ນາທີນີ້ຄືສິບໍ່ມີໃຜບໍ່ຮູ້ຈັກນັກຮ້ອງສາວຂາເລາະຊື່ດັງຂອງປະເທດໄທ “ລຳໄຍ ໄຫທອງຄຳ” ຫຼ້າສຸດເມື່ອວັນທີ 15 ພະຈິກ 2017 ກໍ່ໄດ້ເກີດມີກະແສຮ້ອນແຮງໃນໂລກໂຊຊ້ຽວຂຶ້ນມາທັນທີ ເມື່ອສາວ ລຳໄຍ ພ້ອມທີມງານໄດ້ໄປຖ່າຍທຳວິດີໂອປະກອບເພງ “ປາຄໍ່ໃຫຍ່ໄວອາກ້າ” ຢູ່ເມືອງວັງວຽງ ສປປ ລາວ ເຊິ່ງຢູ່ໃນຄລິບວິດີໂອດັ່ງກ່າວຈະເຫັນວ່າ ນາງຢູ່ໃນຊຸດນຸ່ງສັ້ນ ເຕັ້ນຮ່ອນຕາມຈັງຫວະດົນຕີເພງ ເຊິ່ງໄດ້ເຮັດໃຫ້ຊາວລາວຈຳນວນຫຼາຍອອກມາສະແດງຄວາມຄິດເຫັນວ່າ ສະຖານທີ່ແຫ່ງນັ້ນເປັນເມືອງທ່ອງທ່ຽວທີ່ມີຊື່ສຽງຂອງລາວ ແລະ ມີວັດທະນະທຳອັນດີງາມຂອງຊາດ ໃນການທີ່ສາວລຳໄຍ ມາເຮັດແນວນີ້ແມ່ນບໍ່ເໝາະສົມ ອາດເປັນການທຳລາຍພາບລັກ ແລະ ສະເໜ່ຂອງເມືອງວັງວຽງ.
ຫຼາຍຄົນຫລາຍມຸມມອງຕ່າງຄວາມຄິດ ເລີຍເກີດມີດຣາມ່າຂັດແຍ້ງຄວາມຄິດເຫັນກັນໃນໂລກໂຊຊ້ຽວບາງກຸ່ມຄົນກໍ່ວ່າບໍ່ເໝາະສົມ ແຕ່ບາງກຸ່ມຄົນກໍ່ເບິ່ງເລື່ອງນີ້ເປັນເລື່ອງທຳມະດາບໍ່ຕ່າງຫຍັງຈາກຊາວຕ່າງປະເທດມາທ່ຽວໃນເມືອງວັງວຽງ ແລະ ອີກຢ່າງສະຖານທີ່ທີ່ສາວ ລຳໄຍ ຖ່າຍທຳວິດີໂອເພງນັ້ນເປັນພຽງແຫລ່ງທ່ອງທ່ຽວພັກຜ່ອນທົ່ວໄປ ບໍ່ແມ່ນຢູ່ຈຸດສຳຄັນທາງສາສະໜາ.
ເອົາເປັນວ່າເລື່ອງນີ້ມັນເປັນເລື່ອງລະອຽດອ່ອນທາງດ້ານຄວາມຄິດ ແຕ່ລະຄົນຈະມີມຸມມອງຕ່າງກັນອອກໄປ ແຕ່ການຈະສະແດງຄວາມຄິດເຫັນແມ່ນໃຫ້ຢູ່ໃນຂອບເຂດທີ່ເໝາະສົມ ເພື່ອບໍ່ໃຫ້ກະທົບທັງສອງຝ່າຍ.
https://www.facebook.com/sunthon.buon.1/videos/1964768277127734/