ເຄີຍສົງໄສກັນນຳບໍ່ ວ່າເປັນຫຍັງເຮົາເຖິງຈຶ່ງບໍ່ຈ່ອຍຈັກເທື່ອ ທັງໆ ທີ່ຄວບຄຸມອາຫານ ແລະ ອອກກຳລັງກາຍແບບເຄັ່ງຄັດແລ້ວກໍຕາມ ນັ້ນກໍເປັນເພາະພຶດຕິກຳການດື່ມຂອງເຮົາຫັນແຫລະ ບາງເທື່ອການດື່ມຂອງເຮົານີ້ແຫລະທີ່ເປັນໂຕແປສຳຄັນທີ່ເຮັດໃຫ້ເຮົາບໍ່ຈ່ອຍຈັກເທື່ອເຊິ່ງຖ້າຫາກບໍ່ເລີກພຶດຕິກຳເຫລົ່ານັ້ນກໍອາດຈະເຮັດໃຫ້ການຫລຸດນ້ຳໜັກເສຍໄປລ້າໆ ເຮົາມາເບິ່ງກັນເລີຍວ່າ ພຶດຕິກຳການດື່ມ ທີ່ເຮັດໃຫ້ເຮົາບໍ່ຈ່ອຍຈັກເທື່ອມື້ນີ້ ນຳມາບອກເລົ່ານັ້ນມີຫຍັງນຳ ຮັບຮອງວ່າຖ້າຮູ້ແລ້ວຕ້ອງຕົກໃຈຢ່າງແນ່ນອນ
ດື່ມນ້ຳຜັກຫມາກໄມ້ແທນການກິນຜັກຫມາກໄມ້ສົດ
ຄົນສ່ວນໃຫຍ່ອາດຄິດວ່າການດື່ມນ້ຳຜັກຫມາກໄມ້ເປັນເຄື່ອງດື່ມທີ່ມີປະໂຫຍດຕໍ່ຮ່າງກາຍ ເຖິງວ່ານ້ຳຜັກຫມາກໄມ້ເຫລົ່ານັ້ນຈະເບິ່ງຄືວ່າດີຕໍ່ສຸຂະພາບແຕ່ທີ່ຈິງແລ້ວມັນເຕັມໄປດ້ວຍນ້ຳຕານແລະຍັງເກືອບບໍ່ມີສານອາຫານຫຍັງທີ່ສຳຄັນຫລວງຫລາຍ ເພາະເມື່ອເຮົາບີບນໍ້າຜັກຫມາກໄມ້ອອກມາແລ້ວ ກໍຈະໄດ້ແຕ່ນ້ຳ ບໍ່ມີແມ່ນແຕ່ໄຟເບີທີ່ມີປະໂຫຍດຕໍ່ຮ່າງກາຍ ເມື່ອເຮົາດື່ມເຂົ້າໄປເຮົາກໍຈະໄດ້ພຽງແຕ່ນ້ຳຕານເທົ່ານັ້ນ ຕ່າງຈາກການຮັບປະທານຜັກຫມາກໄມ້ສົດໆ ເຊິ່ງຈະໄດ້ຮັບໄຟເບີ ແລະໄຟເບີນີ້ ທີ່ໄປຊ່ວຍຫລຸດຜົນກະທົບຕໍ່ລະດັບນ້ຳຕານໃນເລືອດທີ່ມີຕໍ່ຮ່າງກາຍເຊິ່ງຈະເຮັດໃຫ້ຮ່າງກາຍສາມາດນຳກູໂຄດໄປໃຊ້ໄດ້ຢ່າງເໝາະສົມ ດັ່ງນັ້ນແທນທີ່ເລືອກຊື້ນ້ຳຜັກຫມາກໄມ້ມາດື່ມ ປ່ຽນມາກິນຜັກແລະຫມາກໄມ້ກັນໃຫ້ຫລາຍຂຶ້ນຈະດີກວ່າ ນອກຈາກຈະໄດ້ປະໂຫຍດແລ້ວຍັງບໍ່ຕ້ອງໜັກໃຈກັບປະລິມານແຄລໍລີ່ນໍາອີກ
ດື່ມນ້ຳນ້ອຍເກີນໄປ
ມີຄົນຈຳນວນບໍ່ໜ້ອຍທີ່ບໍ່ຮູ້ເລີຍວ່ານ້ຳເປັນສານຕ້ານອານຸມູນອິດສະຫລະທີ່ດີແລະໃກ້ໂຕທີ່ສຸດ ເພາະໄຮໂດນເຈນໃນນ້ຳຈະໄປຊ່ວຍປ້ອງກັນຮ່າງກາຍຈາກສານອານຸມູນອິດສະຫລະ ແລະຄົນສ່ວນໃຫຍ່ກໍມັກຈະດື່ມນ້ຳບໍ່ພຽງພໍ ໂດຍປົກກະຕິແລ້ວຄົນເຮົາຕ້ອງດື່ມນ້ຳປະມານ 8ຈອກຕໍ່ມື້ ຫລື ປະມານ 2ລີດ ການຂາດນ້ຳພຽງແຕ່ໜ້ອຍດຽວກໍສາມາດເຮັດໃຫ້ປະສິດທິພາບໃນການເຮັດວຽກງານຂອງຮ່າງກາຍຫລຸດລົງ ເຊັ່ນການອອກກຳລັງກາຍ ເຈົ້າຈະບໍ່ໄດ້ຮັບປະໂຫຍດຈາກການອອກກຳລັງກາຍເຕັມທີ່ຖ້າຫາກຂາດນ້ຳ
