ສຳນັກຂ່າວເອເຈນຊີ ລາຍງານໃນວັນທີ 11 ກໍລະກົດນີ້ວ່າ ເກີດເຫດເຮືອບິນລຳລຽງທາງທະຫານ C-130 ຂອງກອງທັບເຮືອສະຫະລັດອາເມຣິກາ ຕົກລົງບໍລິເວນກາງໄຮ່ຖົ່ວເຫລືອງ ລັດມິສຊິສຊິບປີ ເມື່ອເວລາ 16:00 ໂມງ ຂອງມື້ວານນີ້ (10 ກໍລະກົດ) ຕາມເວລາໃນທ້ອງຖິ່ນ ໂດຍມີເຈົ້າໜ້າທີ່ທະຫານຢູ່ໃນເຮືອບິນລຳດັ່ງກ່າວ ລວມ 16 ຄົນ ຄາດວ່າເສຍຊີວິດຍົກລຳ.
ແຫລ່ງຂ່າວໄດ້ລະບຸວ່າ ເຮືອບິນລຳດັ່ງກ່າວໄດ້ເກີດລະເບີດຢູ່ກາງອາກາດ ກ່ອນທີ່ຈະຕົກລົງກະແທກໃສ່ພື້ນ, ປັດຈຸບັນເຈົ້າໜ້າທີ່ກູ້ໄພ ກຳລັງເລັ່ງຄົ້ນຫາສົບຜູ້ເສຍຊີວິດ ແຕ່ຕ້ອງໄດ້ໃຊ້ຄວາມລະມັດລະວັງເປັນພິເສດ ເນື່ອງຈາກມີລາຍງານວ່າ ເຮືອບິນລຳດັ່ງກ່າວມີລູກປືນສົງຄາມຢູ່ເຕັມລຳ.