ອີງຕາມການລາຍງານຈາກເວັບໄຊ້ຂ່າວ MGR Online ໄດ້ລາຍງານກ່ຽວກັບຍອດຜູ້ເສຍຊີວິດຈາກອຸບັດຕິເຫດເຮືອທ່ອງທ່ຽວຫຼົ້ມຢູ່ເຂດນອກຊາຍຝັ່ງທາງພາກກາງຂອງຫວຽດນາມເມື່ອວັນທີ 26 ທີ່ຜ່ານມາ ເພີ່ມຂຶ້ນເປັນ 15 ຄົນຫຼັງພົບເພີ່ມອີກ 2 ສົບເມື່ອວັນທີ 27 ຕາມການລະບຸຂອງເຈົ້າໜ້າທີ່ເມືອງຮອຍອັນ ແຂວງກວ່າງນາມ.

ເຫດການໃນຄັ້ງນີ້ເຮືອໄວຂອງ ເຟືອງດົ່ງ ມີນັກທ່ອງທ່ຽວ 36 ຄົນ ແລະ ລູກເຮືອ 3 ຄົນຢູ່ເທິງເຮືອ ​ໄດ້​ເດີນທາງ​ອອກຈາກ​ເກາະ​ຈາມ​ກັບ​ຄືນ​ສູ່​ຝັ່ງ ແລະ​ໄດ້​ຖືກ​ຄື້ນ​ຟອງ​ໃຫຍ່​ພັດ​ໄປ​ຢູ່​ຫ່າງ​ຈາກ​ຫາດ​ຊາຍ 3 ກິ​ໂລ​ແມັດ.

ເຈົ້າ​ໜ້າ​ທີ່​ໄດ້​​ຢືນ​ຢັນສຳຫຼັບເຮືອລຳດັ່ງກ່າວ​ບໍ່ໄດ້ບັນທຸກຜູ້ໂດຍສານເກີນຈຳນວນທີ່ກຳໜົດ ເຊິ່ງຜູ້​ເຄາະ​ຮ້າຍ 15 ຄົນ​ແມ່ນ​ນັກ​ທ່ອງ​ທ່ຽວ​ທີ່​ມາ​ຈາກ​ນະຄອນ​ໂຮ່ຈິ​ມິນ ​ແລະ ຮ່າ​ໂນ້ຍ, ຈາກທັງໝົດ 34 ຄົນ​ທີ່​ຖືກ​ພາ​ຂຶ້ນ​ຝັ່ງຍັງມີອີກ 5 ຄົນທີ່ຍັງບໍ່ພົບຈົນຮອດວັນທີ 27 ໄດ້ພົບເຫັນສົບອີກ 2 ຄົນເປັນ​ຜູ້ຍິງ​ອາຍຸ 24 ປີ ແລະ​ເດັກ​ຊາຍ​ອາຍຸ 12 ປີ, ເຊິ່ງທັງ​ສອງ​ຄົນ​ຈະ​ໄດ້​ມອບ​ໃຫ້​ຄອບຄົວ​ໃນ​ໄວໆ​ນີ້.

ເຂດ​ທະ​ເລ​ຈາກ ​ແຂວງບິ່ງດິງ ທາງ​ພາກ​​ກາງຕອນໃຕ້​ໄປ​ຮອດ ​ແຂວງກ່າເມົາ ທາງ​ພາກ​ໃຕ້​ໄດ້​ມີ​ລົມ​ແຮງ​ມາ​ເປັນ​ເວລາ 1 ອາທິດ​ແລ້ວ, ​ໃນ​ຂະນະ​ທີ່ເກາະຈາມ ຫ່າງ​ຈາກ​ທ່າ​ເຮືອຮອຍອັນປະມານ 18 ກິ​ໂລ​ແມັດ, ​ແມ່ນ​ສະຖານ​ທີ່​ທ່ອງ​ທ່ຽວ​ທີ່​ນິຍົມເຊິ່ງໃຊ້ເວລາໃນການເດີນທາງດ້ວຍເຮືອຈັກປະມານ 15 ນາທີຈາກຝັ່ງໄປຫາເກາະ.