ວັນທີ 3 ມັງກອນ 2023 ເວັບໄຊ້ The Telegraph ໄດ້ຈັດອັນດັບ 20 ສະຖານທີ່ ທີ່ຄວນໄປທ່ຽວໃນປີ 2023 ເຊິ່ງມີ ຕວກກີ ສະເປນ ເຄນຢາ ເສັ້ນທາງຊາຍຝັ່ງຂອງອັງກິດ ພູເຂົາ The Dolomites ຂອງອິຕາລີ ກູຢານາ ອາຟຣິກາໃຕ້ ອາເຈນຕີນ່າ ລອນດອນ ເມືອງແທງກິເອີປະເທດໂມລັອກໂຄ ຍີ່ປຸ່ນ ສະວິດເຊີແລນ ຝຣັ່ງ ອົດສະຕາລີຕາເວັນຕົກ ຮົງກາລີ ລັດລາສເວກັດ ສີລັງກາ ສະຟາລບາດ ມອນໂຕເຕເນໂກ ແລະ ລາວ.

ໂດຍທາງເວັບໄຊ້ໄດ້ບັນລະຍາຍວ່າ: ປະເທດລາວມີລົດໄຟຄວາມໄວສູງທີ່ຊື່ວ່າ “ລ້ານຊ້າງ” ທີ່ແລ່ນຈາກພາກກາງຫາພາກເໜືອ ດ້ວຍຄວາມໄວສູງສຸດເຖິງ 160 ກມ/ຊມ ເປັນລົດໄຟທີ່ມີຄວາມງາມດ້ວຍສີປະຈຳຊາດ ເຊິ່ງມັນແລ່ນຕັດຜ່ານພູເຂົາທາງພາກເໜືອ ໃນຂະນະທີ່ນັ່ງລົດໄຟ ສາມາດເຫັນພາບທີ່ສວຍງາມເຕັມໄປດ້ວຍທຳມະຊາດ ແລະ ພູຜາປ່າໄມ້.

ໂດຍມີປາຍທາງແມ່ນຫຼວງພະບາງ ເປັນສະຖານທີ່ຄຸ້ມຄອງຈາກອົງການຢູເນສໂກ, ໄກອອກໄປຈາກຕົວເມືອງກໍຄື ເມືອງໄຊ ເປັນບ້ານນ້ອຍໆ ມີນ້ຳຕົກ ແລະ ສະຖານທີ່ຜັກຜ່ອນແຄມນ້ຳໃນປ່າ.