ປະຊາຊົນຫຼາຍລ້ານຄົນນັດຢຸດງານ ແລະ ເດີນຂະບວນໃນຖະໜົນຫຼັກຫຼາຍສາຍທົ່ວປະເທດເພື່ອປະທ້ວງການປະຕິຮູບລະບົບບຳນານ.
ສຳນັກຂ່າວຕ່າງປະເທດລາຍງານເມື່ອວັນທີ 15 ມິຖຸນາຜ່ານມາຈາກນະຄອນຣິໂອເດຈາເນໂຣວ່າ ການປະທ້ວງໃຫຍ່ທົ່ວປະເທດເກີດຂຶ້ນຕາມສຽງຮຽກຮ້ອງຂອງສະພາບແຮງງານຫຼາຍອົງກອນ ໂດຍມີເປົ້າໝາຍຫຼັກກ່ຽວກັບການປະຕິຮູບລະບົບບຳນານທີ່ຜູ້ນຳປະເທດກຳລັງຊຸກຍູ້ໃນສະພາຄອງເກຣສ ຊຶ່ງມີຂຶ້ນພາຍຫຼັງການປະທ້ວງໃຫຍ່ທົ່ວປະເທດເມື່ອເດືອນພຶດສະພາຜ່ານມາທີ່ໄດ້ຕໍ່ຕ້ານການຫຼຸດລາຍຈ່າຍຫຼາຍບ້ວງໃນລະບົບການສຶກສາຂອງບັນດາລັດຕ່າງໆທ່າມກາງຄວາມບໍ່ພໍໃຈຂອງປະຊາຊົນທີ່ພວມຕົກຢູ່ໃນພາວະເສດຖະກິດທີ່ຢູ່ໃນພາວະພວມຫຼຸດຖອຍ.
ເຖິງແມ່ນວ່າການປະທ້ວງຄັ້ງຫຼ້າສຸດຈະມີປະຊາຊົນເຂົ້າຮ່ວມບໍ່ຫຼາຍເທົ່າກັບການປະທ້ວງໃນເດືອນຜ່ານມາ ແຕ່ສະຫະພາບແຮງງານ ຫຼື UWC ຊຶ່ງໄດ້ກ່າວວ່າ ປະສົບຄວາມສຳເລັດຕາມແຜນທີ່ວາງໄວ້ ໂດຍອ້າງວ່າມີແຮງງານສະມາຊິກສະພາບປະມານ 45 ລ້ານຄົນເຂົ້າຮ່ວມໃນການປະທ້ວງໃນຄັ້ງນີ້.
ຂະນະທີ່ການປະຕິຮູບລະບົບບຳນານຕາມແຜນຂອງລັດຖະບານ ໂບລໂຊນາໂຣ ຈະເພີ່ມເກນການກະສຽນເປັນ 65 ປີສຳລັບຜູ້ຊາຍ ແລະ 62 ປີສຳລັບແມ່ຍິງ ລວມເຖິງເພີ່ມອາຍຸ ການເຮັດວຽກທີ່ສາມາດຮຽກຮ້ອງສິດທິຜົນປະໂຫຍດບຳນານໄດ້ເປັນຢ່າງໜ້ອຍ 30 ປີສຳລັບຜູ້ຊາຍ ແລະ 35 ປີສຳລັບແມ່ຍິງ.
ທັງນີ້ ລັດຖະບານຂອງ ໂບລໂຊນາໂຣ ກໍໄດ້ກ່າວວ່າ ການປະຕິຮູບລະບົບບຳນານຕາມແຜນຈະຊ່ວຍລັດຖະບານປະຢັດງົບ ແລະ ຄ່າໃຊ້ຈ່າຍອື່ນໆໄດ້ຢ່າງຫຼວງຫຼາຍ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: dailynews.co.th