ຜ່ານ​ມາປາ­ກົດ​ມີ​ຫາງ​ສຽງ​ບາງ​ປະ­ການ ​ທີ່​ມີລັກ­ສະ­ນະ​ຫຍໍ້­ທໍ້​ຂອງ​ລັດ­ຖະ­ກອນບາງ​ຄົນ ​ຂາດ​ຈັນຍາ​ບັນ ຫຼື ຂາດ​ຄຸນ­ສົມ­ບັດ ເຊິ່ງ​ບາງ​ຄົນ​ກໍ່​ອາດ​ລະເມີດ​ວິ­ໄນ ເພື່ອ​ເຫັນ­ແກ່​ຜົນ​ປະ­ໂຫຍດ​ເລັກ​ໜ້ອຍ ຫຼື ຈະ​ເປັນ​ຜົນ​ປະ­ໂຫຍດ​ໃຫຍ່​ຫຼວງ​ກໍ່​ຕາມ ຖ້າ­ວ່າ​ມັນເສຍ​ຫາຍ​ແກ່​ສ່ວນ​ລວມ​ແລ້ວ ໜ່ວຍ​ງານ​ຈັດ​ຕັ້ງດັ່ງ­ກ່າວ​ຄວນ​ລົງ​ວິ­ໄນ​ກັນ​ຢ່າງ​ເຂັ້ມ​ງວດ ເພາະ​ມັນຈະ​ລຸ­ກລາມເຮັດ​ໃຫ້​ຂາດ​ຄວາມ​ເຊື່ອ​ຖື ແລະ ການຈັດ​ຕັ້ງ​ດັ່ງ­ກ່າວ​ເສຍ​ຫາຍ ເພາະ​ລະ­ບົບ​ບໍ­ລິ­ຫານວຽກ​ຂາດ​ຫຼັກ­ການ.

