ສະຫະລັດອາເມຣິກາໃຫ້ຄຳໝັ້ນສັນຍາວ່າຈະຊ່ວຍເຫຼືອວິສະຫະກິດຂະໜາດນ້ອຍ (SMEs) ໃນອາຊຽນໃຫ້ຟື້ນຟູຈາກຜົນກະທົບຂອງການລະບາດຂອງພະຍາດໂຄວີດ-19 ໂດຍເປັນສ່ວນໜຶ່ງຂອງການຊ່ວຍເຫຼືອພາຍໃຕ້ ສັນຍາວ່າດ້ວຍການຄ້າ ແລະ ການລົງທຶນ ລະຫວ່າງ ອາຊຽນ ແລະ ອາເມຣິກາ (TIFA-Trade and Investment Framework Agreement) ທີ່ລົງນາມໃນປີກາຍນີ້.
ໂດຍຄັ້ງທຳອິດໄດ້ລົງນາມຢູ່ທີ່ກົວລາລຳເປີ ປະເທດມາເລເຊຍ ໃນປີ 2006, ສັນຍາວ່າດ້ວຍການຄ້າ ແລະ ການລົງທຶນ ລະຫວ່າງ ອາຊຽນ-ອາເມຣິກາ (TIFA) ເປັນຂອບເຂດກຳນົດການຮ່ວມມືດ້ານເສດຖະກິດລະຫວ່າງສອງຝ່າຍ.
ຫົວໜ້າກົມເຈລະຈາການຄ້າລະຫວ່າງປະເທດຂອງໄທ (DTN) ກ່າວໃນອາທິດແລ້ວນີ້ວ່າ ວໍຊິງຕັນ ປະເທດອາເມຣິກາ ໄດ້ໃຫ້ຄຳໝັ້ນສັນຍາວ່າ ຈະໃຫ້ການຊ່ວຍເຫຼືອແກ່ ວິສະຫະກິດຂະໜາດນ້ອຍ (SMEs) ໃນອາຊຽນ ພາຍໃຕ້ຂໍ້ຕົກລົງສະບັບນີ້.
ນາງໄດ້ກ່າວໃນໜັງສືພິມ The Nation ຂອງປະເທດໄທວ່າ: ສໍາລັບປີ 2022-2023, ສະຫະລັດອາເມຣິກາ ໄດ້ສັນຍາວ່າຈະໃຫ້ການຊ່ວຍເຫຼືອທາງດ້ານວິຊາການແກ່ສະມາຊິກອາຊຽນ, ໂດຍສະເພາະແມ່ນທຸລະກິດອອນໄລ, ການຍົກລະດັບທັກສະແຮງງານ, ມາດຕະຖານສິ່ງແວດລ້ອມ ແລະ ໂຄງການອື່ນໆ ທີ່ອໍານວຍຄວາມສະດວກ ດ້ານການຄ້າລະຫວ່າງປະເທດ.
ທ່ານ ນາງ ອໍລະມົນ ຫົວໜ້າກົມເຈລະຈາການຄ້າລະຫວ່າງປະເທດໄທ ໄດ້ກ່າວວ່າ ການຊ່ວຍເຫຼືອໃນເທື່ອນີ້ ຈະມາໃນຮູບແບບການຍົກລະດັບຂອງ ສະຖາບັນສຶກສາວິສະຫະກິດຂະໜາດນ້ອຍໃນອາຊຽນ (ASEAN SME Academy).
ໂດຍສະຖາບັນນີ້ແມ່ນການເຝິກອົບຮົມຈາກ ວິສະຫະກິດຂະໜາດນ້ອຍ SMEs ສະໜອງໃຫ້ໂດຍບໍລິສັດ Fortune 500 ເຊັ່ນດຽວກັນກັບບໍລິສັດໃນພາກພື້ນ ແລະ ອົງການຈັດຕັ້ງສາກົນ. ຫຼັກສູດດັ່ງກ່າວເປັນສ່ວນໜຶ່ງຂອງໂຄງການທີ່ໃຫຍ່ ເພື່ອສະໜອງການເຝິກອົບຮົມ ແລະ ການໃຫ້ຄຳປຶກສາ ເພື່ອເສີມຂະຫຍາຍການເຂົ້າເຖິງຜະລິດຕະພັນດ້ານການເງິນຂອງ ວິສະຫະກິດຂະໜາດນ້ອຍໃນອາຊຽນ, ໃນຕະຫຼາດພາກພື້ນ ແລະ ສາກົນ, ການບໍລິການຂໍ້ມູນຂ່າວສານ ແລະ ໃຫ້ຄຳປຶກສາ, ແລະ ເຕັກໂນໂລຊີໃໝ່ໆ.
ອີງຕາມ ທ່ານ ນາງ ອໍລະມົນ ໄດ້ກ່າວວ່າ ສັນຍາວ່າດ້ວຍການຄ້າ ແລະ ການລົງທຶນ ລະຫວ່າງ ອາຊຽນ-ອາເມຣິກາ (TIFA) ຍັງມີຄຳໝັ້ນສັນຍາຈາກຝ່າຍອາຊຽນເຊັ່ນດຽວກັນ, ໃນນັ້ນມີການຊຸກຍູ້ສົ່ງເສີມ ເຄືອຂ່າຍຂະບວນການພາສີທີ່ໃຫ້ບໍລິການຜ່ານລະບົບເອເລັກໂຕຣນິກ (e-customs) ເຊື່ອມຕໍ່ກັບ ເຄືອຂ່າຍສະຫະລັດອາເມລິກາ ເພື່ອການດຳເນີນງານດ້ານພາສີລະຫວ່າງປະເທດໃຫ້ມີປະສິດທິຜົນ.
ແຫຼ່ງຂາ່ວຈາກ The Star