ເຈົ້າໜ້າທີ່ ປກສ ເມືອງທ່າແຂກ ແຂວງຄຳມ່ວນ ໃຫ້ຮູ້ວ່າ: ນາງ ນ້ອຍ ອາຍຸ 26 ປີ (ລຸກໃພ້ ) ຢູ່ບ້ານຊົງ ເມືອງນາກາຍ ແຂວງຄຳມ່ວນ ວາງແຜນຄາດຕະກຳ ນາງ ສັງວານ ຫຼື ນາງ ວັນ ອາຍຸ 50 ປີ ( ແມ່ຍ່າ ) ຢູ່ບ້ານປາກດົງ ເມືອງທ່າແຂກ, ເນື່ອງຈາກຄິດວ່າແມ່ຍ່າ ( ນາງ ວັນ ) ຮູ້ເຫັນລູກຊາຍ ຫນີງານແຕ່ງດອງ.
ຜ່ານການສືບສວນຂອງເຈົ້າໜ້າທີ່ຈຶ່ງໄດ້ຮູ້ວ່າ: ໃນເວລາ 18:00 ໂມງ ຂອງ ວັນ 10 ກຸມພາ 2022 ນາງນ້ອຍ ໄດ້ໂທລະສັບຫານາງ ສັງວານ ຫຼື ວັນ ຜູ້ເປັນແມ່ຂອງ ທ້າວ ແປບຊີ້ ແລ້ວຖາມວ່າ ທ້າວ ແປບຊີ້ ໄປໃສແທ້ ຄືບໍ່ເວົ້າກັນກ່ອນເພາະທັງສອງກຳລັງຈະແຕ່ງດອງກັນ ແລ້ວ ຖ້າໃກ້ຈະຮອດມື້ແຕ່ງ ຝ່າຍຊາຍຫນີຈາກງານແຕ່ງແບບນີ້ ຜູ້ເປັນຝ່າຍຍິງ ຄິດວ່າແມ່ຮູ້ເຫັນ ຈິ່ງມີຄວາມແຄ້ນ ໃຫ້ຜູ້ເປັນແມ່ຂອງຝ່າຍຊາຍ.
ນາງນ້ອຍຍັງໄດ້ເວົ້າກັບນາງສັງວານຕໍ່ອີກວ່າ: ບາດຮອດຍາມກິນດອງແທ້ ຊິເຮັດແນວໃດ? ພວກເຈົ້າຄືມາເວົ້າສະບາຍແທ້ຢ້ານເສຍເງິນບໍ, ພາຍຫຼັງວາງໂທລະສັບແລ້ວນາງ ນ້ອຍ ຈື່ງມີແນວຄິດຢາກຮ້າຍ ໃສ່ນາງ ວັນ ຄິດວ່ານາງ ວັນ ບອກໃຫ້ ທ້າວ ແປບຊີ້ ໜີຈາກຜູ້ກ່ຽວ ຈຶ່ງໄດ້ຈັບເອົາມີດເໜັບເຊື່ອງໃສ່ແອວພ້ອມກັບເສື້ອຍືດແຂນສັ້ນສີດຳຂອງຜູ້ກ່ຽວແລ້ວຍ່າງໄປຕາມທາງມຸ້ງໜ້າໄປເຮືອນຂອງນາງ ວັນ ຢູ່ບ້ານປາກດົງ ເມືອງທ່າແຂກ ແຂວງຄຳມ່ວນ.
