ຜ່ານໄປແລ້ວກັບການສອນເບື້ອງຕົ້ນ ສຳລັບ ທ້າວ ໄຊຍະພົນ ວິພາ ຫຼື ລຸງພົນ ໃນຄະດີນ້ອງຊົມພູ່ ພ້ອມທັງໄດ້ຝາກຂັງຊົ່ວຄາວ ທີ່ສຳນັກງານຕຳຫຼວດກົກຕູມ ກ່ອນວັນສຸກຈະໄດ້ໄປຝາກຂັງທີ່ສານ ຂອງແຂວງມຸກດາຫານ ສ່ວນທາງດ້ານແມ່ນ້ອງຊົມພູ່ ໄດ້ເປີດເຜີຍວ່າ ຮູ້ສຶກໂລ່ງອົກແລ້ວ ທີ່ສາມາດຈັບໂຕຄົນຮ້າຍໂຕຈິງໄດ້ ເຮັດໃຫ້ແມ່ນ້ອງຊົມພູ່ ພົ້ນຈາກຄຳເວົ້າຂອງສັງຄົມວ່າ ຕົນເອງເປັນຄົນຂ້າ ແລະ ທຳຮ້າຍລູກສາວຕົນເອງ.
ໃນເວລາປະມານ 4 ໂມງ ຂອງວັນທີ 2 ມີຖຸນາ ທີ່ຜ່ານມາ, ເຈົ້າໜ້າທີ່ຕຳຫຼວດ ໄດ້ນຳໂຕ ທ້າວ ໄຊຍະພົນ ຫຼື ລຸງພົນ ເຊິ່ງເດີນທາງມາຈາກກຸງເທບມະຫານະຄອນ ດ້ວຍເຮລີຄອບເຕີ້ ມາລົງທີ່ສະຖານນີຕຳຫຼວດລາດຕະເວນຊາຍແດນ ທີ່ 234, ກ່ອນທີ່ຈະນຳໂຕມາສອບສວນ ຢູ່ທີ່ສຳນັກງານຕຳຫຼວດແຂວງມຸກດາຫານ ລຸງພົນໄດ້ຕົກເປັນຜູ້ຕ້ອງສົງໃສ ໃນຄະດີຄາດຕະກຳນ້ອງຊົມພູ່ ອາຍຸ 3 ປີ ເຊິ່ງຄະດີນີ້ເກີດຂຶ້ນເມື່ອ ເດືອນ ພືດສະພາ ປີກາຍນີ
ຕຳຫຼວດໄດ້ໃຊ້ເວລາຮວບຮວມຫຼັກຖານ ໂດຍສະເພາະທາງດ້ານນິຕິວິທະຍາ ແລະ ໄດ້ສອບສວນພະຍານອ້ອມຂ້າງ ເປັນເວລາເຖິງ 1 ປີ ຈົນສຸດທ້າຍແລ້ວພົບວ່າ: ມີຄວາມເຊື່ອມໂຍງໄປຫາ ລຸງພົນ ແລະ ນຳໄປສູ່ການອອກໝາຍຈັບ.
ເຊິ່ງໃນຕອນບ່າຍ ຂອງມື້ດຽວກັນ ພໍ່ ແລະ ແມ່ ຂອງນ້ອງຊົມພູ່ ໄດ້ເຂົ້າພົບທະນາຍຄວາມ ແລະ ພະນັກງານສອບສວນ ເພື່ອຫາລືກ່ຽວກັບ ການຍື່ນເອກະສານຄັດຄ້ານປະກັນໂຕ ລຸງພົນໃນວັນສຸກນີ້.