ທ່ານ ວິຈິດ ແກ້ວບົວພາ ເຈົ້າເມືອງ ເມືອງປາກຊ່ອງ ໄດ້ເຜີຍຕໍ່ຜູ້ສື່ຂ່າວໃນອາທິດຜ່ານມາວ່າ: ເມືອງປາກຊ່ອງທີ່ຂຶ້ນຊື່ວ່າຜືນແຜ່ນດິນຄໍາ ເຊິ່ງໄດ້ຮັບການພິຈາລະນາ ແລະ ວາງແຜນພັດທະນາຂະໜາດໃຫຍ່ ໂດຍກວມເອົາການສ້າງພະພຸດທະຮູບອົງໃຫຍ່ສູງ 108 ແມັດ, ສ້າງສວນພຶດສາຊາດເຕັມໄປດ້ວຍດອກໄມ້ ແລະ ພັນໄມ້ນາໆຊະນິດ, ສ້າງເປັນແຫຼ່ງທ່ອງທ່ຽວກະສິກໍາຕິດພັນກັບແຫຼ່ງທ່ອງທ່ຽວທໍາມະຊາດ ແລະ ວັດທະນະທໍາ ເຊິ່ງທັງໝົດທີ່ກ່າວມານັ້ນແມ່ນຄວາມພະຍາຍາມຂອງລັດຖະບານ ກໍຄືອໍານາດການປົກຄອງແຂວງດັ່ງກ່າວ ເພື່ອດຶງດູດການທ່ອງທ່ຽວ ແລະ ການພັດທະນາສີຂຽວແບບຍືນຍົງ.
ພ້ອມນັ້ນ, ທ່ານ ວິຈິດ ໄດ້ກ່າວໃຫ້ຮູ້ອີກຕື່ມວ່າ: ເມືອງປາກຊ່ອງ ເປັນດິນແດນທີ່ໜ້າສົນໃຈຂອງນັກລົງທຶນທັງພາຍໃນ-ຕ່າງປະເທດ. ປັດຈຸບັນ, ມີ 74 ໂຄງການລົງທຶນຈາກພາກສ່ວນທັງພາຍໃນ ແລະ ຕ່າງປະເທດເຂົ້າໄປລົງທຶນພາຍໃນເມືອງດັ່ງກ່າວ. ໃນນັ້ນ, ເນື້ອທີ່ປູກກາເຟມີ 45.000 ເຮັກຕາ, ເນື້ອທີ່ປູກພືດຜັກ 1.700 ເຮັກຕາ ແລະ ດິນອີກຈໍານວນໜຶ່ງທີ່ໄດ້ສະຫງວນໄວ້ເປັນແຫຼ່ງທ່ອງທ່ຽວ ລວມທັງວຽກບຸລິມະສິດຂອງເມືອງ.
ໃນປີ 2017 ຜ່ານມາມີນັກທ່ອງທ່ຽວປະມານ 189.000 ຄົນ ເຂົ້າມາຢ້ຽມຢາມ ແລະ ສໍາຜັດອາກາດໜາວ ໃນ 37 ແຫຼ່ງທ່ອງທ່ຽວທີ່ໂດ່ງດັງຂອງເມືອງປາກຊ່ອງ. ຢ່າງໃດກໍດີ, ປະຊາຊົນໃນເມືອງປາກຊ່ອງ ມີຊີວິດດີຂຶ້ນເປັນກ້າວໆນັ້ນຍ້ອນການເຮັດສວນກາເຟ ແລະ ປູກພືດປ້ອນຕະຫຼາດພາຍໃນ-ຕ່າງປະເທດ ໂດຍສະເພາະກາເຟລາວໄດ້ສົ່ງອອກໄປປະເທດສະມາຊິກອາຊຽນ, ຍີ່ປຸນ, ສ.ເກົາຫລີ, ອາເມລິກາ, ເອີຣົບ ແລະ ປະເທດອື່ນໆ, ສ່ວນພືດຜັກກໍສົ່ງເຂົ້າໄປຕະຫລາດໄທ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: ປະເທດລາວ