ກາຍເປັນກະແສໂດ່ງດັງໄປທົ່ວມະຫາວິທະຍາໄລມໍຣເຮົາສ ຊຶ່ງເປັນສະຖາບັນສຶກສາເອກະຊົນສຳລັບນັກສຶກສາຜິວສີທີ່ມີປະຫວັດສາດຢ່າງຍາວນານ ຊຶ່ງຕັ້ງຢູ່ເມືອງແອຕແລນຕາ ລັດຈໍຣເຈຍ ຫຼັງຈາກທີ່ນັກລົງທຶນດ້ານເຕັກໂນໂລຊີຊາວອາເມຣິກາເຊື້ອສາຍອັບຟຣິ ກ ນັ້ນກໍຄື ໂຣເບີຣດ ສະມິດ ໄວ 56 ປີເຂົ້າຮັບປະລິນຍາກິດຕິມະສັກ ແລະ ໄດ້ປະກາດໃຫ້ຄຳໝັ້ນວ່າ ຈະຈ່າຍໜີ້ເງິນກູ້ຢືມເພື່ອການສຶກສາແທນນັກສຶກສາຈຳນວນກວ່າ 400 ຄົນທີ່ຈົບການສຶກສາໃນປີ 2019 ນີ້ ຊຶ່ງຕົວເລກຊຳລະໜີ້ເງິນກູ້ຢູ່ທີ່ 40 ລ້ານໂດລາ.
ໂຣເບີຣດ ສະມິດ ເປັນຜູ້ກໍ່ຕັ້ງບໍລິສັດກ່ຽວກັບເຕັກໂນໂລຊີ (Vista Equity Partners) ຊຶ່ງຖືເປັນໜຶ່ງໃນຜູ້ໃຈບຸນເຊື້ອສາຍອັບຟຣິກາທີ່ມີຊື່ສຽງໂດ່ງດັງທີ່ສຸດໃນອາເມຣິກາ ຊຶ່ງບໍລິສັດຂອງ ສະມິດ ມີມູນຄ່າຫຼາຍກວ່າ 46.000 ລ້ານໂດລາ.
ຂະນະທີ່ ສະມິດ ໄດ້ເປີດເຜີຍວ່າ ໃນຖານະທີ່ຄອບຄົວຂອງຕົນເອງອາໄສຢູ່ໃນປະເທດນີ້ເຖິງ 8 ລຸ້ນ ການຈ່າຍໜີ້ໃຫ້ກັບນັກສຶກສາທີ່ຈົບໃນປີ 2019 ນີ້ກໍຖືເປັນການຊ່ວຍເຕີມນ້ຳ ມັນໃຫ້ກັບລົດຂອງນັກສຶກສາຈົບໃໝ່ ເພື່ອໃຫ້ເຂົາເຈົ້າໄດ້ຂັບເຄື່ອນ ແລະ ຕໍ່ຍອດໄປໄດ້ ທັງນີ້ ນັກສຶກສາບາງຄົນແມ່ນມີໜີ້ເຖິງ 200.000 ໂດລາ ຊຶ່ງມີກຳນົດໃຊ້ໜີ້ສິນເປັນໄລຍະເວລາເຖິງ 25 ປີ.
ເມື່ອປີ 2016 ສະມິດ ໄດ້ບໍລິຈາກເງິນຈຳນວນ 50 ລ້ານໂດລາໃຫ້ຄະນະວິສະວະກຳສາດ ມະຫາວິທະຍາໄລຄໍເນລໃນໂຄງການສະໜັບສະໜູນນັກສຶກສາຜິວສີເພດຍິງ ແລະ ໄດ້ບໍລິຈາກອີກ 20 ລ້ານໂດລາໃຫ້ແກ່ພິພິທະພັນປະຫວັດສາດ ແລະ ວັດທະນະທຳສະຫະລັດອາເມຣິກາ-ອາຟຣິກາອີກດ້ວຍ.
ທັງນີ້ ວິກິດໜີ້ສິນຂອງນັກສຶກສາຈຳນວນ 1,5 ລ້ານລ້ານໂດລາຖືເປັນບັນຫາສຳຄັນລະດັບຊາດຂອງອາເມຣິກາ ຂະນະທີ່ ທ່ານ ອາລິຊາເບດ ວໍຣເຣນ ວຸດທິສະມາຊິກລັດແມຊຊາຊູເຊຕ ກໍຖືກຍົກຍ້ອງເລື່ອງແຜນການທີ່ຈະຍົກເລີກໜີ້ສິນຫຼາຍກວ່າ 95% ຂອງຊາວອາເມຣິກາເກືອບ 45 ລ້ານຄົນຊຶ່ງເປັນໜີ້ກູ້ຢືມເພື່ອການສຶກສາ ແລະ ຍັງເປີດໂອກາດໃຫ້ຄົນລຸ້ນໃໝ່ມີສຸຂະພາບທາງການເງິນທີ່ດີ ລວມທັງໃຫ້ຄົນຈຳນວນຫຼາຍສາມາດເຂົ້າເຖິງການສຶກສາໃນລະດັບປະລິນຍາໂທ ແລະ ໂອກາດອື່ນໆໂດຍບໍ່ຕ້ອງຜະເຊີນກັບພາວະເປັນໜີ້ອີກຕໍ່ໄປ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: kapook.com