ອີງຕາມແຫຼ່ງຂ່າວ ແຂວງອຸດົມໄຊ ໃຫ້ຮູ້ວ່າ: ໃນວັນທີ 27 ສິງຫາ ຜ່ານມາ, ໄດ້ມີພິທີພົບປະລະຫວ່າງຜູ້ແທນຂັ້ນສູງ ອຸດົມໄຊ ສປປ ລາວ ແລະ ແຂວງຮ່ານາມ ແຫ່ງ ສສ ຫວຽດນາມ ຢູ່ຫ້ອງວ່າການແຂວງອຸດົມໄຊ ໂດຍມີ ສະຫາຍ ບຸນຄົງ ຫລ້າຈຽມພອນ ກຳມະການສຳຮອງສູນກາງພັກ, ເລຂາພັກແຂວງ, ເຈົ້າແຂວງອຸດົມໄຊ ແລະ ສະຫາຍ ນາງ ດິງ ທິຫລົວະ ຮອງເລຂາພັກແຂວງ, ຜູ້ປະຈຳການແຂວງຮານາມ ແຫ່ງ ສສ ຫວຽດ ນາມ ແລະ ຄະນະຜູ້ແທນຂັ້ນສູງທັງສອງຝ່າຍ ເຂົ້າຮ່ວມ.
ການພົບປະຄັ້ງນີ້, ສອງຝ່າຍ ໄດ້ປຶກສາຫາລືກ່ຽວກັບທິດທາງແຜນການ, ຄວາມເປັນໄປໄດ້ການຮ່ວມມືດ້ານການລົງທຶນ ຂອງນັກທຸລະກິດຂອງສອງແຂວງ ແລະ ການພົວພັນຮ່ວມມືດ້ານການບໍລິການແລກປ່ຽນສິນຄ້າ, ພ້ອມທັງເຫັນດີເປັນເອກະພາບກັນ ເພື່ອເປັນບ່ອນອີງໃຫ້ແກ່ບັນດາພະແນກການ, ຂະແໜງການ, ກົມກອງທີ່ກ່ຽວຂ້ອງຂອງສອງແຂວງ ນຳໄປຈັດຕັ້ງຜັນຂະຫຍາຍຕາມພາລະບົດບາດ, ສິດໜ້າທີ່ທີ່ໄດ້ຮັບມອບໝາຍ ໂດຍມອບໃຫ້ຂະແໜງຕ່າງປະເທດເປັນໃຈກາງປະສານງານ ແລກປ່ຽນເນື້ອໃນການຮ່ວມມືໃຫ້ເປັນປົກກະຕິ.
ສຳລັບ ວຽກງານທີ່ຈະໄດ້ພົວພັນຮ່ວມມືໃນ 5 ປີຕໍ່ໜ້າຕາມບົດບັນທຶກປະກອບມີ: ການແລກປ່ຽນບົດຮຽນຂອງຄະນະຜູ້ແທນຂັ້ນສູງ, ວຽກງານການລົງທຶນ, ວິທະຍາສາດເຕັກໂນໂລຊີ ແລະ ພັດທະນາຊັບພະຍາກອນມະນຸດ, ວຽກງານສຶກສາ ແລະ ກໍ່ສ້າງ ໂດຍມີເປົ້າໝາຍເພື່ອພັດທະນາສາຍພົວພັນມິດຕະພາບ ແລະ ການຮ່ວມມື ລະຫວ່າງສອງແຂວງ ບົນພື້ນຖານຕ່າງຝ່າຍຕ່າງໄດ້ຮັບຜົນປະໂຫຍດ ປະກອບສ່ວນເຂົ້າໃນການເພີ່ມພູນ, ພັດທະ ນາສາຍພົ່ວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຫວຽດນາມ-ລາວ ໃຫ້ໝັ້ນຄົງຂະໜົງແກ່ນ.
ແຫຼ່ງຂ່າວ: ຂປລ