ບົດ​ນີ້​ຜູ້​ຂຽນ​ຢາກ​ເວົ້າ​ຄືນ​ເຖິງ​ກົດ­ໝາຍ​ລັດ​ຖະກອນ ເພື່ອ​ເນັ້ນ​ໃຫ້​ເອົາ­ໃຈ­ໃສ່​ຫຼາຍ​ຂຶ້ນ​ໃນ​ການປະ­ຕິ­ບັດ​ໜ້າ­ທີ່ ເຊິ່ງ​ຢູ່​ໃນເອ­ກະ­ສານ​ທີ່​ເປັນ​ບົດ​ສັງລວມ​ແຈ້ງ​ຕອບ​ຄຳ​ສະ­ເໜີ​ຂອງ​ປະ­ຊາ­ຊົນ ທີ່​ຄະ­ນະເລ­ຂາ­ທິ­ການ​ສະ­ພາ​ປະ­ຊາ­ຊົນ​ນະ­ຄອນ­ຫຼວງວຽງຈັນ ​ສົ່ງ​ເຖິງ​ສື່​ມວນ​ຊົນ ເລກ​ທີ 228/ຄລ ສປ​ນວ ລົງ​ວັນ​ທີ 12/5/2017 ກໍ່​ສະ­ທ້ອນ​ໃຫ້​ເຫັນ​ວ່າ ມີລັດ­ຖະ­ກອນ​ບາງທ່ານ​ລະ­ເມີດ​ລະ­ບຽບ​ວິ­ໄນ ແຕ່​ບົດນີ້​ພຽງ​ຢາກ​ຍົກ​ມາ​ສະ­ເໜີ​ບາງ​ມາດ­ຕາ​ຂອງ​ຄຳແນະ­ນຳ ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ​ວ່າ​ດ້ວຍ​ພະນັກ​ງານ-ລັດ­ຖະ­ກອນ ກະ­ຊວງ​ພາຍ​ໃນ ລົງ​ວັນ​ທີ 2 ສິງ­ຫາ 2016 ເຊິ່ງ​ຄຳ​ສັ່ງ​ແນະ­ນຳ​ດັ່ງ­ກ່າວ ເປັນການ​ຮັດ­ກຸມ​ຂຶ້ນ​ຕື່ມ​ແກ່​ການ­ຈັດ­ຕັ້ງ​ປະ­ຕິ­ບັດ​ຂອງກົດ­ໝາຍ​ລັດ­ຖະ­ກອນ ເຊັ່ນ: ໃນ​ມາດ­ຕາ 18 ການບັນ­ຈຸ​ເຂົ້າ​ເປັນ​ລັດ­ຖະ­ກອນ 8.1: ການ​ບັນ­ຈຸ​ລັດ​ຖະກອນ​ໃໝ່ ການ​ບັນ­ຈຸ​ພະ­ນັກ­ງານ​ຈາກ​ກຳ­ລັງ​ປະກອບ​ອາ­ວຸດ (ກະ­ຊວງ​ປ້ອງ​ກັນ​ປະ­ເທດ ກະ­ຊວງປ້ອງ​ກັນ​ຄວາມ​ສະ­ຫງົບ)… ໃຫ້​ບັນ­ຈຸ​ເຂົ້າ​ຕາມ​ຕົວເລກ​ລັດ­ຖະ­ກອນ​ໃໝ່​ທີ່​ລັດ­ຖະ­ບານ​ອະ­ນຸ­ມັດ​ໃນ​ແຕ່ລະ​ປີ​ງົບ­ປະ­ມານ ແລະ ອີງ­ໃສ່​ຕຳ­ແໜ່ງ​ງານ​ທີ່​ກຳນົດ​ໄວ້​ຢູ່​ໃນ​ໂຄງ​ປະ­ກອບ​ການ­ຈັດ­ຕັ້ງ​ຢ່າງ​ຈະ­ແຈ້ງ ແລະ ໃຫ້​ບັນ­ຈຸ​ເຂົ້າ​ໃນ​ງວດ​ໜຶ່ງ ແລະ ງວດ​ສາມຂອງ​ປີ​ງົບ­ປະ­ມານ 8.2 ບຸກ­ຄົນ​ທີ່​ຈະ​ຖືກ​ບັນ­ຈຸ​ເຂົ້າເປັນ​ລັດ­ຖະ­ກອນ​ໃໝ່ ຕ້ອງ​ໄດ້​ຜ່ານ​ການ​ສອບ­ເສັງ ແລະ ເລືອກ­ເຟັ້ນ​ເອົາ​ຄົນ​ດີ-ຄົນ​ເກ່ງ ມີ​ທັດ­ສະ­ນະຄະ­ຕິ​ການ­ເມືອງ​ໜັກ​ແໜ້ນ ມີ​ຄຸນ­ສົມ­ບັດ​ສິນ​ທຳປະ­ຕິ­ວັດ ເຄົາ­ລົບ​ຕໍ່​ການ­ຈັດ­ຕັ້ງ ແລະ ກົດ­ໝາຍ ມີຈັນ​ຍາ​ບັນ ມີ​ປະ­ຫວັດ​ທີ່​ຈະ­ແຈ້ງ ມີ​ຄຸນ­ສົມ­ບັດ​ສິນທຳ​ປະ­ຕິ­ວັດ… ໃນ​ຂໍ້​ນີ້​ຜູ້​ທີ່​ຈະ​ເຂົ້າ​ເປັນ​ລັດ­ຖະ­ກອນ ຫຼື ໄດ້​ເປັນ​ລັດ­ຖະ­ກອນ​ແລ້ວ​ຄວນ​ຈະ​ຕ້ອງ​ສຶກ​ສາໃຫ້​ເຂົ້າ­ໃຈ​ແຈ້ງ ແລ້ວ​ມີ​ຈິດ​ສຳ­ນຶກ​ໃນ​ການ​ເຮັດວຽກ​ເພື່ອ​ສ່ວນລວມ ເຮັດ​ວຽກ​ເພື່ອ​ປະ­ຕິ­ບັດ​ໃຫ້ຫຼ້ອນ​ໜ້າ­ທີ່ ເຊິ່ງ​ຕ້ອງ​ໄດ້​ຍົກ​ສູງ​ຕໍ່​ຄຳ​ເວົ້າ​ທີ່​ວ່າ: ຈັນ​ຍາ​ບັນ ແລະ ຄຸນ­ສົມ­ບັດ​ສິນ​ທຳປະ­ຕິ­ວັດ ເພາະຖ້າ​ພະ­ນັກ­ງານ​ຂາດ​ຄຸນ­ສົມ­ບັດ​ດັ່ງ­ກ່າວ ອາດ​ມີ​ຈິດໃຈ​ເຫັນ­ແກ່​ປະ­ໂຫຍດ​ສ່ວນ​ຕົນ ເພາະ­ວ່າລັດ​ຖະກອນຄື​ພະ­ນັກ­ງານ​ຂອງ​ລັດ ກິນ​ເງິນ­ເດືອນ​ຂອງລັດ ຕ້ອງ​ຊື່­ສັດ​ຕໍ່­ໜ້າ​ທີ່ ຖ້າ​ຝືນ​ກໍ່​ຖື​ວ່າ​ລະ­ເມີດ​ກົດໝາຍ​ລັດ­ຖະ­ກອນ.

ສະ­ຫຼຸບ​ໄດ້​ວ່າ: ພະ­ນັກ­ງານ-ລັດ­ຖະ­ກອນທັງເກົ່າ ແລະ ໃໝ່ ຫຼື ຜູ້​ທີ່​ກຳ­ລັງ​ຈະ​ເຂົ້າ​ເປັນ​ລັດ​ຖະກອນ ຕ້ອງ​ໄດ້​ຄຳ­ນຶງ​ເຖິງ​ກົດ­ໝາຍ ແລະ ຈັນ​ຍາບັນ​ຢູ່​ສະ­ເໝີ ເນື່ອງ​ຈາ​ກວ່າຕົນ​ກິນ​ເງິນ­ເດືອນຂອງ​ລັດ ຕ້ອງ​ໄດ້​ສະ­ໜອງ​ວຽກ​ໃຫ້​ລັດ ບໍ່​ຊັ້ນ​ກໍ່​ຈະຖືກ​ຕີລາ­ຄາ​ວ່າ​ເປັນ​ຜູ້​ລະ­ເມີດ​ກົດ­ໝາຍ ອາດ​ຖືກລົງ­ໂທດ​ຕາມ​ກໍ­ລະ­ນີ​ໜັກ ຫຼື ເບົາ.

ຂຽນໂດຍ : ດັ້ນ​ກີບ​ເມກ
ແຫລ່ງທີ່ມາ: ໜັງສືພິມວຽງຈັນໃໝ່