ສຳເລັດລົງແລ້ວສຳລັບການເລືອກຕັ້ງລັດຖະສະພາເອີຣົບ ໂດຍພັກຝ່າຍຂວາໄດ້ຜູ້ແທນເຂົ້າສະພາເພີ່ມຂຶ້ນ ຂະນະຄັ້ງນີ້ມີຄົນອອກມາໃຊ້ສິດເລືອກຕັ້ງຫຼາຍທີ່ສຸດໃນຮອບ 25 ປີ.
ສຳນັກຂ່າວຕ່າງປະເທດລາຍງານເມື່ອວັນທີ 27 ພຶດສະພາຜ່ານມາວ່າ ການເລືອກຕັ້ງສະມາຊິກລັດຖະສະພາແຫ່ງສະຫະພາບເອີຣົບ (EUP) ຊຶ່ງຈັດຂຶ້ນເປັນເວລາ 3 ວັນທົ່ວທະວີບເອີຣົບ ໂດຍມີຜູ້ອອກມາໃຊ້ສິດເຖິງ 51% ຊຶ່ງນັບເປັນໂຕເລກຫຼາຍທີ່ສຸດນັບແຕ່ປີ 1994 ຂະນະທີ່ຜົນເອັກຊິດໂພລຊີ້ວ່າ ກຸ່ມພັກຝ່າຍຂວາໄດ້ຜູ້ແທນເຂົ້າສະພາເພີ່ມຂຶ້ນ.
ຂະນະທີ່ພາບລວມໃນລະດັບທະວີບ ກຸ່ມສະໜັບສະໜູນສະຫະພາບເອີຣົບ (EPP) ແລະ ພັນທະມິດຝ່າຍປະຊາທິປະໄຕ ແລະ ສັງຄົມນິຍົມ (S&D) ມີທ່າອຽງຈະໄດ້ໂຕເລກຜູ້ແທນໃນສະພາເອີຣົບຫຼາຍທີ່ສຸດ ແຕ່ຈຳນວນຜູ້ແທນຂອງ S&D ຊຶ່ງໂຕເລກຢູ່ທີ່ 147 ບ່ອນນັ່ງຈາກເດີມຢູ່ທີ່ 177 ບ່ອນນັ່ງຈາກສະມາຊິກສະພາເອີຣົບທີ່ມີທັງໝົດ 751 ທ່ານ.
ຢ່າງໃດກໍຕາມ ເອັກຊິດໂພລໄດ້ລະບຸວ່າ ພັກຝ່າຍຂວາໃນປະເທດຕ່າງໆທົ່ວສະພາເອີຣົບມີທ່າອຽງຈະໄດ້ຜູ້ແທນເຂົ້າສູ່ສະພາ EU ເພີ່ມຂຶ້ນບໍ່ວ່າຈະຢູ່ ຝຣັ່ງ ຮັງກາຣີ ເຢຍລະມັນ ຫຼື ໃນແອັດສະປາຍ ເຖິງແມ່ນວ່າພັກສັງຄົມນິຍົມຂອງນາຍົກລັດຖະມົນຕີ ເປໂດຣ ຊານເຊຊ ຈະຊະນະເລືອກຕັ້ງ ສ່ວນພັກລີກຂອງຮອງນາຍົກລັດຖະມົນຕີອີຕາລີຊະນະເລືອກຕັ້ງ EU ໃນປະເທດໂດຍໄດ້ຮັບຄະແນນລະຫວ່າງ 26-31% ຕ່າງຈາກການເລືອກຕັ້ງສະຫະພາບເອີຣົບຄັ້ງກ່ອນໃນປີ 2014 ທີ່ໄດ້ຮັບຄະແນນສຽງພຽງແຕ່ 6,2% ເທົ່ານັ້ນ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: thairath