ງານມະຫາກຳກິລາແຫ່ງຊາດຄັ້ງທີ 11 ທີ່ແຂວງຊຽງຂວາງເປັນເຈົ້າພາບ ເຊິ່ງມີກຳນົດຈັດຂຶ້ນໃນເດືອນມີນາ 2020 ນີ້ ຖືເປັນງານທີ່ຍິ່ງໃຫຍ່ລະດັບຊາດ ເພາະນັ້ນບໍ່ສະເພາະແຕ່ມີການແຂ່ງຂັນກິລາເທົ່ານັ້ນ ແຕ່ຍັງມີທັງງານສະເຫຼີມສະຫຼອງທົ່ງໄຫຫີນເຂົ້າເປັນມໍລະດົກໂລກ ແລະ ວັນສ້າງຕັ້ງພັກອີກດ້ວຍ. ສະນັ້ນ, ເພື່ອເປັນການສົ່ງເສີມການທ່ອງທ່ຽວພາຍໃນ ການບິນລາວໃນນາມສາຍການບິນແຫ່ງຊາດຈິ່ງໄດ້ຈັດໂປຣໂມຊັ່ນຫຼຸດລາຄາໂດຍສານພິເສດ.

ຕາມຂໍ້ມູນຈາກລັດວິສາຫະກິດການບິນລາວໃຫ້ຮູ້ວ່າ: ການເຫີນຟ້າໄປຕິດຂອບສະໜາມມະຫະກຳກິລາແຫ່ງຊາດ ຊຽງຂວາງເກມ 2020 ການບິນລາວຈັດລາຄາເລີ່ມຕົ້ນພຽງ 390.000 ກີບ/ຖ້ຽວ, ພິເສດໄປກວ່ານັ້ນແມ່ນຈະເພີ່ມຖ້ຽວບິນເປັນ 2 ຖ້ຽວ/ມື້.

ສ່ວນຖ້ຽວປົກກະຕິຈາກວຽງຈັນ – ຊຽງຂວາງ ຈະບິນເວລາ 14:40 ໂມງ ຮອດ 15:10ໂມງ, ຊຽງຂວາງ – ວຽງຈັນ ເວລາບິນ 15:40 ໂມງ ເວລາຮອດ 16:10 ໂມງ.

ສະເພາະຖ້ຽວເພີ່ມ ສຳລັບງານພິເສດຂອງແຂວງຊຽງຂວາງນັ້ນຈະເລີ່ມບິນໃນວັນທີ 16 ມີນາ ຫາ 5 ເມສາ 2020 ວຽງຈັນ-ຊຽງຂວາງ ເວລາບິນ 08:30 ໂມງ ເວລາຮອດ 09:00 ໂມງ, ຊຽງຂວາງ – ວຽງຈັນ ເວລາບິນ 09:30 ໂມງ ເວລາຮອດ 10:00 ໂມງ.

ຮຽບຮຽງຂ່າວ: ພຸດສະດີ