ປັດຈຸບັນ, ການດື່ມສິ່ງມືນເມົາສາມາດພົບເຫັນໄດ້ຫຼາຍຂຶ້ນໃນສັງຄົມ. ນອກນັ້ນ, ຍັງມີການນຳເອົາສານເສບຕິດເຂົ້າມາປະສົມກັບເຄື່ອງດື່ມເພື່ອເພີ່ມປະສົມການໃໝ່ໆ ຈົນລືມນຶກເຖິງຜົນຮ້າຍຂອງມັນ.
ຈົນກາຍມາເປັນສິ່ງທີ່ໄວໜຸ່ມນິຍົມ ແລະ ຢາກລອງເວລາດື່ມສິ່ງມືນເມົາ, ເຮັດໃຫ້ສານເສບຕິດ ຫຼື ຢາອີ (MDMA) ທີ່ໃຊ້ໃນງານບັນເທີງ ກາຍມາເປັນຈຸດສົນໃຈຂອງສັງຄົມເພີ່ມຂື້ນ. ວັງມໍ່ໆມານີ້, ກໍໄດ້ເກີດເລື່ອງເສົ້າ, ເນື່ອງຈາກມີຄອບຄົວຜູ້ເຄາະຮ້າຍໜຶ່ງ, ໄດ້ໂພສທາງສື່ອອນລາຍ ເຖິງການເສຍຊີວິດຂອງຄົນໃນຄອບຄົວ 1 ຄົນ ແລະ ເພື່ອເຕືອນສັງຄົມເຖິງປະສົບການຂອງການສູນເສຍຄັ້ງນີ້. ລ
ອີງຕາມການຄົ້ນຄວ້າຂອງ British Journal of Pharmacology ໄດ້ເຮັດໃຫ້ຮູ້ວ່າ: ການບໍລິໂພກຄາເຟອີນ ຫຼື ກາເຟ ປະສົມກັບສານເສບຕິດປະເພດ ຢາອີ (MDMA) ທີ່ເປັນຢາກະຕຸ້ນປະສາດ ມັນສາມາດສ້າງຜົນຂ້າງຄຽງທີ່ຮ້າຍແຮງ ເຊິ່ງລວມເຖິງເຮັດໃຫ້ອຸນຫະພູມໃນຮ່າງກາຍມີການປ່ຽນແປງຜິດປົກກະຕິ, ຫົວໃຈເຕັ້ນຜິດປົກກະຕິ ແລະ ຊ໋ອກ.
ທ່ານ ພົນເອກ ວິໄລ ຫຼ້າຄຳຟອງ ຮອງນາຍົກ, ລັດຖະມົນຕີກະຊວງ ປກສ, ລັດຖະມົນຕີກະຊວງປ້ອງກັນຄວາມສະຫງົບ ກ່າວໃນກອງປະຊຸມສະພາແຫ່ງຊາດ ເມື່ອບໍ່ດົນມານີ້ວ່າ: ທາດໄນໂຕຣອັອກໄຊ (ແກສຢູ່ໃນປຸມເປົ້າ ທີ່ມັກໃຊ້ໃນສະຖານທີ່ບັນເທີງ) ແລະ ກາເຟທີ່ປະສົມຢາເສບຕິດຊະນິດຕ່າງໆ ແມ່ນເປັນທີ່ຮູ້ຈັກກັນດີໃນກຸ່ມຄົນມັກໄປສ້າງສັນ ຫຼື ໄປສະຖານທີ່ບັນເທີງໃນລາວ.
ດັ່ງນັ້ນ, ການປະຖົມພະຍາບານເບື້ອງຕົ້ນເມື່ອພົບຜູ້ປ່ວຍມີລັກຊະນະຊັອດ ຫຼື ເມົາ ເມື່ອກູ້ໄພຍັງເດີນທາງບໍ່ທັນຮອດສາຖານທີ່ເກີດເຫດ, ສະມາຄົມອາສາກູ້ໄພນະຄອນຫຼວງວຽງຈັນ1624 ໄດ້ໃຫ້ຄຳແນະນຳກ່ຽວກັບການປະຖົມພະຍາບານເບຶ້ອງຕົ້ນຄື:
- ເມື່ອຄົນເຈັບມີອາການຊັອກ, ໂຕເກັງ: ຕ້ອງໃຫ້ຄົນເຈັບນອນທ່າຕະແຄງ.
- ຖ້າເບິ່ງຄົນເຈັບວ່າມີອາການຫາຍໃຈຝືດ ຕ້ອງໄດ້ແກ້ກະດຸມໂສ້ງ-ເສື້ອ ຄົນເຈັບອອກ ເພື່ອຄົນເຈັບຈະບໍ່ຮູ້ສຶກອຶດອັດ ແລະ ສະບາຍໂຕຂຶ້ນ.
- ເມື່ອຄົນເຈັບມີ ຂີ້ກະເທີ່ ຫຼື ສິ່ງຂອງຢູ່ໃນປາກ, ລຳຄໍ, ຕ້ອງໃຊ້ນິ້ວກ້ອຍແຍ່ເຂ0າໃນປາກ ເພື່ອໃຫ້ຂີ້ກະເທີ່ອອກມາ ເພື່ອບໍ່ໃຫ້ມີຫຍັງໄປຕັນໃນຮູຄໍ.
- ເມື່ອຄົນເຈັບກັດກັດລີ້ນຕົນເອງ ຕ້ອງເອົາຜ້າຢັດໃສ່ປາກ ເພື່ອປ້ອງກັນບໍ່ໃຫ້ຄົນເຈັບກັດລີ້ນຕົນເອງ.
ທາງສະມາຄົມອາສາກູ້ໄພນະຄອນຫຼວງວຽງຈັນ1624 ຝາກເຖິງສັງຄົມ ຜ່ານທີມງານລາວໂພສ ວ່າ: ຕ້ອງມີສະຕິລິວັງໂຕ, ຫ້າມດື່ມສິ່ງມຶນເມົາເກີນຂອບເຂດ ແລະ ຫ້າມນຳໃຊ້ສານເສບຕິດຊະນິດຕ່າງໆ ທີ່ອາດກໍ່ຄວາມວຸ່ນວາຍຕໍ່ສັງຄົມ ຈົນໄປເຖິງໜ່ວຍງານຕ່າງໆ ແລະ ອາດເຮັດໃຫ້ເກີດອັນຕະລາຍຕໍ່ໂຕເຮົາເອງຈົນຮ້າຍແຮງເຖິງຂັ້ນເສຍຊີວິດ.