ສຳນັກຂ່າວຕ່າງປະເທດລາຍງານຈາກນະຄອນຫຼວງ ໂຊລ ປະເທດເກົາຫຼີໃຕ້ ເມື່ອວັນທີ 26 ສິງຫານີ້ວ່າ ສຳນັກຂ່າວກາງເກົາຫຼີ (ເຄຊີເອັນເອ) ລາຍງານວ່າ ທ່ານ ຄິມ ຈອງ ອຶນ ຜູ່ນຳສູງສຸດຂອງເກົາຫຼີເໜືອ ລົງພື້ນທີ່ສັງເກດການຝຶກຊ້ອມຮົບຄັ້ງໃຫຍ່ຂອງກອງທັບປະຊາຊົນເກົາຫຼີ (ເຄພີເອ) ເຊິ່ງເປັນການກຽມພ້ອມຂອງທະຫານໃນການໂຈມຕີເກາະ “ແບງນາຍອງ” ແລະ ເກາະ “ຍອນພະຍອງ” ໂດຍເກາະທັງສອງແມ່ນເປັນເຂດແດນຂອງທະເລເຫຼືອງລະຫວ່າງເກົາຫຼີເໜືອ ແລະ ເກົາຫຼີໃຕ້
ລາຍງານດັ່ງກ່າວຂອງເຄຊີເອັນເອ ເກີດຂຶ້ນໃນເວລາດຽວກັບທີເກົາຫຼີເໜືອຍິງຂີປະນາວຸດ 3 ລູກ ອອກຈາກແຂວງ ຄັງວອນ ໃນພາກຕະເວັນອອກຂອງປະເທດ ເມື່ອຊ່ວງຮຸ່ງເຊົ້າຂອງວັນເສົາຕາມເວລາທ້ອງຖິ່ນ ໂດຍຂີປະນາວຸດເດີນທາງມຸ່ງໜ້າໄປທາງທິດຕະເວັນອອກສຽງເໜືອເປັນໄລຍະທາງປະມານ 250 ກິໂລແມັດ ກ່ອນຕົກລົງໃນທະເລຍີ່ປຸ່ນ ເຊິ່ງຄວາມເຄື່ອນໄຫວນີ້ໄດ້ເກີດຂຶ້ນໃນຊ່ວງທີ່ກອງທັບເກົາຫຼີໃຕ້ ແລະ ສະຫະລັດຢູ່ໃນໄລຍະສຸດທ້າຍຂອງການຊ້ອມຮົບຮ່ວມກັນ ເຊິ່ງຈະຈົບລົງໃນວັນທີ 31 ສິງຫາ ທີ່ຈະມາຮອດນີ້