ດື່ມແອວກໍຮໍ
ເຄື່ອງດື່ມທີ່ມີແອວກໍຮໍເປັນເຄື່ອງດື່ມທີ່ເຮັດໃຫ້ຕຸ້ຍໄດ້ຫລາຍທີ່ສຸດໂດຍສະເພາະເບຍທີ່ຄານໂບໄຮເດສູງຫລືມີປະລິມານຂອງກູເຕນເຊິ່ງເປັນໂປຕີນທີ່ມີຢູ່ໃນທັນພືດເຊັ່ນ ເຂົ້າວີດຫລືເຂົ້າບາເລ ເປັນຕົ້ນ ແລະເບຍຍັງເຮັດໃຫ້ເກີດຄວາມປ່ຽນຜັນຂອງນ້ຳໜັກໄດ້ ໂດຍຢ່າງນ້ອຍທີ່ສຸດສິ່ງທີ່ຈະເກີດຖ້າຫາກດື່ມເບຍຫລາຍເກີນໄປນັ້ນກໍຄືທ້ອງອືດຢ່າງຮຸນແຮງ ແລະທີ່ສຳຄັນຍິ່ງດື່ມຫລາຍນັ້ນກໍໝາຍເຖິງຈຳນວນແຄລໍລີ່ທີ່ຫລາຍໄປນໍາ ດັ່ງນັ້ນຄວນຫລີກລ້ຽງການດື່ມແອວກໍຮໍ ແຕ່ຖ້າຫລີກລ້ຽງມັນບໍ່ໄດ້ ກໍຄວນຈະປ່ຽນມາດື່ມ ວາຍແຊມເປນ ຫລືເຄື່ອງດື່ມທີ່ມີສ່ວນປະສົມຂອງໂຊດາຈະດີກວ່າ
ດື່ມນ້ຳອັດລົມທີ່ໃຊ້ສານໃຫ້ຄວາມຫວານແທນນ້ຳຕານ
ເຖິງແມ່ນວ່າເທິງສະຫລາກຂອງນ້ຳອັດລົມຈະບອກວ່າໃຊ້ສານໃຫ້ຄວາມຫວານອື່ນແທນນ້ຳຕານກໍຕາມ ແຕ່ນ້ຳອັດລົມເຫລົ່ານັ້ນກໍບໍ່ແມ່ນສິ່ງທີ່ດີຕໍ່ສຸຂະພາບເລີຍ ເພາະບໍ່ວ່າແບບໃດຕ່ອມຮັບລົດຂອງເຮົາທີ່ຢູ່ເທິງລິ້ນແລະທາງເດີນອາຫານກໍຍັງຮັບລົດຊາດຫວານໄດ້ຢູ່ດີ ເຊິ່ງລົດຊາດຫວານທີ່ເຮົາຮັບຮູ້ໄດ້ນີ້ທີ່ຈະໄປກະຕຸ້ນໃຫ້ເກີດການສ້າງລິນ ໂດຍຮໍໂມນຊະນິດນີ້ຖືເປັນຮໍໂມນໄຂມັນສະສົມ ແລະເຮັດໃຫ້ເຮົາຕຸ້ຍຂຶ້ນ ແຖມສານໃຫ້ຄວາມຫວານແທນນ້ຳຕານຍັງເຮັດໃຫ້ຮ່າງກາຍຕອບສະຫນອງກັບລົດຊາດຫວານເຫລົ່ານີ້ຫລາຍຂຶ້ນກວ່າການກິນນ້ຳຕານເຂົ້າໄປແທ້ໆ ຫລາຍກວ່າ 300-600ເທົ່າ ເຖິງວ່າມັນອາດຈະເຮັດໃຫ້ເຈົ້າຮູ້ສຶກເບື່ອລົດຊາດຫວານແບບທຳມະຊາດທົ່ວໄປໄດ້ແທ້ ແຕ່ມັນກໍຈະບັງຄັບໃຫ້ເຈົ້າກິນຫວານຫລາຍຂຶ້ນເພື່ອໃຫ້ພໍໃຈກັບລົດຫວານນັ້ນເອງ
ການດື່ມຄັອກເທວ
