ຊີວິດໃນຊ່ວງໄລຍະຢູ່ທີ່ມະຫາວິທະຍາໄລ ຖືວ່າເປັນໄລຍະທີ່ຕ້ອງໃຊ້ຈ່າຍສູງຫຼາຍທີ່ສຸດສຳລັບຄົນທີ່ເປັນພໍ່ແມ່ ບໍ່ວ່າຈະເປັນຄ່າຮຽນ, ຄ່າທີ່ພັກ, ຄ່າກິນ, ຄ່າເອກະສານ ແລະ ຄ່າໃຊ້ຈ່າຍຕ່າງໆຫຼາຍຢ່າງ ດັ່ງນັ້ນ ເພື່ອແບ່ງເບົາພາລະຂອງພໍ່ແມ່ທີ່ຕ້ອງແບກຫາບໄວ້ ຜູ້ເປັນລູກເອງກໍ່ຕ້ອງຄິດຫາວິທີທາງປະຢັດ ໃນຄໍລຳ ສາລະໜ້າຮູ້ ກັບ ລາວໂພສຕ໌ ມື້ນີ້ ແອັດມິນເລີຍມີ ເຄັດລັບດີໆໃນການປະຢັດຄ່າໃຊ້ຈ່າຍໃນເວລາຮຽນມາຝາກເຊິ່ງຈະມີວິທີໃດແນ່ນັ້ນເຮົາມາອ່ານພ້ອມກັນເລີຍ

1. ທີ່ພັກເວລາຮຽນ

ສຳລັບຄົນທີ່ໄດ້ນອນຢູ່ຫໍພັກໂຮງຮຽນກໍ່ໃຄແນ່ເພາະຄ່າຫໍພັກບໍ່ແພງປານໃດ ແຕ່ສຳລັບຄົນທີ່ພັກທາງນອກຕ້ອງໄດ້ຫາໝູ່ມາແຊຄ່າຫ້ອງນຳ ເພາະນອກຈາກຈະປະຢັດຄ່າໃຊ້ຈ່າຍເລື່ອງຄ່າຫ້ອງລົງໄປໄດ້ແລ້ວຍັງມີຄວາມປອດໄພເພີ່ມຂຶ້ນອີກດ້ວຍ

2. ພາຫະນະ

ຫາກທີ່ພັກໃກ້ກັບໂຮງຮຽນກໍ່ຄວນເລືອກທີ່ຈະຍ່າງໄປ ຫຼື ຂີ່ລົດຖີບໄປດີກວ່າ ນອກຈາກປະຢັດຄ່າໃຊ້ຈ່າຍເລື່ອງນ້ຳມັນລົດແລ້ວ ຍັງໄດ້ອອກກຳລັງກາຍໄປໃນຕົວພ້ອມ

3. ປ່ຽນພຶດຕິກຳການກິນ ຫຼິ້ນ

ອີກໜຶ່ງຄ່າໃຊ້ຈ່າຍທີ່ສິ້ນເປືອງຫຼາຍນັ້ນກໍ່ຄືການກິນຫຼິ້ນຊຸມແຊວ ຫຼື ຊື້ແຕ່ຂອງກິນສຸກມາກິນ ຫຼື ໄປກິນເຂົ້າແຕ່ໃນຮ້ານອາຫານ ລອງຫັນປ່ຽນພຶດຕິກຳໃໝ່ອົດໃຈງົດການໄປຫຼິ້ນກິນຟຸມເຟືອງລົງ ແລະ ຫັນມາແຕ່ງກິນເອງລອງເບິ່ງຮັບຮອງວ່າປະຢັດຄ່າໃຊ້ຈ່າຍໄດ້ຫຼາຍສ່ວນແນ່ນອນ

4. ວຽກນອກໂມງຮຽນ

ຫຼັງຈາກເລີກຮຽນນອກຈາກຄົ້ນຄ້ວາບົດຮຽນ, ຫຼິ້ນກິລາແລ້ວ ເຫຼືອນັ້ນກໍ່ຄືວ່າງ ຄວນຫາວຽກເສີມເຮັດໄປພ້ອມແມ່ນເປັນສິ່ງທີ່ດີ ເພາະນອກຈາກຈະໄດ້ເງິນແລ້ວ ຍັງເຮັດໃຫ້ຕົນເອງໄດ້ຮຽນຮູ້ປະສົບການໃໝ່ນອກຫ້ອງຮຽນອີກຕ່າງຫາກ ທີ່ສຳຄັນຍັງໄດ້ຮູ້ຈັກກັບຄົນຫຼາກຫຼາຍຊັ້ນຄົນ ຫຼາກຫຼາຍໜ້າທີ່ຕຳແໜ່ງ ເຊິ່ງມັນອາດເອື້ອຜົນປະໂຫຍດໃຫ້ກັບຕົນເອງໃນເວລາຮຽນຈົບ ຊອກວຽກເຮັດອາດງ່າຍຂຶ້ນນັ້ນເອງ.

5. ການດຳລົງຊີວິດ

ຢ່າລືມວ່າຕົນເອງກຳລັງເປັນນັກສຶກສາ ດັ່ງນັ້ນບໍ່ຈຳເປັນທີ່ຕ້ອງໃຊ້ຈ່າຍເງິນສິ້ນເປືອງໄປກັບກະແສແຟຊັ່ນ ເຊັ່ນ: ເສື້ອຜ້າ, ໂທລະສັບ, ກະເປົາ, ໂມງ, ລົດ ຫຼື ອື່ນໆ ເພາະມັນຈະເປັນການຜານເງິນພໍ່ແມ່ໄປໂດຍເກີນເຫດ

ທີ່ແອັດກ່າວມາທັງໝົດ 5 ຂໍ້ນີ້ກໍ່ເປັນພຽງທິດສະດີໜຶ່ງເທົ່ານັ້ນ ສ່ວນຈະປະຕິບັດຕາມ ຫຼື ບໍ່ນັ້ນມັນຂຶ້ນຢູ່ກັບຕົວທ່ານເອງ ສຳລັບຄົນທີ່ເກີດຢູ່ໃນຄອບຄົວທີ່ມີເງິນໃນຖານະຮັ່ງມີເປັນເສດຖີ ເລື່ອງການໃຊ້ຈ່າຍນັ້ນອາດບໍ່ເປັນບັນຫາສຳລັບພວກເຂົາ ແຕ່ສຳລັບຄົນຊ່ຳເຮົາເຈົ້າຂ້ອຍຖານະທຳມະດາເຖິງຂັ້ນຍາກຈົນນີ້ກໍ່ຄວນຄິດທົບທວນໃຫ້ຫຼາຍໃນການໃຊ້ຈ່າຍ.