ວັນທີ 31 ກໍລະກົດ 2017 ນີ້ ທ່ານ ນາງ ປານີ ຢາທໍ່ຕູ້ ປະທານ ສະພາແຫ່ງຊາດ, ທ່ານ ສາຍສະໝອນ ຄົມທະວົງ ປະທານສະພາ ປະຊາຊົນແຂວງ ຫລວງພະບາງ ພ້ອມດ້ວຍຄະນະ ໄດ້ເຄື່ອນໄຫວລົງຢ້ຽມຢາມ ໂຄງການກໍ່ສ້າງເສັ້ນທາງລົດໄຟ ລາວ-ຈີນ ຢູ່​ເຂດກໍ່ສ້າງ ບ້ານພອນໄຊ ເມືອງຫລວງພະບາງ.

ການລົງຢ້ຽມຢາມຄັ້ງນີ້, ທ່ານ ຄອງສົງ ຜູ້ຮັບຜິດຊອບວຽກງານເຕັກນິກ ປະຈຳພາກສະໜາມ ບໍລິສັດເລກ 8 ສປ ຈີນ ໄດ້ລາຍງານສະພາບ ການຈັດຕັ້ງປະຕິບັດ ການເຈາະອຸມົງ ​ໃນບ້ານພອນໄຊ ຕໍ່ ປະທານສະພາ ໄດ້ຮັບຊາບ​ວ່າ: ອຸມົງດັ່ງກ່າວ ມີຄວາມຍາວ 3.487 ແມັດ ໄດ້ເລີ່ມການກໍ່ສ້າງ ນັບແຕ່ເດືອນເມສາ ປີ 2017 ເປັນຕົ້ນມາ ໂດຍເຈາະ 2 ເບື້ອງພ້ອມກັນ. ສຳລັບເບື້ອງທາງເຂົ້າ ເຂດບ້ານພອນໄຊ ສາມາດເຈາະເຂົ້າໄປໄດ້ 70 ແມັດ, ສ່ວນເບື້ອງທາງອອກ ເຂດບ້ານພິກໃຫຍ່ ເຈາະເຂົ້າໄດ້ 65 ແມັດ ພາຍຫລັງເຈາະແລ້ວ ແມ່ນໃຊ້ເບຕົງ ແລະ ຊີມັງອັດ​ແໜ້ນ ເພື່ອໃຫ້ມີຄວາມແຂງແກ່ນ, ບໍ່ໃຫ້ດິນຍຸບ ແລະ ປອດໄພໃນການກໍ່ສ້າງ, ການ​ຕີ​ລາຄາ​ເບື້ອງ​ຕົ້ນ​ພົບ​ວ່າ ອຸມົງ​ດັ່ງກ່າວ ຈະມີອາຍຸການນຳໃຊ້ໄດ້ປະມານ 100 ປີ ​ແລະ ​ໂຄງ​ກໍ່ສ້າງ​ທາງ​ລົດ​ໄຟ ຈະໃຫ້ສຳເລັດໃນ ເດືອນພຶດສະພາ ປີ 2020.

ໂອກາດນີ້ ທ່ານ ນາງ ປານີ ຢາທໍ່ຕູ້ ໄດ້ຢ້ຽມຢາມການກໍ່ສ້າງ ຂົວຂ້າມນ້ຳຂອງ ເຂດດັ່ງກ່າວ ພ້ອມທັງຮັບຟັງ ການລາຍງານການກໍ່ສ້າງ ຈາກຄະນະຮັບຜິດຊອບ ວຽກງານເຕັກນິກ ປະຈຳພາກສະໜາມ ບໍລິສັດເລກ 8 ສປ ຈີນ ຕື່ມອີກ.