ຕໍ່ມາໃນເວລາ 23:00 ໂມງຂອງວັນດຽວກັນ ນາງ ນ້ອຍ ແມ່ນໄດ້ຍ່າງໄປຮອດເຮືອນ ຂອງນາງ ວັນ ແລ້ວໄປລີ້ຢູ່ແຈເຮືອນ ແລະ ເອົາເສື້ອປິດບັງໃບໜ້າ ຈາກນັ້ນ ໃຊ້ມິດທີ່ງັດປະຕູ ກຽມມານັ້ນເຂົ້າໄປລີ້ຢູ່ໃນເຮືອນໄດ້ປະມານ 30 ນາທີ ທ້າວ ດາວອນ ຜົວຂອງນາງ ວັນ ລຸກມາ ເຂົ້າຫ້ອງນ້ຳ ເຫັນປະຕູເຮືອນຖືກງັດ ຈຶ່ງໄດ້ປຸກຜູູ້ເປັນເມຍລຸກຂຶ້ນມາເບິ່ງ ແລ້ວໄດ້ພາກັນກວດກາເບິ່ງເຄື່ອງເຮືອນເຫັນວ່າບໍ່ມີຫຍັງເສຍຫາຍຈຶ່ງກັບນອນຄືນ.
ຈົນຕົກມາຮອດເວລາ 03 ໂມງເຊົ້າຂອງວັນທີ່ 11 ກຸມພາ 2022, ນາງ ນ້ອຍ ຈຶ່ງໄດ້ຕັດສິນໃຈເປີດມຸ້ງເຂົ້າໄປແລ້ວໃຊ້ມີດທີ່ກຽມມາພ້ອມພັນໃສ່ຫົວຂອງ ນາງ ສັງວານ ຈຳນວນ ຫຼາຍ ບາດເພື່ອຫວັງເອົາຊີວິດ ແຕ່ ທ້າວ ດາວອນ (ຜູ້ເປັນຜົວ)ຂອງ ນາງ ສັງວານ ແມ່ນໄດ້ລຸກຂື້້ນມາຍາດເອົາມີດນຳ ນາງ ນ້ອຍຈຶ່ງໄດ້ໃຊ້ມີດພັນໃສ່ຫົວຂອງທ້າວ ດາວອນ 1 ບາດ ແລະ ແຂ່ງເບື້ອງຊາຍອີກ 1 ບາດ. ຈາກນັ້ນ ທ້າວ ດາວອນ ຈຶ່ງຮ້ອງຂໍຄວາມຊ່ວຍເຫຼືອຈາກປະຊາຊົນທີ່ຢູ່ ບໍລິເວນໃກ້ຄຽງ ແລະ ນາງ ສັງວານໄດ້ໃຊ້ມືດືງເສື້ອ ທີ່ ປົກປິດໜ້າອອກຈຶ່ງເຮັດໃຫ້ ນາງ ນ້ອຍ ເກີດມີຄວາມຕົກໃຈໄດ້ແລ່ນ ອອກໄປ ທາງປ່າຫັຼງເຮືອນພ້ອມທັ້ງໂຍນມິດທີ່ໃຊ້ກໍ່ເຫດຖິ້ມແລ້ວເອົາຕົວຫຼົບໜີ.
ມາຮອດເວລາ 6 ໂມງຂອງວັນດຽວກັນທາງເຈົ້າໜ້າ ປກສ ບໍລິການປະຊາຊົນກຸ່ມຈອມແຈ້ງ ຈຶ່ງຈັບຕົວ ນາງ ນ້ອຍ ຜູ້ກະທຳຜິດໄດ້ ແລ້ວນຳສົ່ງເຈົ້າໜ້າທີ່ ພະແນກຕຳຫຼວດ ປກສ ເມືອງທ່າແຂກດຳເນີນຄະດີຕາມລະບຽບກົດໝາຍ.
ພາຍຫຼັງສອບສວນສຳເລັດ, ມາຮອດວັນທີ 6 ເມສາ 2022 ເຈົ້າໜ້າທີ່ຈິ່ງໄດ້ນຳຕົວຜູ້ກ່ຽວມາທົດສະກຳເຫດການຄືນໃຫມ່ເພື່ອປະກອບຄຳຮັບສາລະພາບ ແລະ ສະຫຼຸບສຳນວນຄະດີສົ່ງໄອອະການຟ້ອງສານຕັດສິນຕາມກົດໝາຍ