spot_img
Homeຂ່າວພາຍ​ໃນພິທີເປີດນຳໃຊ້ເສັ້ນທາງລົດໄຟຈີນ-ລາວ ຢ່າງເປັນທາງການ

ພິທີເປີດນຳໃຊ້ເສັ້ນທາງລົດໄຟຈີນ-ລາວ ຢ່າງເປັນທາງການ

Published on

ພິທີເປີດນຳໃຊ້ເສັ້ນທາງລົດໄຟຈີນ-ລາວ ໂດຍໃຫ້ກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ແລະ ທ່ານ ສີຈິ້ນຜິງ.

ໃນຕອນບ່າຍຂອງວັນທີ 3 ທັນວານີ້, ນະຄອນຫຼວງວຽງຈັນ ໄດ້ມີພິທີເປີດນໍາໃຊ້ທາງລົດໄຟ ລາວ-ຈີນ ຢ່າງເປັນທາງການຢ່າງເປັນທາງການ, ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດລາວ ແລະ ທານ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ ໄດ້ໃຫ້ກຽດເຂົ້າຮ່ວມພິທີເປີດນຳໃຊ້ເສັ້ນທາງລົດໄຟຈີນ-ລາວ ໂດຍຜ່ານຮູບແບບທາງໄກ ໂດຍມີການນຳຂັ້ນສູງ, ອະດີດການນຳຂັ້ນສູນ ຂອງສອງປະເທດເຂົ້າຮ່ວມ ແລະ ຍັງມີບັນ ດາທຸຕານຸທູດ, ບັນດາຜູ້ຕາງໜ້າອົງການຈັດຕັ້ງສາກົນເຂົ້າຮ່ວມ.

ພິທີດັ່ງກ່າວ ໄດ້ຈັດຂຶ້ນໃນຮູບແບບອອນລາຍ ທີ່ຫໍປະຊຸມແຫ່ງຊາດລາວ, ສະຖານີລົດໄຟນະຄອນຫລວງວຽງຈັນ ແລະ ທີ່ ສປ ຈີນ ເຊິ່ງໃນພິທີ ທ່ານ ເຫີ ລີ ເຟິ່ງ ປະທານກຸ່ມບໍລິສັດທາງລົດໄຟ ສປ ຈີນ ແລະ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີ ກະຊວງແຜນການ ແລະ ການລົງທຶນ ຜູ້ຊີ້ນຳການກໍ່ສ້າງທາງລົດໄຟ ລາວ-ຈີນ ຂອງຝ່າຍລາວ ໄດ້ພັດປ່ຽນກັນລາຍງານສະພາບການກະກຽມເປີດທາງລົດໄຟ. ຈາກນັ້ນ, ຜູ້ເຂົ້າຮ່ວມ ກໍໄດ້ພ້ອມກັນຮັບຊົມວິດີໂອ ກ່ຽວກັບທາງລົດໄຟ ລາວ-ຈີນ.

ໂອກາດທີ່ມີຄວາມໝາຍສຳຄັນນີ້, ທ່ານ ທອງລຸນ ສີສຸລິດ ໄດ້ຂຶ້ນກ່າວຄຳປາໄສ ໂດຍມີບາງຕອນສຳຄັນວ່າ: ພິທີເປີດນຳໃຊ້ເສັ້ນທາງລົດໄຟ ລາວ-ຈີນ ເປັນພິທີ ທີ່ມີຄວາມໝາຍສຳຄັນທາງປະຫວັດສາດ ທີ່ເປັນການເປີດສັກກະລາດໃໝ່ ແຫ່ງການພັດທະນາພື້ນຖານໂຄ່ງລ່າງ ທີ່ທັນສະໄໝຂອງ ສປປ ລາວ ເປັນຄວາມເອກອ້າງທະນົງໃຈ ທີ່ເຮັດໃຫ້ຄວາມຝັນ, ຄວາມຄ່ອງຄ່ອຍຂອງປະຊາຊົນລາວ ປະກົດຜົນເປັນຈິງ, ສຳຄັນອີກອັນໜຶ່ງໂຄງການນີ້, ຍັງເປັນສັນຍາລັກທາງປະຫວັດສາດທີ່ສຳຄັນ ໃຫ້ແກ່ສາຍພົວພັນລະ ຫວ່າງ ສອງພັກ ສອງລັດ ແລະ ປະຊາຊົນສອງຊາດ ລາວ-ຈີນ, ສປປ ລາວ ໃຫ້ການສະໜັບສະໜູນຢ່າງສະເໝີຕົ້ນສະເໝີປາຍ.

