ທະນາຄານໂລກ (World Bank: WB) ໄດ້ແຈ້ງເຕືອນ ໃນໂອການວັນສາກົນລຶບລ້າງຄວາມທຸກຍາກ 17 ຕຸລາ ອອກມາວ່າ: ເກືອບເຄິ່ງໜຶ່ງຂອງຈຳນວນປະຊາກອນໃນໂລກ ທີ່ຍັງໃຊ້ຊີວິດຢູ່ກັບລາຍຮັບບໍ່ເຖິງ 5,5 ໂດລາສະຫະລັດຕໍ່ມື້ ເຖິງວ່າໄດ້ຮັບຜົນປະໂຫຍດຕ່າງໆຈາກການເຕີບໂຕເສດຖະກິດກໍຕາມ ແຕ່ຈຳນວນຄົນທຸກຍາກຍັງຢູ່ໃນລະດັບສູງຍ້ອນການຈັດສັນບໍ່ສະໝໍ່າສະເໝີ.
ບົດລາຍງານໄດ້ເປີດເຜີຍຕາມກຳນົດສະໄໝ 6 ເດືອນຕໍ່ເທື່ອ ລະບຸວ່າ: “WB ໄດ້ພິຈາລະນາຄວາມທຸກຍາກພາຍໃຕ້ມຸມມອງທີ່ກວ້າງຂວາງກວ່າເກົ່າ ເພື່ອກຳນົດບັນດາປະເທດທີ່ຖອຍຫຼັງທີ່ພະຍາຍາມຫຼຸດຜ່ອນຄວາມທຸກຍາກ ເຊິ່ງຢູ່ໃນສະພາບການທີ່ມີຈຳນວນຄົນທຸກຍາກທີ່ສຸດ (ມີລາຍຮັບບໍ່ເຖິງ 1,90 ໂດລາສະຫະລັດຕໍ່ວັນ) ແລະ ຍັງສືບຕໍ່ຫຼຸດລົງໃນຊຸມປີມໍ່ໆມານີ້”. ສຳລັບມາດຕະຖານການເປີດກວ້າງກ່ຽວກັບຄວາມທຸກຍາກຂອງ WB ເຫັນວ່າ: “ຈຳນວນຄົນທຸກຍາກໃນໂລກຍັງຢູ່ໃນລະດັບສູງທີ່ບໍ່ສາມາດຍອມຮັບໄດ້ ໃນຂະນະທີ່ຜົນປະໂຫຍດຕ່າງໆ ຈາກການເຕີບໂຕເສດຖະກິດ ພັດຖືກຈັດສັນຢ່າງບໍ່ສະໝໍ່າສະເໝີຢູ່ໃນພາກພື້ນຕ່າງໆກໍຄືປະເທດຕ່າງໆໃນໂລກ”.
ນັບແຕ່ປີ 2013 ຮອດປີ 2015 ຈຳນວນຄົນທຸກຍາກໃນໂລກໄດ້ຫຼຸດລົງກວ່າ 68 ລ້ານຄົນ (ເທົ່າກັບຈຳນວນປະຊາກອນຂອງໄທ ຫຼື ອັງກິດ) ເຖິງວ່າຈັງຫວະການເຕີບໂຕຂອງໂລກຊັກຊ້າລົງໃນຊຸມປີມໍ່ໆມານີ້ກໍຕາມ ຈາກລາຍຮັບທີ່ 5,50 ໂດລາສະຫະລັດຕໍ່ວັນ ອັດຕາສ່ວນຄົນທຸກຍາກໃນໂລກຫຼຸດລົງຈາກ 67% ໃນປີ 1990 ແລະ ຍັງເຫຼືອ 46% ໃນປີ 2015. WB ແຈ້ງໃຫ້ຮູ້ເມືອເດືອນກັນຍາທີ່ຜ່ານມາວ່າ: “ອັດຕາສ່ວນຄົນທຸກຍາກທີ່ສຸດໄດ້ຫຼຸດລົງ 10% ໃນປີ 2015 ກ່ອນໜ້ານີ້, ສອງທົດສະຕະວັດ ມີ 60% ຂອງຈຳນວນປະຊາກອນໂລກທີ່ດຳລົງຊີວິດຢູ່ບັນດາປະເທດທີ່ມີລາຍຮັບຕໍ່າ ແລະ ອັດຕາສ່ວນນີ້ໄດ້ຫຼຸດລົງ 9% ໃນປີ 2015”.
ຮຽບຮຽງໂດຍ: ໃບບົວຈັນ ທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່
ຮູບພາບຈາກ: www.asianews.it