ຈາກກໍລະນີເກີດເຫດຍີງກັນຢູ່ທີ່ ບ້ານດອນໄຊ ເມືອງໄຊ ແຂວງອຸດົມໄຊ ໃນຕອນແລງ ຂອງວັນທີ 4 ເດືອນ ພຶດສະພາ 2017 ໄດ້ເກີດມີເຫດຍິງກັນຢູ່ທາງຂຶ້ນໄປພະແນກໄປສະນີ ໂທລະຄົມມະນາຄົມ ແລະ ການສື່ສານ ບ້ານດອນໄຊ ເຮັດໃຫ້ມີບາດເຈັບສາຫັດ 1 ຄົນ ແລະໄດ້ເສຍຊີວິດໃນເວລາຕໍ່ມາ ເຊິ່ງເສຍຊີວິດເປັນນາຍຕຳຫຼວດຊັ້ນພັນຕີ.
ຕົກມາມື້ນີ້, ວັນທີ 5 ພຶດສະພາ 2017 ເວລາປະມານ 10 ໂມງເຊົ້າ ເຈົ້າໜ້າທີ່ຕຳຫຼວດໄດ້ທຳການຈັບກຸມຄຸມໂຕ ຜູ້ຕ້ອງສົງໄສໄດ້ແລ້ວ ຜູ້ກ່ຽວ ຊື່ ທ້າວ ຄຳຫຼ້າ ອາຍຸ 42 ປີ ຢູ່ບ້ານໜອງແລງ ເມືອງໄຊ ແຂວງອຸດົມໄຊ.
ເຈົ້າໜ້າທີ່ຊຸດຈັບກຸມໄດ້ກ່າວວ່າ ທ້າວ ຄຳຫຼ້າ ແມ່ນຜູ້ຕ້ອງສົງໄສອັນດັບ 1 ທີ່ກ່ຽວຂ້ອງກັບການຄາຕະກຳເຈົ້າໜ້າທີ່ດັ່ງກ່າວຂ້າງເທິງ ແລະຄາດຄະເນເບື້ອງຕົ້ນວ່າ ອາດຈະຂັດແຍ້ງຜົນປະໂຫຍດສ່ວນຕົວກໍໄດ້ ເນື່ອງຈາກທັງສອງເປັນພີ່ນ້ອງກັນ ພ້ອມກັນນີ້ຜູ້ຕ້ອງສົງໄສກໍມີປະຫວັດເສບຢາເສບຕິດເປັນປະຈຳ.
ແນວໃດກໍດີຄະດີຍັງຢູ່ໃນຂັ້ນຕອນສືບສວນ-ສອບສວນຈາກທາງເຈົ້າໜ້າທີ່ ເຊິ່ງຜົນຈະອອກມາຈັ່ງໃດ ຫຼືຜູ້ກ່ຽວລົງມືກໍ່ເຫດດ້ວຍເຫດຜົນໃດ ເຮົາຈະລາຍງາານສູ່ທ່ານຜູ້ອ່ານຕື່ມອີກທັນທີ ທີ່ເຮົາໄດ້ຮັບຂ່າວ.