ທ່ານປະທານປະເທດຍັງກ່າວຕື່ມວ່າ: ໂຄງການລົດໄຟລາວ-ຈີນ ເປັນຂອງຂວັນອັນລໍ້າຄ່າໃຫ້ແກ່ປະຊາຊົນລາວ ໃນໂອກາດສະເຫຼີມສະຫຼອງວັນສະຖາປະການ ສປປ ລາວ ຄົບຮອບ 46 ປີ ປະກອບສ່ວນເຂົ້າໃນການສະເຫຼີມສະຫຼອງຄົບຮອບ 60 ປີ ຂອງການສ້າງຕັ້ງສາຍພົວພັນການທູດລາວ-ຈີນ ຢ່າງມີຄວາມໝາຍເລິກເຊິ່ງ ໝາກຜົນຄວາມສຳເລັດນີ້ລ້ວນແຕ່ສະແດງເຫັນຈິດໃຈການເປັນຄູ່ຮ່ວມມືຍຸດທະສາດໝັ່ນຄົງຍາວນານທິດ 4 ດີ ໄດ້ເປັນສັນຍາລັກສຳຄັນໃນຂະບວນການສ້າງຄູ່ຮ່ວມສະຕາກຳລາວ-ຈີນ, ຈີນ-ລາວ.

ພ້ອມນີ້, ທ່ານ ສີຈິ້ນຜິງ ກໍໄດ້ກ່າວປາໄສ ໂດຍມີບາງຕອນວ່າ: ໃນປີ 2015, ຈີນ-ລາວ ໄດ້ບັນລຸຂໍ້ຕົກລົງອັນຍິ່ງໃຫຍ່ດ້ານການຮ່ວມມື ກໍ່ສ້າງເສັ້ນທາງລົດໄຟ ຈີນ-ລາວ, ເຊິ່ງ 5 ປີມານີ້, ສອງຝ່າຍໄດ້ຮ່ວມຈິດຮ່ວມໃຈປະສານສົມທົບຢ່າງໃກ້ຊິດ ດ້ວຍການທຸບພູ, ສ້າງທາງ, ຂົວຂ້າມນໍ້າ ສຳເລັດໜ້າທີ່ການກໍ່ສ້າງຢ່າງມີຄຸນນະພາບສູງ ເຊິ່ງການຮ່ວມມືຕົວຈິງດັ່ງກ່າວໄດ້ສ່ອງແສງເຖິງຜົນຮັບຂອງສອງປະເທດ ທີ່ສ້າງຜົນປະໂຫຍດໃຫ້ແກ່ກັນ.

ທ່ານ ສີຈິ້ນຜິງ ກ່າວຕື່ມວ່າ: ຈີນ ຍິນດີທີ່ຈະຮ່ວມກັບປະເທດລາວ ແລະ ບັນດາປະເທດລຽບຕາມເສັ້ນທາງ ພ້ອມກັນເລັ່ງລັດສ້າງສາຍພົວພັນ ການຮ່ວມມືໜຶ່ງແລວໜຶ່ງເສັ້ນທາງທີ່ແໜ້ນແຟ້ນກວ່າເກົ່າ ແລະ ພ້ອມກັນຊຸກຍູ້ສ້າງສາຄູ່ຮ່ວມສະຕາກຳຂອງມວນມະນຸດ. ອະນາຄົດມິດຕິພາບຂອງ ຈີນ-ລາວ, ລາວ-ຈີນ ຢູ່ນຳໄວໜຸ່ມ, ການເຊື່ອມໂຍງ-ເຊື່ອມຈອດພື້ນຖານໂຄງລາງ ສຳຄັນແມ່ນຕ້ອງໃຫ້ຈິດໃຈປະຊາຊົນສະໜິດສະໜົມ ເຊິ່ງຈີນຈະສືບຕໍ່ຊ່ວຍ ສປປ ລາວ ສ້າງສາບຸກຄະລາກອນ ແລະ ສ້າງຊັບພະຍາກອນມະນຸດ ເພື່ອສືບທອດມິດຕະພາບສອງຊາດ.

ພາຍຫຼັງຜູ້ນຳຂັ້ນສູງຂອງສອງປະເທດ ລາວ-ຈີນ ໄດ້ກ່າວຄຳປາໄສ ຮຽບຮ້ອຍແລ້ວ, ຫົວໜ້າສະຖານີລົດໄຟນະຄອນຫຼວງວຽງຈັນ ໄດ້ຂໍຄຳສັ່ງເຄື່ອນລົດໄຟ ຈາກ ທ່ານປະທານປະເທດ ແຫ່ງ ສປປ ລາວ ແລະ ທ່ານ ທອງລຸນ ສີສຸລິດ ກໍໄດ້ສັ່ງໃຫ້ລົດໄຟອອກເດີນທາງ.

ພ້ອມກັນນັ້ນ, ຫົວໜ້າສະຖານີລົດໄຟ ນະຄອນຄຸນມິງ ກໍໄດ້ຂໍຄຳສັ່ງເຄື່ອນລົດໄຟ ຈາກທ່ານປະທານປະເທດ ແຫ່ງ ສປ ຈີນ ແລະ ທ່ານ ສີຈິ້ນຜິງ ກໍໄດ້ສັ່ງໃຫ້ລົດໄຟອອກເດີນທາງ ອັນເປັນຂີດໝາຍສຳຄັນໃນການອອກເຄື່ອນຂະບວນ ເດີນທາງອອກຈາກສະຖານີ.

