ວັນ 5 ມີຖຸນາ 2022 ຜ່ານມາ, ສະຫາຍ ພັນເອກ ຂ໋ອດ ວັນຕຽນ ຫົວໜ້າການທະຫານກອງປ້ອງກັນຊາຍແດນ 433 ແຂວງດຽນບຽນ ສສ ຫວຽດນາມ ພ້ອມດ້ວຍຄະນະ ໄດ້ນຳເອົາຊີເມັນ 15 ໂຕນ ແລະ ຈັກຕັດຫຍ້າ 1 ເຄື່ອງ, ລວມມູນຄ່າ 25.000.000 ດົງ, ມອບໃຫ້ກອງຮ້ອຍ 161 ທະຫານຊາຍແດນແຂວງຫຼວງພະບາງ.
ເພື່ອປະກອບສ່ວນຊຸກຍູ້ເຂົ້າໃນການປັບປຸງກໍ່ສ້າງພື້ນຖານໂຄງລ່າງ ແລະ ປະກອບສ່ວນເຂົ້າໃນພາລະກິດປົກປັກຮັກສາ ຕາມຂອບເຂດຊາຍແດນລະຫວ່າງລາວ – ຫວຽດນາມ, ຖານກົມກອງເພື່ອນມິດສະຫາຍໃກ້ຄຽງ, ທັງເປັນການເສີມຂະຫຍາຍມູນເຊື້ອອັນດີງາມທີ່ເຄີຍມີມາແຕ່ດົນນານ, ໂດຍແມ່ນ ສະຫາຍ ຮ້ອຍໂທ ອ່ອນສີ ເນືອງພະຈັນ ຫົວໜ້າການທະຫານກອງຮ້ອຍ 161 ທະຫານແຂວງຫຼວງພະບາງ ຕາງໜ້າຄະນະກ່າວຮັບ ພ້ອມທັງກ່າວສະແດງຄວາມຂອບໃຈ ແລະຕີຄວາມໝາຍສູງຕໍ່ຄະນະພັກ – ຄະນະບັນຊາກອງປ້ອງກັນຊາຍແດນ 433 ແຂວງດຽນບຽນ ສສ ຫວຽດນາມທີ່ຍາມໃດກໍໄດ້ໃຫ້ຄວາມເປັນຫ່ວງເປັນໄຍ່ ແລະ ເຫັນໄດ້ຄວາມຫຍຸ້ງຍາກຈໍາເປັນໃນການເຄື່ອນໄຫວປະຕິບັດໜ້າທີ່ການເມືອງຂອງກົມກອງ, ນີ້ກໍເປັນການເພີ່ມພູນຄຸນສ້າງ ແລະຫັດແໜ້ນຄວາມສາມັກຄີໄມຕີຈິດມິດຕະພາບລະຫວ່າງສອງພັກສອງລັດ, ເວົ້າສະເພາະແມ່ນຄວາມສໍາພັນລະຫວ່າງກອງປ້ອງກັນຊາຍແດນ 433 ທະຫານແຂວງດຽນບຽນ ກັບກອງຮ້ອຍປ້ອງກັນຊາຍແດນ 161 ທະຫານແຂວງຫຼວງພະບາງ ໃຫ້ແໜ້ນແຟ້ນ ແລະສວຍສົດງົດງາມຕະຫຼອດໄປ.
ພ້ອມດຽວກັນນີ້ ກໍເປັນການປະກອບສ່ວນສ້າງຜົນງານຮ່ວມກັນຂໍ່ານັບຮັບຕ້ອນວັນສົນທິສັນຍາຮ່ວມມືລາວ – ຫວຽດນາມ ຄົບຮອບ 45 ປີຄື: 18 ກໍລະກົດ 1977 ແລະ ວັນສາຍພົວພັນການທູດລາວ – ຫວຽດນາມ 5 ກັນຍາ 1962 ຄົບຮອບ 60 ປີ ທີ່ໃກ້ຈະມາເຖິງໃນມໍໆນີ້ ໃຫ້ມີບັນຍາກາດເບີກບານມວນຊື່ນ ແລະ ມີຄວາມໝາຍສໍາຄັນຢ່າງເລິກເຊິ່ງ.
ຂ່າວ: ເກດແກ້ວ ໄຊທະພອນ; ຮຽບຮຽງ: ສົມພອນ ສຸວັນທອນ.