ສະຖານະການການແຜ່ລະບາດຂອງພະຍາດ COVID-19 ຍັງຄົງລຸກລາມ ແລະ ສ້າງຜົນກະທົບທັງຊັບຊິນ ແລະ ຊີວິດຂອງປະຊາຊົນໃນທົ່ວໂລກ, ອ່ານຂ່າວສະຫຼຸບເຫດການປະຈໍາວັນກ່ຽວກັບສະຖານະການ COVID-19 ໃນວັນທີ 17/03/2020 ດັ່ງລຸ່ມນີ້:
ຂ່າວພາຍໃນປະເທດ
- ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດໂຄວິດ-19 ອອກໜັງສືສະເໜີໃຫ້ມີມາດຕະການແຍກປ່ຽວ ສຳລັບຜູ້ທີ່ມີອາການໃນນິຍາມ, ຈຳກັດບໍລິເວນຕົນ ໃນກໍລະນີທີ່ເດີນທາງມາຈາກຕ່າງປະເທດ ແລະ ຕິດຕາມອາການຂອງຕົນເອງເປັນເວລາ 14 ມື້ ເພື່ອເຝົ້າລະວັງການແຜ່ລະບາດຂອງພະຍາດ
- ສະຖານກົງສູນໄທທີ່ແຂວງ ຄຳມ່ວນ ແຈ້ງການວ່າພົບຜູ້ຕິດເຊື້ອໂຄວິດ-19 ເຊິ່ງເປັນຄົນໄທພ້ອມດ້ວຍຄະນະຮ່ວມ 5 ຄົນ ເດີນທາງໄປແຂວງຄຳມ່ວນໃນວັນທີ 12 ມີນາ
- ແຂວງສະຫວັນນະເຂດກວດພົບກໍລະນີຕ້ອງສົງໃສຕິດເຊື້ອໂຄວິດ-19 ຄົນທໍາອິດ ທີ່ດ່ານຂົວມິດຕະພາບລາວ-ໄທ 2 ເປັນເພດຍິງ ອາຍຸ 28 ເດີນທາງມາຈາກໄທ
- ກະຊວງສຶກສາທິການສັ່ງໂຈະການຮຽນ-ການສອນໃຫ້ໂຮງຮຽລ້ຽງເດັກ, ອະນຸບານ, ກຽມປະຖົມຕັ້ງແຕ່ວັນທີ 17 ມີນາ – 21 ເມສາ ແລະ ໂຮງຮຽນປະຖົມສຶກສາຕັ້ງແຕ່ວັນທີ 19 ມີນາ – 21 ເມສາ
- ໃນວັນນີ້ ປະເທດລາວພົບກໍລະນີສົງໄສ 85 ກໍລະນີ ບໍ່ພົບເຊື້ອ 81 ກໍລະນີ ກຳລັງກວດ 4 ກໍລະນີ
ຂ່າວຕ່າງປະເທດ
- ມາເລເຊຍສັ່ງປິດປະເທດ 18-31 ມີນາ ຕອນນີ້ມີຜູ້ຕິດເຊື້ອໃນປະເທດທັ້ງໝົດ 566 ຄົນ;
- ສະຫະພາບເອີຣົບປະກາດຫ້າມໃຫ້ຊາວຕ່າງຊາດນອກທະວີບທີ່ບໍ່ມີຄວາມຈຳເປັນ ເດີນທາງເຂົ້າທະວີບເອີຣົບເປັນເວລາ 30 ວັນ ເພື່ອປ້ອງກັນການແຜ່ລະບາດຂອງໄວຣັດໂຄວິດ-19;
- ລັດຖະບານໄທສັ່ງປິດສະຖານທີຕ່າງໆເຊັ່ນ ສະຖານບັນເທິງ, ໂຮງຮູບເງົາ, ສະໜາມມ້າ, ສະໜາມມວຍ, ສະຖານທີນວດແຜນບູຮານ ພ້ອມງົດກິດຈະກຳທີ່ມີຄົນຈຳນວນຫຼາຍໃນກຸງເທບເປັນເວລາ 14 ມື້;
- ນັກສະແດງຕ່າງປະເທດເຊັ່ນ Idris Elba (ຮູບເງົາຊຸດ Thor), Olga Kurylenko (James Bond 007: Quantum of Solace), Kristofer Hivju (Game of Thrones), ແມັດທິວ ດີນ ແລະ ລີເດຍ ສະຣັນຣັດ (ນັກສະແດງ ສາມີ-ພັນລະຍາ ຊາວໄທ) ກວດພົບເຊື້ອໄວຣັສໂຄວິດ-19;
- ຂະນະນີ້ຍອດຜູ້ຕິດເຊື້ອທົ່ວໂລກມີປະມານ 182,400 ກໍລະນີ ເສຍຊີວິດປະມານ 7100 ກໍລະນີ (ອ້າງອີງຈາກເວັບໄຊສຳນັກຂ່າວ CNN)
ຮຽບຮຽງຂ່າວ: ວະນິດາ