ຣັດເຊຍແຕ່ງຕັ້ງນາຍພົນທີ່ມີປະຫວັດສາດຂອງຄວາມໂຫດຮ້າຍຕໍ່ພົນລະເຮືອນໃນສົງຄາມ ຊີເຣຍ (Syrian) ກາຍເປັນຜູ້ບັນຊາການສົງຄາມຢູເຄຣນຄົນໃໝ່.
ເຈົ້າໜ້າທີ່ປ້ອງກັນປະເທດຂັ້ນສູງຂອງອາເມລິກາລາຍງານວ່າ: ຣັດເຊຍໄດ້ແຕ່ງຕັ້ງຜູ້ບັນຊາການປະຕິບັດການພິເສດທາງທະຫານໃນຢູເຄຣນຄົນໃໝ່ ຫຼັງຈາກຢູເຄຣນຄາດວ່າຣັດເຊຍຈະປັບຍຸດທະສາດເນັ້ນໂຈມຕີຢູ່ເຂດ ດອນບາສ (Donbas) ຫຼືຫຼາຍກວ່າພາກຕາເວັນອອກຂອງຢູເຄຣນ.
ຜູ້ບັນຊາການຄົນໃໝ່ແມ່ນ ທ່ານ ອາເລັກຊານເດີ ດໍວໍນິຄອຟ (Alexander Dwarnikov) ເຈົ້າໜ້າທີ່ທາງທະຫານລະດັບສູງ ແລະ ມີປະສົບການຫຼາຍໃນໄວອາຍຸ 60 ປີ ເຄີຍມີຜົນງານດີເດັ່ນໃນສົງຄາມຊີເຣຍ ແຕ່ໃນຂະນະດຽວກັນກໍຍັງມີປະຫວັດຄວາມໂຫດຮ້າຍຕໍ່ພົນລະເຮືອນຢູ່ໃນຊີເຣຍ.
ດໍວໍນິຄອຟ ໄດ້ເລີ່ມຕົ້ນການເຮັດວຽກທາງທະຫານໃນປີ 1982 ໃນຖານະຜູ້ນໍາກອງພົນແລະ ໄຕ່ເຕົ້າຊຶ້ນມາເລື້ອຍໆ ເຊິ່ງມີສ່ວນຮ່ວມໃນສົງຄາມ Chechen ຄັ້ງທີສອງຊ່ວງປີ 1999-2009 ແລະ ມີຊື່ສຽງສໍາລັບການນໍາພາກອງທັບຣັດເຊຍໃນໃນສົງຄາມຊີເຣຍປີ 2015.
ໃນສົງຄາມຊີເຣຍ ພາຍໃຕ້ຄໍາສັ່ງຂອງ ດໍວໍນິຄອຟ ກອງທັບຣັດເຊຍໃນຊີເຣຍເປັນທີ່ຮູ້ຈັກໃນການປາບປາມຜູ້ເຫັນຕ່າງຈາກຣັດເຊຍ ໂດຍຣັດເຊຍຈະທຳລາຍເມືອງ ໂຈມຕີດ້ວຍປືນໃຫຍ່ ແລະ ຖິ້ມລະເບີດ ເຮັດໃຫ້ພົນລະເຮືອນຊີເຣຍຫຼາຍລ້ານຄົນໄດ້ອົບພະຍົບໜີ ສະຫະປະຊາຊາດກ່າວວ່າ: ສົງຄາມໃນຊີເຣຍທີ່ແກ່ຍາວມາເປັນທົດສະວັດໄດ້ສັງຫານປະຊາຊົນຫລາຍກວ່າ 350,000 ຄົນ.
ການຕັດສິນໃຈຂອງຣັດເຊຍທີ່ຈະແຕ່ງຕັ້ງຜູ້ນຳທະຫານຄົນໃໝ່ມີຂຶ້ນໃນຂະນະທີ່ຣັດເຊຍປັບຍຸດທະສາດຂອງຕົນ. ໄດ້ສຸມໃສ່ບຸກໂຈມຕີ ແລະ ຂະຫຍາຍເຂດຄວບຄຸມໂດຍລັດເຊຍ ຢູ່ພາກຕາເວັນອອກ ແລະ ພາກໃຕ້ ຂອງຢູເຄຣນ ລວມທັງພາກພື້ນ ດອນບາສ Donbas ຫຼັງຈາກການໂຈມຕີນະຄອນຫຼວງ Kiev ທາງພາກເໜືອຂອງຢູເຄຣນບໍ່ປະສົບຄວາມສຳເລັດ.