ໃນວັນທີ 9 ມິຖຸນາ ສຳນັກຂ່າວຣອຍເຕີ ໄດ້ລາຍງານວ່າ: ເກີດເຫດໄຟໄໝ້ຮຸນແຮງ ໃນເຂດພູເຂົາທາງໃຕ້ຂອງ ແອັດສະປາຍ ສົ່ງຜົນໃຫ້ ແອັດສະປາຍ ຕ້ອງອົບພະຍົບປະຊາຊົນທັ້ງເມືອງ ເພື່ອຄວາມປອດໄພ.

ໂດຍຕົ້ນເຫດຂອງໄຟປ່າໃນເທື່ອນີ້ ມາຈາກເຂດພູເຂົາເມືອງເບນາຮາວິສ ໃກ້ກັບເມືອງມາລາກາ ເຊິ່ງເປັນໜຶ່ງໃນເມືອງເກົ່າແກ່ທີ່ສຸດໃນໂລກ ທີ່ຢູ່ທາງໃຕ້ຂອງ ແອັດສະປາຍ ແລະ ກ່ອນທີ່ໄຟຈະລາມໄປຢ່າງຮຸນແຮງ ຈົນປ່ອຍຄວັນດຳປົກຄຸມໄປທົ່ວບໍລິເວນໃນຫຼາຍກິໂລແມັດ, ສົ່ງຜົນໃຫ້ທາງການຕ້ອງສັ່ງອົບພະຍົບປະຊາຊົນ ອອກຈາກເມືອງຈຳນວນຫຼາຍກວ່າ 9 ພັນຄົນ ທີ່ຢູ່ພາຍໃນພື້ນທີ່ສ່ຽງອອກນອກເມືອງຢ່າງບໍ່ມີກຳນົດ.

ປັດຈຸບັນ ມີລາຍງານຈາກເຈົ້າໜ້າທີ່ດັບເພີງໄດ້ຮັບບາດເຈັບ 3 ຄົນ ຂະນະທີ່ທາງ ແອັດສະປາຍ ໄດ້ລະດົມກະລັງເຈົ້າໜ້າທີ່ດັບເພີງ 140 ຄົນ ພ້ອມກຳລັງເຮືອບິນດັບເພີງ 15 ລຳ ແລະ ໜ່ວຍທະຫານສະເພາະກິດ 1 ຊຸດ ເລັ່ງດັບໄຟປ່າໝົດຄືນທີ່ຜ່ານມານີ້ ຂະນະທີ່ເຈົ້າໜ້າທີ່ຍັງເປີດເຜີຍວ່າ ຈາກກຳລັງແຮງລົມປະມານ 40 ກິໂລແມັດຕໍ່ຊົ່ວໂມງ ເຮັດໃຫ້ໄຟປ່າລາມໄປສະເລ່ຍເຖິງ ນາທີລະ 30 ແມັດ.