ສະຫະພາບເອີຣົບ ແລະ ສະຫະລັດອາເມຣິກາ ຢືນຢັນວ່າ ການຮົ່ວໄຫຼຂອງທໍ່ສົ່ງກາສທຳມະຊາດຂະໜາດໃຫຍ່ຈາກຣັດເຊຍສູ່ເອີຣົບ ແມ່ນເກີດຈາກການໂຈມຕີ ບໍ່ແມ່ນອຸບັດຕິເຫດ.

ສຳນັກຂ່າວ ABC Australia News ໄດ້ລາຍງານວ່າ ຄະນະກຳມະການເອີຣົບ (EC) ຢືນຢັນໃນວັນພຸດທີ 28 ກັນຍາ 2022 ວ່າ ການຮົ່ວໄຫຼເຖິງ 3 ຈຸດທີ່ທໍ່ສົ່ງກາສທຳມະຊາດ ນອດ ສະຕຣີມ 1 ແລະ 2 ເຊິ່ງກວດພົບເມື່ອຕົ້ນອາທິດແລ້ວນີ້ ໂດຍເກີດຈາກການໂຈມຕີ, ໂດຍ ນາງ ເອີຊູລາ ວອນແດເລເຢນ ປະທານ EC ກ່າວວ່າ ການຕັ້ງໃຈເພື່ອເຮັດໃຫ້ເກີດການຢຸດສະງັກ ຈະຕ້ອງປະເຊີນກັບການຕອບສະໜອງຢ່າງຮຸນແຮງທີ່ສຸດ.

ແອນໂທນີ ບລິງເຄນ ລັດຖະມົນຕີວ່າການກະຊວງຕ່າງປະເທດສະຫະລັດອາເມຣິກາ ເຊື່ອວ່າການຮົ່ວໄຫຼທີ່ເກີດຂຶ້ນບໍ່ໄດ້ສົ່ງຜົນກະທົບທາງດ້ານພະລັງງານ (energy resilience) ຂອງເອີຣົບ ເພາະຕອນນີ້ ທໍ່ທັ້ງ 2 ບໍ່ໄດ້ກຳລັງສົ່ງກາສທຳມະຊາດເຂົ້າສູ່ເອີຣົບ ເຖິງວ່າໃນທໍ່ຈະມີກາສຢູ່ກໍຕາມ.

ໜ່ວຍງານເດີນທະເລຂອງປະເທດສະວີເດນ ກໍໄດ້ອອກຄຳສັ່ງເຕືອນ ຍ້ອນການຮົ່ວໄຫຼຂອງກາສ ແລະ ປະເທດເດນມາກ ຕ້ອງໄດ້ຈຳກັດການເດີນເຮືອ ເນື່ອງຈາກກາສທີ່ຮົ່ວອອກມາໃຫ້ຜິວນ້ຳປັ່ນປ່ວນເປັນວົງກວ້າງເຖິງ 1 ກິໂລແມັດ ແລະ ບັງຄັບໃຊ້ເຂດຫ້າມບິນຂະໜາດນ້ອຍ.