ວັນທີ 25 ພະຈິກ 2022, ເຈົ້າໜ້າທີ່ພະແນກຕໍາຫຼວດ ປກສ ເມືອງ ທ່າພະບາດ ແຂວງບໍລິຄໍາໄຊ ໄດ້ສົມທັບກັບ ພະແນກລະບົບສາຍສົ່ງພາກກາງ 2 ລົງກວດກາ ແລະ ເຮັດແຜນປະກອບຄືນຄະດີລັກເຫຼັກ ແລະ ນ໋ອດ ເສົາໄຟຟ້າແຮງສູງ 115 ກິໂລວັດ ແລວທ່າບົກ-ປາກຊັນ ຕັ້ງຢູ່ເຂດບ້ານ ໂພສະຫວັນ ເມືອງທ່າພະບາດ ແຂວງບໍລິຄໍາໄຊ ທີ່ໄດ້ຄົນບໍ່ດີລັກເອົາໄປ ລວມມູນຄ່າເສຍຫາຍ 200 ລ້ານກວ່າກີບ. ເຫດການດັ່ງກ່າວ, ເຈົ້າໜ້າທີ່ສາມາດກັກຕົວຜູ້ຖືກຫາໄດ້ 3 ຄົນມາດໍາເນີນຄະດີ ແລະ ໃຊ້ແທນຄ່າເສຍຫາຍ ຕາມລະບຽບກົດໝາຍ.
ປະຈຸບັນ ເຖິງແມ່ນວ່າ ບາງຄົນ, ບາງກຸ່ມແກ້ງ ໄດ້ຖືກເຈົ້າໜ້າທີ່ຈັບຕົວມາດໍາເນີນຄະດີຕາມລະບຽບກົດໝາຍ, ຖືກປັບໃໝໃສ່ໂທດ ແຕ່ວ່າບັນຫາດັ່ງກ່າວ, ຍັງເກີດຂື້ນຢ່າງຕໍ່ເນື່ອງ. ສະນັ້ນ, ເຈົ້າໜ້າທີ່ຈິ່ງຮຽກຮ້ອງມາຍັງ ອົງການຈັດຕັ້ງຂັ້ນຕ່າງໆ, ອໍານາດການຈັດຕັ້ງທຸກບ້ານ ຕະຫຼອດຮອດພໍ່ແມ່ປະຊາຊົນບັນດາເຜົ່າ, ຈົ່ງຊ່ວຍກັນເປັນຫູເປັນຕາໃຫ້ແກ່ເຈົ້າໜ້າທີ່, ໃຫ້ທາງພາກລັດ-ເອກະຊົນ, ຖ້າຫາກພົບເຫັນບຸກຄົນ ຫຼື ກຸ່ມຄົນໃດທີ່ມີການປະພຶດເຄື່ອນໄຫວການກະທໍາຜິດ, ກໍ່ເຫດລັກຊັບ ຫຼື ອື່ນໆທີ່ຜິດຕໍ່ລະບຽບກົດໝາຍ ກໍ່ໃຫ້ຮິບຮ້ອນລາຍງານຕໍ່ເຈົ້າໜ້າທີ່ພາກສ່ວນທີ່ກ່ຽວຂ້ອງໂດຍດ່ວນ, ເພື່ອພ້ອມກັນຕ້ານ, ສະກັດກັ້ນ ແລະ ແກ້ໄຂໃຫ້ທັນສະພາບການ ແນ່ໃສ່ປົກປັກຮັກສາຊັບສີນຂອງລັດ, ຂອງລວມໝູ່ ແລະ ຂອງພໍ່ແມ່ປະຊາຊົນບັນດາເຜົ່າ.
ສໍາລັບບຸກຄົນໃດທີ່ໄດ້ເຄື່ອນໄຫວກະທໍາຜິດ, ເຄື່ອນໄຫວລັກຊັບ ກໍຂໍໃຫ້ຢຸດເຊົາ, ຫັນມາປະກອບອາຊີບທໍາຫາກີນຢ່າງຊື່ສັດສຸດຈະລິດ, ບໍ່ເຮັດຜິດຕໍ່ລະບຽບກົດໝາຍ. ເພາະຖ້າຫາກ ບໍ່ຢຸດເຊົາ ຫຼື ຍັງສືບຕໍ່ເຄື່ອນໄຫວກະທໍາຜິດຕໍ່ລະບຽບກົດໝາຍ, ເມື່ອເຈົ້າໜ້າທີ່ຈັບໄດ້ໄລ່ທັນກໍ່ຈະຖືກຈັບຕົວມາດໍາເນີນຄະດີຕາມລະບຽບກົດໝາຍ ຢ່າງແນ່ນອນ.
ພາບ-ຂ່າວ: ປກສ ບໍລິຄຳໄຊ