ການເປີດລົດໄຟໂດຍສານ ຖ້ຽວປະຖົມມະລືກ ທີ່ເດີນທາງຈາກສະຖານີນະຄອນຫລວງວຽງຈັນ ນຳພາໂດຍ ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄປຍັງສະຖານີລົດໄຟດ່ານບໍ່ເຕ່ນ, ເຊິ່ງທ່ານນາຍົກລັດຖະມົນຕີ ໄດ້ເດີນທາງເຖິງສະຖານີວັງວຽງ ໂດຍມີທ່ານເຈົ້າແຂວງວຽງຈັນ ໃຫ້ການຕ້ອນຮັບ ແລະ ໄດ້ຢ້ຽມຊົມສະຖານີ ແລະ ຂຶ້ນລົດໄຟຄັນໃໝ່ ເພື່ອກັບນະຄອນຫລວງວຽງຈັນ. ສ່ວນລົດໄຟທີ່ເຄື່ອນຈາກສະຖານີຄຸນມິງ, ສປ ຈີນ ກໍເດີນທາງມາຍັງດ່ານຊາຍແດນບໍ່ເຕ່ນ, ສປປ ລາວ.

ແຫຼ່ງຂ່າວ: ປະເທດລາວ, CRI

ບົດຄວາມຫຼ້າສຸດ

ກອງປະຊຸມສະໄໝສາມັນ ຂອງລັດຖະບານ ປະຈຳເດືອນພຶດສະພາ 2025

ໄຂກອງປະຊຸມສະໄໝສາມັນ ຂອງລັດຖະບານ ປະຈຳເດືອນພຶດສະພາ 2025 ຢ່າງເປັນທາງການ. ກອງປະຊຸມສະໄໝສາມັນ ຂອງລັດຖະບານ ປະຈຳເດືອນພຶດສະພາ 2025 ໄຂຂຶ້ນໃນວັນທີ29 ພຶດສະພາ 2025 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງ ທ່ານ...

ຈັດພິທີເປີດສະໜາມກິລາບານເຕະຂະໜາດນ້ອຍພາຍໃຕ້ໂຄງການ FIFA Arena ແຫ່ງທຳອິດຂອງ ສປປ ລາວ

ພິທີເປີດສະໜາມກິລາບານເຕະຂະໜາດນ້ອຍພາຍໃຕ້ໂຄງການ FIFA Arena ແຫ່ງທຳອິດຂອງ ສປປ ລາວ. ສະຫະພັນບານເຕະແຫ່ງຊາດລາວຮ່ວມກັບສະຫະພັນບານເຕະນານາຊາດ(FIFA), ອຳນາດການປົກຄອງນະຄອນຫຼວງວຽງຈັນ,ເມືອງໄຊເສດຖາ ແລະ ບ້ານນາຄວາຍໃຕ້ ຈັດພິທີເປີດສະໜາມກິລາບານເຕະຂະໜາດນ້ອຍພາຍໃຕ້ໂຄງການ FIFA(FIFA Arena Project) ແຫ່ງທຳອິດຂອງ...

ລາວ ແລະ ມາເລເຊຍ ໄດ້ເປີດຕົວເສັ້ນທາງ ການຄ້າທາງລົດໄຟ-ທະເລ ແຫ່ງໃໝ່

ລາວ ແລະ ມາເລເຊຍ ໄດ້ເປີດຕົວເສັ້ນທາງ ການຄ້າທາງລົດໄຟ-ທະເລ ແຫ່ງໃໝ່ ເພື່ອເສີມສ້າງລະບົບການຂົນສົ່ງໃນພາກພື້ນ, ສົ່ງເສີມການຮ່ວມມືທາງເສດຖະກິດ, ແລະ ເຊື່ອມຕໍ່ອາຊີຕາເວັນອອກສຽງໃຕ້ ເຂົ້າກັບເສັ້ນທາງການຄ້າໂລກ. ອີງຕາມການລາຍງານຂອງເວັບໄຊຕ໌ຂ່າວການຂົນສົ່ງທາງລົດໄຟ Railway Supply. ໃນວັນທີ 25 ພຶດສະພາ, ບໍລິສັດ Penang Port Sdn Bhd ແລະ...

ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະ ໄດ້ເດີນທາງຢ້ຽມຢາມ ມາເລເຊຍ ຢ່າງເປັນທາງການ

ລາວ-ມາເລເຊຍ ຮັດແໜ້ນສາຍພົວພັນ ແລະ ການຮ່ວມມືສອງຝ່າຍ ໂດຍຕອບສະໜອງຕາມການເຊື້ອເຊີນຂອງ ພະນະທ່ານ ອັນວາ ອິບຣາຮິມ, ນາຍົກລັດຖະມົນຕີ ແຫ່ງ ມາເລເຊຍ, ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ...