ທ່ານ ລີ ເຊົາ ກີ ມະຫາເສດຖີອັນດັບ 2 ຂອງຮົງກົງປະກາດລາອອກຈາກຕຳແໜ່ງປະທານບໍລິສັດ ເຮນເດີຣສັນ ແລນ ດີເວລລົບເມັນ ຊຶ່ງທ່ານ ລີ ຖືກຈັດໃຫ້ເປັນໜຶ່ງໃນມະຫາເສດຖີໃໃນຂົງເຂດບໍລິຫານພິເສດຂອງ ສປ ຈີນ ທີ່ວາງມືຈາກທຸລະກິດ ແລະ ຖ່າຍ ໂອນໃຫ້ລຸ້ນສືບທອດບໍລິຫານຕໍ່.
ສຳນັກຂ່າວຕ່າງປະເທດລາຍງານຈາກເຂດບໍລິຫານພິເສດຮົງກົງ ສປ ຈີນ ເມື່ອວັນທີ 28 ພຶດສະພາຜ່ານມາວ່າ ທ່ານ ລີ ເຊົາ ກີ ໃນໄວ 90 ປີ ຊຶ່ງສ້າງຖານະຮັ່ງມີຈາກທຸລະກິດຫຼັກດ້ານອະສັງຫາລິມະຊັບ ມີຊັບສິນສຸດທິຕາມການປະເມີນຂອງວາລະສານຟອຣບຢູ່ທີ່ 30.000 ລ້ານໂດລາ ຖືກຈັດເປັນບຸກຄົນຮັ່ງມີອັນດັບ 2 ຂອງຮົງກົງຮອງຈາກ ທ່ານ ລີ ກາ ຊິງ ຊຶ່ງມີຊັບສິນຢູ່ທີ່ 32.800 ລ້ານໂດລາ.
ໂດຍຖະແຫຼງການຂອງບໍລິສັດ ເຮນເດີຣສັນ ໃຫ້ຮູ້ວ່າ ທ່ານ ລີ ຈະວາງມືຈາກທຸລະກິດຢ່າງເປັນທາງການພາຍຫຼັງການປະຊຸມໃຫຍ່ປະຈຳປີຄັ້ງສຸດທ້າຍເມື່ອວັນທີ 28 ພຶດສະພາຜ່ານມາ ທັງນີ້ ທ່ານ ລີ ຈະສົ່ງມອບທຸລະກິດໃຫ້ຢູ່ໃນການດູແລຂອງລູກຊາຍ 2 ຄົນຄື ປີເຕີ ແລະ ມາຣຕິນ ຊຶ່ງຈະດຳລົງຕຳແໜ່ງປະທານ ແລະ ຜູ້ຈັດການຮ່ວມຂອງບໍລິສັດ.
ຂະນະທີ່ການສຳຫຼວດເມືອງມະຫາເສດຖີໂລກ 2019 Billionaire Census ໂດຍບໍລິສັດ Wealth-X ພົບວ່າ ໃນ 2019 ມະຫານະຄອນນິວຢອກຂອງອາເມຣິກາມີມະຫາເສດຖີອາໄສຢູ່ຫຼາຍທີ່ສຸດ 105 ຄົນ ຕາມມາດ້ວຍຮົງກົງມີ 87 ຄົນ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: AFP