ບັນຫາຜິວແຫ້ງ ເກີດຈາກຜິວຂັບນ້ຳມັນອອກມາໜ້ອຍເກີນໄປ ຈົນເຮັດໃຫ້ຂາດຄວາມຊຸ່ມຊື່ນ ແຫ້ງຈົນລອກ ແລະ ຫຍາບ ອັນເກີດຈາກສະພາບອາກາດ ສະພາບແວດລ້ອມ ຫລືປັດໄຈອື່ນ ໆ ທີ່ເຮັດໃຫ້ເກີດຜິວແຫ້ງໄດ້ແບບບໍ່ຮູ້ຕົວ ເຊັ່ນ ຢູ່ໃນຫ້ອງແອທີ່ອາກາດເຢັນໆເປັນເວລາດົນໆ ອາບນ້ຳອຸ່ນເລື້ອຍໆ ຫລື ແມ່ນແຕ່ໃຊ້ສະບູ່ທີ່ມີຟອງຫລາຍເກີນໄປ ກໍເປັນສາເຫດໃຫ້ຜິວແຫ້ງຫຍາບໄດ້ຄືກັນ ສຳລັບສາວໆ ທີ່ກຳລັງວິຕົກກັງວົນ ຫລື ຢາກສະແດງຜິວງາມໃສຂາດຄວາມແຫ້ງ ບັນຫາເຫລົ່ານີ້ຈະໝົດໄປຖ້າຫາກມີວິທີການບຳລຸງປິ່ນປົວທີ່ຖືກວິທີ
1.ບໍາລຸງຜິວດ້ວຍໝາກໄມ້ ຫມາກໄມ້ນອກຈາກຈະກິນເພື່ອເຮັດໃຫ້ຮ່າງກາຍໄດ້ຮັບວິຕາມິນທີ່ເປັນປະໂຫຍດແລ້ວ ຍັງສາມາດນຳມາບຳລຸງຜິວເພື່ອຫລຸດຜິວແຫ້ງໄດ້ເປັນຢ່າງດີນໍາອີກ ເຊັ່ນ ການພອກຜິວດ້ວຍກ້ວຍຫອມ ໝາກມ່ວງສຸກ ຫລື ໝາກນັດເຊິ່ງຫມາກໄມ້ທັງໝົດນີ້ ຈະສາມາດເຮັດໃຫ້ຜິວແຫ້ງກັບ ມານຸ້ມ ແລະ ຊຸ່ມຊືນນໍາອີກ ເປັນວິທີບຳລຸງຜິວແຫ້ງແບບລຽບງ່າຍ ແລະ ປະຫຍັດສຸດໆ
2. ໃຊ້ຜະລິດຕະພັນບຳລຸງຜິວຢ່າງສະໝໍ່າສະເໝີ ສຳລັບສາວໆ ທີ່ມີຜິວແຫ້ງຫລາຍ ຄວນຈະເລືອກໃຊ້ຜະລິດຕະພັນສຳລັບຜິວແຫ້ງທີ່ມີສ່ວນປະສົມຂອງມອຍເຈີໄລເຊີ ຫລາຍເປັນພິເສດ ເພາະມອຍເຈີໄລເຊີ ຈະເພີ່ມຄວາມຊຸ່ມຊື່ນໃຫ້ກັບຜິວ ແລະ ປົກປ້ອງບໍ່ໃຫ້ນ້ຳໃນຜິວລະເຫີຍອອກໄປ ທັງນີ້ຜະລິດຕະພັນທີ່ມີມອຍເຈີໄລເຊີເປັນສ່ວນປະສົມມີໃຫ້ເລືອກໃຊ້ໄດ້ຫລາຍຮູບແບບ ເຊັ່ນ ຄີມ ໂລຊັ່ນ ຫລື ແມ່ນແຕ່ສະບູ່ອາບນ້ຳ
