ໃນ​ວັນ​ທີ 4 ສິງຫາ ຜ່ານ​ມາ ທີ່​ສະຫະພັນ​ບານເຕະ​ແຫ່ງ​ຊາດ​ລາວ ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ​ສປປ ລາວ ໄດ້​ລົງ​ຕິດຕາມ​ເພື່ອ​ໃຫ້​ກຳລັງ​ໃຈ​ຄູ​ເຝິກ ແລະ ນັກກີລາ​ບານເຕະ​ທີ່​ເປັນ​ຕົວ​ແທນ​ເຂົ້າ​ຮ່ວມ​ການ​ແຂ່ງຂັນ​ມະ​ຫະ​ກຳ​ຊີເກມ ຄັ້ງ​ທີ 29 ທີ່​ປະເທດ​ມາ​ເລ​ເຊຍ ທ້າຍ​ເດືອນ​ສິງຫາ​ນີ້ ໂດຍ​ເນັ້ນ​ໃຫ້​ນັກກີລາ​ທຸກ​ຄົນ​ຕ້ອງ​ຫຼິ້ນ​ບານ​ຕາມ​ແຜນ​ຂອງ​ຄະນະ​ຄູ​ເຝິກ​ວາງ​ເອົາ​ໄວ້ ຫຼິ້ນ​ເປັນ​ທີມ​ດຽວ​ກັນ ປາສະຈາກ​ການ​ລົ້ມ​ບານ ແລະ ຖ້າ​ສາມາດ​ຜ່ານ​ເຂົ້າ​ຮອບ 4 ທີມ ລັດຖະບານ​ຈະ​ມອບ​ທຶນ​ຊ່ວຍເຫຼືອ​ໃຫ້​ສະຫະພັນ​ແຫ່ງ​ຊາດ​ລາວ ຈຳນວນ 1 ຕື້​ກີບ.

ໃນ​ໂອກາດ​ດັ່ງກ່າວ ທ່ານ​ຮອງ​ນາຍົກລັດຖະມົນຕີ ໄດ້​ກ່າວ​ຍ້ອງຍໍ​ຊົມເຊີຍ​ສະຫະພັນ​ບານເຕະ​ແຫ່ງ​ຊາດ​ລາວ ທີ່​ໄດ້​ສ້າງ​ນັກກີລາ​ສືບ​ທອດ​ຫຼາຍໆ​ລຸ້ນ ເຊິ່ງ​ສາມາດ​ສ້າງ​ຊື່​ສຽງ​ໃຫ້​ວົງ​ການ​ກີລາ​ລາວ ເວົ້າ​ລວມ ເວົ້າ​ສະເພາະ ນັກກີລາ​ບານເຕະ​ຍິງ​ລຸ້ນ​ບໍ່​ເກີນ​ອາຍຸ 16 ປີ ຫຼື ຢູ 16 ລາວ​ທີ່​ໄດ້​ສ້າງ​ຊື່​ສຽງ​ໃນ​ລະດັບ​ສາ ກົນ​ມາ​ໃຫ້​ກັບ ​ສປປ ລາວ ໃນ​ໄລຍະ​ຜ່ານ​ມາ ນອກຈາກ​ນັ້ນ ທ່ານ​ຍັງ​ໄດ້​ເນັ້ນ​ໜັກ​ໃຫ້​ກັບ​ບັນດາ​ຄະນະ​ນຳ ແລະ ນັກກີລາ​ບານເຕະ​ທີ່​ຜ່ານ​ການ​ຄັດ​ເລືອກ​ຈຳນວນ 26 ຄົນ ເປັນ​ຕົວ​ແທນ​ໃຫ້ ​ສປປ ລາວ ເຂົ້າ​ຮ່ວມ ການ​ແຂ່ງຂັນ​ໃນ​ມະ​ຫະ​ກຳ​ຊີເກມ ຄັ້ງ​ທີ 29 ປະເທດ​ມາ​ເລ​ເຊຍ ເປັນ​ເຈົ້າພາບ ເຊິ່ງ​ຈະ​ຈັດ​ໃນ​ລະຫວ່າງ ວັນ​ທີ 19-31 ສິງຫາ 2017 ນີ້ ໃຫ້​ເອົາໃຈໃສ່​ເຝິກຊ້ອມ​ຢ່າງ​ເຕັມທີ່ ເພື່ອ​ສ້າງ​ຊື່​ສຽງ​ໃຫ້​ກັບ ​ສປປ ລາວ ແລະ ສາກົນ.

ແຫລ່ງຂ່າວ: ໜັງສືພິມວຽງຈັນໃໝ່