ແຫຼ່ງຂ່າວ CNN ລາຍງານ: ເຈົ້າໜ້າທີ່ສັນລະສູດສົບຂອງລັດຫຼຸຍເຊຍນາ, ສະຫະລັດອາເມລິກາໄດ້ລະບຸຊາກສົບທີ່ພົບໃນທ້ອງແຂ້ທີ່ມີນໍ້າໜັກປະມານ 226 ກິໂລກຼາມ ເຊິ່ງເປັນຊາຍໄວ 71 ປີ ທີ່ອາໄສຢູ່ໃນລັດຫຼຸຍເຊຍນາ ເຊິ່ງຫາຍສາບສູນໃນວັນທີ 30 ສິງຫາຜ່ານມາຕາມທີ່ທີມງານລາວໂພສໄດ້ສະເໜີຂ່າວກ່ອນໜ້ານີ້.

ຊາຍຊະລາໄວ 71 ປີຖືກແຂ້ກັດບາດເຈັບສາຫັດ ຂະນະຍ່າງລຸຍນໍ້າຖ້ວມ ພາຍຫຼັງພະຍຸເຮີຣີເຄນໄອດາພັດຖະຫຼົ່ມເຂົ້າລັດຫຼຸຍເຊຍນາ, ສະຫະລັດອາເມລິກາ ຈົນເຮັດໃຫ້ເກີດນໍ້າຖ້ວມ ເຊິ່ງເຈົ້າໜ້າທີ່ສັນນິຖານວ່າຊາຍຄົນນັ້ນອາດເສຍຊີວິດແລ້ວ ເນື່ອງຈາກຫາຕົວບໍ່ພົບ ຂະນະທີ່ເມຍຂອງຊາຍຊະລາໄດ້ກ່າວຕໍ່ເຈົ້າໜ້າທີ່ວ່າ ຊາຍຜູ້ເຄາະຮ້າຍໄດ້ຍ່າງລຸຍນໍ້າຖ້ວມໃນຊ່ວງຕອນທ່ຽງຢູ່ບໍລິເວນເຂດເຮືອນຂອງຕົນເອງ ໃນວັນທີ 30 ສິງຫາ ແລ້ວກໍມີແຂ້ໃຫຍ່ໂຕໜຶ່ງເຊິ່ງຄາດວ່າຈະມາພ້ອມກັບນໍ້າຖ້ວມເຂົ້າຈູ່ໂຈມພ້ອມກັດຊາຍຄົນດັ່ງກ່າວຈົນໄດ້ຮັບບາດເຈັບສາຫັດ ເມື່ອຜູ້ເປັນເມຍເຫັນກໍຮີບຮ້ອນເຂົ້າຊ່ວຍສາມີທັງປະຄອງຄົນເຈັບມານອນລໍຖ້າຢູ່ຂັ້ນໄດເຮືອນ ກ່ອນຈະອອກໄປຂໍຄວາມຊ່ວຍເຫຼືອຈາກເພື່ອນບ້ານ ແຕ່ພໍກັບມາເຮືອນກໍບໍ່ພົບຊາຍຄົນນັ້ນອີກ.

ທັນທີທີ່ໄດ້ຮັບການແຈ້ງເຫດ ທາງເຈົ້າໜ້າທີ່ເມືອງ ເຊນ ແທນມານີ ກໍໄດ້ອອກຕາມລ່າແຂ້ໂຕນັ້ນ ໃນທີ່ສຸດກໍສາມາດຈັບມັນໄດ້ໃນຊ່ວງເວລາດຽວກັນ ກ່ອນທີ່ທ່ານໝໍສັນລະສູດສົບຈະດຳເນີນການຜ່າທ້ອງແຂ້ດັ່ງກ່າວ ແລະພົບສົບມະນຸດຢູ່ຂ້າງໃນ ຂະນະທີ່ຕົວຢ່າງດີເອັນເອຈາກຊາກສົບໃຫ້ການຈັບຄູ່ 11 ຈຸດກັບດີເອັນເອຂອງລູກຜູ້ເຄາະຮ້າຍ ຈິ່ງສາມາດຢືນຢັນວ່າເປັນສົບຊາຍຊະລາຜູ້ໜ້າສົງສານທີ່ຫາຍສາບສູນຄົນນັ້ນ.