ພະແນກສຶບສວນ-ສອບສວນ ປກສ ເມືອງໜໍ້ ແຂວງອຸດົມໄຊ ໄດ້ຕິດຕາມຈັບຕົວໄວລຸ້ນຈໍານວນ 5 ຄົນ ທີ່ກໍ່ເຫດເອົາກ້ອນຫີນ ແກວ່ງໃສ່ແວນລົດໃຫຍ່ທຽວທາງ ຢູ່ເສັ້ນທາງລະຫວ່າງເມືອງນາໝໍ້ຫາດ່ານພູຫຼັກຄໍາຊາຍແດນຈີນ ເຮັດໃຫ້ຜູ້ຂັບຂີ່ໄດ້ຮັບບາດເຈັບ 1 ຄົນ, ເຫດເກີດ ໃນວັນທີ 15 ກໍລະກົດ 2017 ທີ່ຜ່ານມາ.
ເຈົ້າໜ້າທີ ປກສ ເມືອງນາໝໍ້ ແຂວງອຸດົມໄຊ ໃຫ້ຮູ້ວ່າ: ພາຍຫຼັງໄດ້ ຮັບແຈ້ງຄວາມຈາກຜູ້ເສຍຫາຍຈໍານວນ 3 ຄົນວ່າ: ມີໄວລຸ້ນຈໍານວນໜຶ່ງທີ່ຍ່າງຕາມທາງ ໃຊ້ກ້ອນຫີນແກວ່ງໃສ່ແວນໜ້າລົດຈົນແຕກ ເຮັດໃຫ້ຜູ້ຂັບຂີ່ໄດ້ຮັບບາດເຈັບ 1 ຄົນ. ຜ່ານການລົງກວດກາລົດ ທີ່ຖືກເສຍຫາຍ ແລະ ສະຖານທີ່ເກີດເຫດເຫັນວ່າມີຄວາມຈິງ. ຈາກນັ້ນ, ຈຶ່ງໄດ້ຂຶ້ນເປົ້າໝາຍຕິດຕາມຈັບຕົວພວກກໍ່ເຫດ. ໃນມື້ຕໍ່ມາ, ເຈົ້າໜ້າທີ່ ກໍສາມາດຕິດຕາມຈັບຕົວພວກກໍ່ເຫດໄດ້ ຈໍານວນ 5 ຄົນ ຄື: ທ້າວ ບຸນຢືນ ອາຍຸ 19 ປີ, ທ້າວ ສົມ ອາຍຸ 18 ປີ, ທ້າວ ບຸນມີ ( ໂງກ ) ອາຍຸ 19 ປີ, ທ້າວ ບຸນມີ ອາຍຸ 18 ປີ, ທ້າວ ຄໍາ ອາຍຸ 18 ປີ ທັງ 5 ຄົນ ຢູ່ບ້ານນາໝໍ້ເໜືອ ເມືອງນາໝໍ້ ແຂວງອຸດົມໄຊ ເຊິ່ງປັດຈຸບັນເຈົ້າ ໜ້າທີ່ໄດ້ນຳຕົວພວກກ່ຽວໄປດຳເນີນຄະດີຕາມກົດໝາຍແລ້ວ.
ແຫລ່ງຂ່າວ: ໜັງສືພິມຄວາມສະຫງົບ