ເຄື່ອງດື່ມຄັອກເທວ ແມ່ນຈະເປັນເຄື່ອງດື່ມທີ່ມີສ່ວນປະສົມຂອງນ້ຳຫມາກໄມ້ ແຕ່ກໍຢ່າລືມວ່າ ຄັອກເທວນັ້ນມີສ່ວນປະສົມຂອງແອວກໍຮໍ ເມື່ອນ້ຳຫມາກໄມ້ທີ່ມີນ້ຳຕານສູງ ກັບ ແອວກໍຮໍ ທີ່ມີນ້ຳຕານຖືກປະສົມລວມກັນ ເຄື່ອງດື່ມຄັອກເທວ ກໍບໍ່ຕ່າງຈາກລະເບີດນ້ຳຕານດີໆ ນອກຈາກຈະເຮັດໃຫ້ໄດ້ຮັບປະລິມານແຄລໍລີ ທີ່ເພີ່ມຂຶ້ນ ນ້ຳຕານທີ່ສູງຂຶ້ນ ຈົນອາດເຮັດໃຫ້ມີຜົນຕໍ່ລະດັບນ້ຳຕານໃນເລືອດແລ້ວ ເຄື່ອງດື່ມຊະນິດນີ້ກໍຍິ່ງເຮັດໃຫ້ຮູ້ສຶກຢາກໄດ້ງ່າຍ ເພາະແອວກໍຮໍນັ້ນ ມີອິດທິພົນຕໍ່ເຄມີໃນສະຫມອງເຮັດໃຫ້ເຮົາຮູ້ສຶກຢາກກິນອາຫານຂີ້ເຫຍື້ອ ຈົນອາດເຮັດໃຫ້ຮູ້ສຶກຢາກຂຶ້ນມາ ຫລັງຈາກກັບຈາກງານລ້ຽງຕອນເດິກຂຶ້ນມາກໍໄດ້ ດັ່ງນັ້ນຄວນຈະຫລີກລ້ຽງການດື່ມເຄື່ອງດື່ມຄັອກເທວທີ່ມີແອນກໍຮໍ ຫລື ນ້ຳຫມາກໄມ້ຫວານໆ ປະສົມຢູ່
ດື່ມກາເຟຫລາຍຈົນເກີນໄປ
ເຖິງແມ່ນວ່າກາແຟສາມາດຊ່ວຍກະຕຸ້ນໃຫ້ຮູ້ສຶກຕື່ນໂຕໄດ້ເຊິ່ງຈະເຮັດໃຫ້ເຈົ້າເຮັດວຽກໄດ້ຢ່າງມີປະສິດທິພາບຫລາຍຂຶ້ນ ແຕ່ຖ້າຫາກເຈົ້າດື່ມກາຍມື້ລະ 3ຈອກອາດຈະໄດ້ຮັບຜົນເສຍແທນ ເພາະການດື່ມກາແຟຮັບເອົາຄາເຟອີນເຂົ້າໄປໃນຮ່າງກາຍຫລາຍເກີນໄປ ອາດຈະເຮັດໃຫ້ເຈົ້າຮູ້ສຶກເມື່ອຍແລະເຮັດໃຫ້ຮ່າງກາຍໄດ້ຮັບ ອະດາຣິນນາລິນບໍ່ພຽງພໍໃນໄລຍະເວລາທີ່ຕ້ອງການອະດາຣິນນາລິນແທ້ໆ ເຊັ່ນ ເວລາອອກກຳລັງກາຍໄດ້ ນອກຈາກນີ້ ການດື່ມກາແຟທີ່ໃສ່ ຄີມ ນົມ ນ້ຳເຊື່ອມ ຫລື ນ້ຳຕານລົງໄປ ຈະເຮັດໃຫ້ເຈົ້າໄດ້ຮັບແຄລໍລີເພີ່ມ 120ແຄລໍລີ ຕໍ່ມື້ ແລະ ອາຈະໃຫ້ນ້ຳໜັກເຈົ້າເພີ່ມຂຶ້ນໄດ້ເຖິງ 6ກິໂລກຣາມຕໍ່ປີ ແລະ ຍິ່ງຖ້າເປັນ ລາເຕ້ ກໍຈະຍິ່ງເຮັດໃຫ້ເຈົ້າໄດ້ຮັບແຄລໍລີ່ເຖິງ 250 – 300ແຄລໍລີ ຕໍ່ການດື່ມພຽງໜຶ່ງຈອກ
ການຫລຸດນ້ຳໜັກທີ່ໄດ້ຜົນ ນອກຈາກຈະຕ້ອງມີພຶດຕິກຳການກິນທີ່ດີແລ້ວ ພຶດຕິກຳການດື່ມກໍຈະຕ້ອງ ເໝາະສົມ ແລະ ເລືອກເຄື່ອງດື່ມໃຫ້ຖືກວິທີນໍາອີກ ເພາະເຄື່ອງດື່ມບາງຊະນິດອາດຈະເບິ່ງມີປະໂຫຍດແຕ່ທີ່ຈິງແລ້ວອາດຈະສົ່ງຜົນກະທົບຕໍ່ການຫລຸດນ້ຳໜັກໄດ້ ດັ່ງນັ້ນຄວນຈະສຶກສາ ແລະ ອ່ານສະຫລາກຜະລິດຕະພັນໃຫ້ດີກ່ອນຈະໄດ້ບໍ່ຕ້ອງມາເສຍໃຈພາຍຫລັງ