ງານເທດສະການອາຫານອາຫານລາວ ແມ່ນໄດ້ຈັດຂຶ້ນທຸກໆປີ ປີໜຶ່ງແມ່ນໄດ້ຈັດເທື່ອໜຶ່ງ ເຊິ່ງເປັນບ່ອນເຕົ້າໂຮມອາຫານທ້ອງຖິ່ນຈາກບັນດາແຂວງຕ່າງໃນຂອບເຂດທົ່ວປະເທດແມ່ນໄດ້ມາເຕົ້າໂຮມກັນ.
ໃນວັນທີ 26 ທັນວາ 2022 ທີ່ ຫ້ອງປະຊຸມ ຕຶກ KC ສະມາຄົມນັກທຸລະກິດແມ່ຍິງ (ສທຍ) ໄດ້ຈັດພິທີຖະແຫຼງຂ່າວຈັດງານເທດສະການອາຫານລາວ ປະຈຳປີ 2023 ພາຍໃຕ້ການເປັນປະທານ ຂອງ ທ່ານ ນາງ ຈັນທະຈອນ ວົງໄຊ ປະທານ ສທຍ ແລະ ໃຫ້ກຽດເຂົ້າຮ່ວມໂດຍ ທ່ານ ປອ. ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ທ່ານ ນ. ລາວັນ ສຸດທິສານ ຮອງປະທານ ສູນກາງ ສະຫະພັນແມ່ຍິງລາວ, ທ່ານ ຈັນສະໝອນ ຜອງຈັນທາ ຜູ້ອຳນວຍການຝ່າຍການຕະຫຼາດ ບໍລິສັດ ເບຍລາວ ຈຳກັດ, ທ່ານ ນ. ມະໂນລາ ດາລາວົງ ປະທານ ທີ່ປຶກສາ ສທຍ ພ້ອມດ້ວຍຄະນະ ແລະ ສະມາຊິກ ສທຍ ແລະ ນັກຂ່າວສື່ມວນຊົນຈາກສ່ວນຕ່າງໆເຂົ້າ.
ງານເທດສະການອາຫານລາວ ປະຈຳປີ 2023 ຈະໄດ້ຈັດຂຶ້ນໃນວັນທີ 24-28 ມັງກອນ 2023 ທີ່ສວນເຈົ້າອານຸວົງ ທີ່ນະຄອນຫຼວງວຽງຈັນ ພາຍໃຕ້ຄຳຂວັນ “ອາຫານລາວກ້າວສູ່ສາກົນ” ເຊິ່ງຈະມີບູດວາງສະແດງສະແດງທັງໝົດ 180 ບູດ ຈະມີທັງບູດອາຫານ ແລະ ຫັດຖະກຳ ແລະ ຈະມີອາຫານທ້ອງຖິ່ນຫຼາກຫຼາຍຢ່າງຈາກບັນດາແຂວງຕາງໆໃນຂອບເຂດທົ່ວປະເທດຕັ້ງແຕ່ເໜືອເຖິງໃຕ້ຈະມາເຕົ້າໂຮມກັນຢູ່ໃນງານນີ້ ແລະ ຈະມີບູດວາງສະແດງຂອງບັນດາປະເທດສະມາຊິກອາຊຽນອີກດ້ວຍ.