ອີງຕາມຂ່າວຕ່າງປະເທດລາຍງານມື້ນີ້ ວັນທີ 7 ມິຖຸນາ 2017 ລາຍງານວ່າ ເຮືອບິນກອງທັບອາກາດມຽນມາ ພ້ອມຜູ້ໂດຍສານ 116 ຊີວິດ ປະສົບອຸບັດເຫດຕົກທະເລອັນດາມັນ ຍັງບໍ່ຮູ້ຊະຕາກຳ.
ໃນເວລາປະມານ 13:35 ຂອງມື້ນີ້ ເຮືອບິນຂອງກອງທັບອາກາດມຽນມາ ພ້ອມດ້ວຍຜູ້ໂດຍສານແລະຈຸບິນລວມ 116 ຄົນ ເຊິ່ງສ່ວນຫຼາຍແມ່ນທະຫານ ໄດ້ຫາຍໄປຈາກຫໍບັງຄັບການບິນແລະຈໍເຣດ້າຢ່າງກະທັນຫັນ ໃນເຂດພາກຕາເວັນຕົກຂອງລັດທະວາຍ ໃນຂະນະທີ່ເຈົ້າໜ້າທີ່ກອງທັບໄດ້ລະດົມກັນຄົ້ນຫາຢ່າງຮີບດ່ວນ.
ສື່ທ້ອງຖິ້ນມຽນມາລາຍງານວ່າ ເຮືອບິນທະຫານລຳນີ້ໄດ້ທະຍານຂຶ້ນຈາກ ເມືອງມະຣິດ ເຊິ່ງຢູ່ທາງຕາເວັນຕົກຂອງປະເທດ ຕິດກັບທະເລອັນດາມັນ ມຸ່ງໜ້າໄປຍັງນະຄອນຫຼວງຢາງກຸງ ແຕ່ວ່ານັກບິນໄດ້ຂາດການຕິດຕໍ່ກັບຫໍບັງຄັບການບິນຢ່າງກະທັນຫັນ ເມື່ອເວລາປະມານ 13:35 ຕາມເວລາໃນທ້ອງຖິ່ນ ໂດຍເຮືອບິນລຳດັ່ງກ່າວນັ້ນເປັນເຮືອບິນ ລຸ້ນ Shannxi Y-8 ຜະລິດຢູ່ປະເທດຈີນ.
ແນວໃດກໍຕາມ, ມາຮອດຕອນແລງນີ້ ຍັງບໍ່ມີລາຍງານວ່າໄດ້ພົບເຫັນເຮືອບິນລຳດັ່ງກ່າວແຕ່ຢ່າງໃດ ແລະຄາດວ່າມີຄວາມເປັນໄປໄດ້ສູງເຮືອບິນລຳດັ່ງກ່າວອາດຈະຕົກລົງທະເລອັນດາມັນ.