3. ນວດຜິວດ້ວຍນ້ຳມັນໝາກພ້າວ ພຽງແຕ່ນຳມາທາ ແລະ ນວດລົງເທິງຜິວໜັງ ຈະຊ່ວຍເຮັດໃຫ້ຜິວໜັງມີຄວາມຊຸ່ມຊື່ນນຸ່ມນວນຂຶ້ນ ເພາະນ້ຳມັນໝາກພ້າວຈະຊຶມເຂົ້າສູ່ຜິວໜັງໄດ້ງ່າຍ ສົ່ງຜົນໃຫ້ຜິວໜັງໄດ້ຮັບການບຳລຸງຢ່າງເຕັມທີ່ ອີກຢ່າງຍັງມີສານຕ້ານ ອານຸມູນອິດສະຫລະ ຊ່ວຍຊະລໍການເກີດຮອຍກ່ອນໄວໄດ້ເປັນຢ່າງດີ ແຖມຍັງຊ່ວຍກະຕຸ້ນໃຫ້ຜິວໜັງຂັດເຊລໃໝ່ ນອກຈາກຈະຊ່ວຍຫລຸດບັນຫາຜິວແຫ້ງໄດ້ແລ້ວຍັງເບິ່ງອ່ອນໄວຂຶ້ນນໍາອີກ
4. ຮັບປະທານອາຫານເສີມ ອີກໜຶ່ງສາເຫດສຳຄັນທີ່ເຮັດໃຫ້ເກີດບັນຫາຜິວແຫ້ງອາດມາຈາກຮ່າງກາຍຂາດວິຕາມິນ ດັ່ງນັ້ນການກິນຜະລິດຕະພັນອາຫານເສີມຕ່າງໆ ຈະສາມາດຊ່ວຍເສີມສ້າງຄວາມສົມດຸນໃຫ້ກັບຮ່າງກາຍ ແລະ ຟື້ນຟູສະພາບຜິວແຫ້ງໃຫ້ກັບມານຽນນຸ່ມອີກເທື່ອໄດ້ ໂດຍສະເພາະອາຫານເສີມທີ່ມີສ່ວນປະກອບເພີ່ມຄວາມຊຸ່ມຊື່ນໃຫ້ກັບຜິວແບບວິຕາມິນເອ ແລະ ວິຕາມິນອີ ທັງນີ້ອາຫານເສີມບາງຊະນິດຍັງມີຄໍລາເຈນ ຊ່ວຍໃຫ້ຜິວງາມເຄັ່ງຕຶງນໍາອີກ
5. ດື່ມນ້ຳຫລາຍໆ ວິທີງ່າຍໆ ທີ່ສາວຜິວແຫ້ງທັງຫລາຍຄວນປະຕິບັດເປັນຢ່າງຍິ່ງ ເພາະຖ້າຫາກຮ່າງກາຍຂາດນ້ຳຫລາຍໆ ນັ້ນກໍໝາຍຄວາມວ່າ ຜິວຂອງເຮົາກໍຈະຂາດຄວາມຊຸ່ມຊື່ນນໍາໄປອີກ ດັ່ງນັ້ນຄວນດື່ມນ້ຳໃຫ້ໄດ້ຢ່າງຕ່ຳມື້ລະ 2 ລີດ ຫລື ປະມານ 8-10ຈອກ ເພື່ອຄືນຄວາມຄວາມຊຸ່ມຊື່ນໃຫ້ກັບຜິວ ນອກຈາກຜິວຈະກັບມາງາມແລ້ວຍັງຈະຊ່ວຍເລື່ອງລະບົບຂັບຖ່າຍໃຫ້ດີຂຶ້ນນໍາອີກ
ໝົດກັງວົນເລື່ອງຜິວແຫ້ງແລ້ວ ສາວຜິວແຫ້ງທັງຫລາຍຢ່າລືມເບິ່ງແຍງຕົນເອງ ຢ່າງສະມ່ຳສະເໝີ ທີ່ສຳຄັນອອກກຳລັງກາຍຄວບຄູ່ກັນໄປ ແລະ ພັກຜ່ອນໃຫ້ພຽງພໍຈະຊ່ວຍໃຫ້ສະພາບຜິວກັບມາດີໄດ້ໄວຍິ່ງຂຶ້ນ