ເປັນອີກເຫດການໜຶ່ງທີ່ເກີດຂຶ້ນເມື່ອໄວໆນີ້ ແລະ ພວມຖືກແຊຣຕໍ່ໃນໂລກໂຊຊຽວຢ່າງຫຼວງຫຼາຍ ຊຶ່ງສັງຄົມກໍໃຫ້ຄວາມສົນໃຈຢ່າງກວ້າງຂວາງ ໂດຍເຫດການດ່ັງກ່າວເກີດຂຶ້ນເມື່ອວັນທີ 1 ມິຖຸນາທີ່ຜ່ານມາ ເມື່ອມີພົນລະເມືອງພົກອາວຸດປືນ ແລະ ອາດເອົາມານຳໃຊ້ໃນທາງທີ່ບໍ່ຖືກບໍ່ຄວນ!.
ເຫດການດັ່ງກ່າວເກີດຂຶ້ນກົງກັບວັນເດັກນ້ອຍສາກົນ ຢູ່ລະຫວ່າງເສັ້ນທາງໄປໄອເຕັກ ນະຄອນຫຼວງວຽງຈັນ ຂະນະທີ່ການສັນຈອນແອອັດລົດຕິດຍາວຢຽດບວກກັບອາກາດ ຮ້ອນອົບເອົ້າຊຶ່ງອາດເຮັດໃຫ້ອາລົມຂອງເຮົາໆທ່ານໆຮ້ອນໄປຕາມໆກັນ ທັງນີ້ ເລື່ອງມີຢູ່ວ່າ ມີຜູ້ຊາຍຄົນໜຶ່ງຈັບອາວຸດປືນອອກມາຂູ່ຍິງຊາຍຄົນໜຶ່ງທີ່ຢູ່ໃນລົດກະບະ (ຕາມຄລິບວິດິໂອທີ່ຖືກແຊຣ) ຊຶ່ງຖ້າຊາຍຄູ່ກໍລະນີຫາກອາລົມຮ້ອນໃສ່ກັນ ສິ່ງທີ່ເກີດຂຶ້ນອາດຮຸນແຮງເຖິງຂັ້ນມີຄົນໄດ້ຮັບບາດເຈັບ ຫຼື ຮ້າຍແຮງເຖິງຂັ້ນເສຍຊີວິດ ໂດຍຊາຍທີ່ຖືອາວຸດປືນໄດ້ຍ່າງໄປຫາຄູ່ກໍລະນີພ້ອມກັບປືນໃນມື ແລະ ຄຳເວົ້າທີ່ບໍ່ສຸພາບ ເນື່ອງຈາກຄູ່ກໍລະນີບີບແກລົດໃສ່ພຽງຄັ້ງດຽວເທົ່ານັ້ນ (ຊຶ່ງອາດບໍ່ໄດ້ບີບໃສ່ໃຜຄົນໜຶ່ງ).
ຂະນະທີ່ຢູ່ໃນລົດຄັນທີ່ບີບແກນັ້ນກໍມີເດັກນ້ອຍຢູ່ໃນລົດ ຊຶ່ງຖ້າຫາກເກີດກໍລະນີຮ້າຍແຮງກໍບໍ່ຮູ້ວ່າເຫດການຈະຮ້າຍແຮງສ່ຳໃດ? ດັ່ງນັ້ນ ຈິ່ງຂໍໃຫ້ພາກສ່ວນກ່ຽວຂ້ອງພິຈາລະນາກ່ຽວກັບການຄອບຄອງອາວຸດເສິກ (ປືນ) ໃຫ້ເຂັ້ມງວດກວ່ານີ້ ບໍ່ແມ່ນວ່າໃຜກໍສາມາດມີໄວ້ໃນຄອບຄອງໄດ້! ແລະ ຖ້າຫາກບໍ່ມີການຄຸມເຂັ້ມກ່ຽວກັບເລື່ອງນີ້ໃຫ້ເດັດຂາດກໍອາດຈະເກີດເຫດການຮ້າຍແຮງ ຫຼື ເຖິງຂັ້ນສູນເສຍກໍເປັນໄດ້ “ເພາະປືນອາດບໍ່ອາດສາມາດແກ້ໄຂບັນຫາໄດ້ທຸກຢ່າງ”.
ທ່ານສາມາດກົດເຂົ້າອ່ານບົດຄວາມກ່ຽວກັບປືນໄດ້ແລ້ວທີ່:
ຂໍ້ມູນ ແລະ ຮູບພາບຈາກຊອກວຽກບໍ່