານ ແລະ ນ້ຳມັນເຊື້ອໄຟໂລກ, ສາທາລະນະລັດ ເກົາຫຼີ ໄດ້ສືບຕໍ່ບໍລິຈາກເຂົ້າສານເພື່ອແຈກຢາຍໃຫ້ປະຊາຊົນທີ່ດ້ອຍໂອກາດ ແລະ ຜູ້ທີ່ໄດ້ຮັບຜົນກະທົບໜັກຈາກວິກິດການດັ່ງກ່າວ. ການຊ່ວຍເຫຼືອຄັ້ງນີ້ ແມ່ນເປັນປີທີສອງ ຕິດຕໍ່ກັນ ຊຶ່ງເຂົ້າສານຈຳນວນ 1.314 ໂຕນ ລວມມູນຄ່າປະມານ 1,26 ລ້ານໂດລາ ໄດ້ມາຮອດສາງ ທີ່ນະຄອນຫຼວງວຽງຈັນ ເພື່ອນຳໄປຊ່ວຍເຫຼືອໃຫ້ແກ່ປະຊາຊົນຫຼາຍກວ່າ 100.000 ຄົນ ໃນຂອບເຂດທົ່ວປະເທດໃນໄວໆນີ້.
ທ່ານນາງ ໃບຄຳ ຂັດທິຍະ ກ່າວວ່າ: “ເຂົ້າສານຈາກ ສ ເກົາຫຼີ ຈະສືບຕໍ່ສ້າງຜົນປະໂຫຍດໃຫ້ແກ່ປະຊາຊົນຢູ່ເຂດຫ່າງໄກສອກຫຼີກທີ່ໄດ້ຮັບຜົນກະທົບຈາກໄພພິບັດທາງທຳມະຊາດ ເປັນຕົ້ນແມ່ນປະຊາຊົນທີ່ຢູ່ໃນເຂດທີ່ມີຄວາມສ່ຽງສູງ. ພວກເຮົາຂໍສະແດງຄວາມຂອບໃຈສໍາລັບການສະໜັບສະໜູນຈາກ ສ ເກົາຫຼີ, ໂດຍສະເພາະໃນສະພາວະແບບນີ້ທີ່ຊຸມຊົນກຳລັງພົບກັບຄວາມຫຍຸ້ງຍາກລຳບາກ ເນື່ອງຈາກເຄື່ອງອຸປະໂພກ ບໍລິໂພກທີ່ມີລາຄານັບມື້ນັບສູງຂຶ້ນເປັນຕົ້ນແມ່ນ ລາຄາອາຫານ, ນໍ້າມັນເຊື້ອໄຟ ແລະ ຝຸ່ນຊີວະພາບ”.
ທ່ານທູດ ສ ເກົາຫຼີ ກ່າວວ່າ: “ກະຊວງກະສິກຳ, ອາຫານ ແລະ ຊົນນະບົດ ຂອງ ສ ເກົາຫຼີ ໄດ້ສະໜອງເຂົ້າສຸກເສີນໃຫ້ແກ່ປະເທດຕ່າງໆໂດຍຜ່ານອົງການອາຫານໂລກຕັ້ງແຕ່ປີ 2018 ເປັນຕົ້ນມາ. ສປປ ລາວ ເປັນປະເທດໜຶ່ງທີ່ໄດ້ຮັບຜົນປະໂຫຍດຈາກການສະໜັບສະໜູນດັ່ງກ່າວນີ້ຕັ້ງແຕ່ປີ 2021 ແລະ ພວກເຮົາມີຄວາມສົນໃຈຫຼາຍທີ່ຈະຊ່ວຍຮັກສາຄວາມໝັ້ນຄົງທາງດ້ານສະບຽງອາຫານໃຫ້ແກ່ປະເທດທີ່ໄດ້ຮັບການຊ່ວຍເຫຼືອ. ການສະໜັບສະໜູນດັ່ງກ່າວ ແມ່ນສອດຄ່ອງກັບນະໂຍບາຍ ຂອງພວກເຮົາໃນການສືບຕໍ່ເອົາໃຈໃສ່ຮ່ວມມື ແລະ ໃຫ້ການຊ່ວຍເຫຼືອແກ່ບັນດາປະເທດອາຊຽນ”
ທ່ານ ຢານ ເດວບາເຣີ ຜູ້ອໍານວຍການ ແລະ ຜູ້ຕາງໜ້າອົງການອາຫານໂລກ ປະຈໍາ ສປປ ລາວ ກ່າວວ່າ: “ພວກເຮົາຕີລາຄາສູງຕໍ່ການຂະຫຍາຍການພົວພັນທີ່ພວກເຮົາມີກັບ ສ ເກົາຫຼີ ຊຶ່ງກາຍເປັນໜຶ່ງໃນບັນດາຜູ້ໃຫ້ທຶນທີ່ສຳຄັນທີ່ສຸດຂອງພວກເຮົາ.
ເຂົ້າສານຈາກ ສ ເກົາຫຼີ, ຊ່ວຍເຮັດໃຫ້ອົງການອາຫານໂລກ ສາມາດສະໜອງສະບຽງອາຫານສຸກເສີນ ເພື່ອຊ່ວຍເຫຼືອປະຊາຊົນກວ່າ 10.091 ຄົນຢູ່ແຂວງໄຊຍະບູລີ ໃນການຟື້ນຟູຈາກຜົນກະທົບຈາກພາຍຸເຂດຮ້ອນໂກກູມາ ໃນປີ 2021 ແລະ ຍັງໄດ້ເພີ່ມການຊ່ວຍເຫຼືອໃຫ້ແກ່ເດັກນັກຮຽນກວ່າ 84.000 ຄົນ ຊຶ່ງເປັນການເສີມສ້າງໂຄງການອາຫານໃນໂຮງຮຽນຂອງລັດຖະບານ ສປປ ລາວ. ການບໍລິຈາກເຂົ້າ ໃນປີນີ້ຈະຖືກຈັດສັນຢ່າງມີຍຸດທະສາດອີກຄັ້ງເພື່ອສະໜອງການຊ່ວຍເຫຼືອແກ່ປະຊາຊົນຜູ້ທີ່ມີຄວາມຕ້ອງການຫຼາຍທີ່ສຸດໃນທົ່ວປະເທດ”.
ແຫຼ່ງຂ່າວ ຂ່າວສານແຮງງານ ແລະ ສະຫວັດດີການສັງຄົມ-ຮສສ