ສັດຕະວະແພດ ດ່ານສາກົນ ແດນສະຫວັນ ຮ່ວມກັບຫຼາຍພາກສ່ວນຢຶດຊີ້ນໝູທີ່ນໍາເຂົ້າບໍ່ຖືກຕ້ອງຈໍານວນ 9.724 ກິໂລ ພ້ອມທໍາລາຍຊີ້ນສ່ວນສັດດັ່ງກ່າວ.
ທ່ານ ກົງສັກດາ ອິນທະພູທອນ ຫົວໜ້າໜ່ວຍງານກວດກາ ສັດຕະວະແພດ ປະຈໍາດ່ານສາກົນແດນສະຫວັນໃຫ້ສໍາພາດຕໍ່ຜູ້ສື່ຂ່າວວ່າ: ໂດຍປະຕິບັດຕາມຄໍາສັ່ງຂອງກະຊວງກະສີກໍາ-ປ່າໄມ້ ເລກທີ0160/ກປ ລົງວັນທີ 19/1/22 ວ່າດ້ວຍການໂຈະ, ການອະນຸຍາດນໍາເຂົ້າ, ສົ່ງຜ່ານໝູມີຊິວິດ ແລະ ຜະລິດຕະພັນໝູ ຈາກປະເທດທີ່ມີການລະບາດຂອງເຊື້ອພະຍາດອະຫິວາໝູ ອາຟຮິກາ, ເຊິ່ງໃນຕອນເຊົ້າວັນທີ 7 ກໍລະກົດ 2022 ທີ່ຜ່ານມານີ້ ໄດ້ກວດຢຶດ ຊີ້ນໝູແຊ່ແຂງ ທີ່ນໍາເຂົ້າຈາກປະເທດຫວຽດນາມ, ເຊິ່ງຕົ້ນກໍາເນີດຂອງສິນຄ້າ ແມ່ນຈາກປະເທດ ເບຼຊິນ ໂດຍຢືດໄດ້ຈາກລົດ ໝາຍເລກ 74C.098.28(ລົດແກ່ຫີນກາວ) ເຊິ່ງມີເປົ້າໝາຍ ຈໍາໝ່າຍຢູ່ຕະຫຼາດນະຄອນໄກສອນ ພົມວິຫານ ແຂວງສະຫວັນນະເຂດ ທີ່ໄດ້ຊຸກເຊື່ອງໄວ້ໃນລົດດັ່ງກ່າວ ເປັນຊີ້ນໝູທີ່ບໍ່ໄດ້ມາດຕະຖານຈໍານວນ 442 ແກັດ ເທົ່າກັບ 9.724 ກິໂລ,ດັ່ງນັ້ນໃນວັນທີ 9 ກໍລະກົດ 2022 ນີ້, ຢູ່ບ້ານແດນສະຫວັນ ກໍ່ໄດ້ຈັດພິທີທໍາລາຍຊີ້ນສ່ວນສັດດັ່ງກ່າວ ດ້ວຍວິທີຂຸດຂຸມຝັງເລີກປະມານ 2 ແມັດ, ໂຮຍປູນຂາວ, ສີດຢາຂ້າເຊື້ອ, ຖົມດິນຢຽບໃຫ້ແໜ້ນ.
ເຈົ້າໜ້າທີ່ກ່ຽວຂ້ອງ ເຊິ່ງມີ ຄະນະໜ່ວຍງານກວດກາສັດຕະວະແພດດ່ານສາກົນແດນສະຫວັນ, ຕໍາຫຼວດ, ພາສີ, ອາຫານ ແລະ ຢາ ພ້ອມຄະນະປົກຄອງບ້ານແດນສະຫວັນເຂົ້າຮ່ວມ, ທັງນີ້ກໍ່ເພື່ອເປັນການຕ້ານ ແລະ ສະກັດກັ້ນ ສິນຄ້າທີ່ຫວງຫ້າມ ແລະ ນໍາເຂົ້າບໍ່ຖືກຕ້ອງໃຫ້ຖືກຕາມລະບຽບກົດໝາຍ, ທັງເປັນການປົກປ້ອງຜູ້ຜະລິດພາຍໃນ ເຊິ່ງຕົວຈິງບັນດາຟາມລ້ຽງໝູພາຍໃນແຂວງ ກໍ່ເຫັນວ່າມີຄວາມສາມາດຕອບສະໜອງພາຍໃນໄດ້ ອີກດ້ານໜຶ່ງກໍ່ເປັນການສະກັດກັ້ນບໍ່ໃຫ້ມີການແຜ່ລະບາດ ຂອງເຊື້ອພະຍາດ ທີ່ອາດຈະເກີດຂຶ້ນ.
ແຫຼ່ງຂ່າວຈາກ MediaLaos