ເມື່ອວັນທີ 15 ເມສາ 2017 ທີ່ຜ່ານມາ ສະຖານເອກອັກຄະລັດຖະທູດລາວປະຈຳ ນະຄອນຫຼວງເຊອູນ ປະເທດ ສາທາລະນະລັດເກົາຫຼີ ໄດ້ອອກແຈ້ງການເຖິງ ສະມາຄົມນັກສຶກສາລາວແລະປະຊາຊົນລາວທີ່ອາໄສຢູ່ ສ. ເກົາຫຼີ ເລື່ອງ: ສະຖານະການຄວາມເຄັ່ງຕຶງໃນແຫຼມເກົາຫຼີ.
ເນື້ອໃນແຈ້ງການລະບຸວ່າ ສະຖານເອກອັກຄະລັດຖະທູດລາວ ທີ່ເຊອູນ ຂໍຖືເປັນກຽດແຈ້ງມາຍັງ ສະມາຄົມນັກສຶກສາລາວ ແລະປະຊາຊົນລາວທີ່ອາໄສຢູ່ ສ.ເກົາຫຼີ ຊາບວ່າ: ອີງຕາມສະຖານະການຄວາມເຄັ່ງຕຶງໃນແຫຼມເກົາຫຼີໃນປັດຈຸບັນ, ສະຖານທູດໄດ້ຕິດຕາມສະຖານະການຢ່າງໃກ້ຊິດ ແລະປະສານສົມທົບກັບເຈົ້າໜ້າທີ່ຂອງ ສ.ເກົາຫຼີ ກ່ຽວກັບຄວາມເປັນໄປໄດ້ໃນການເກີດສົງຄາມຢູ່ແຫຼມເກົາຫຼີນັ້ນ, ຕາມທັດສະນະຂອງເຈົ້າໜ້າທີ່ແລະບັນດານັກການເມືອງຂອງ ສ.ເກົາຫຼີ ໄດ້ຕີລາຄາວ່າ ຄວາມເປັນໄປໄດ້ໃນການເກີດສົງຄາມໃນພາກພື້ນແຫຼມເກົາຫຼີແມ່ນມີໜ້ອຍທີ່ສຸດ.
ດັ່ງນັ້ນ, ສະຖານທູດຈຶ່ງຮຽກຮ້ອງມາຍັງນັກສຶກສາ ແລະປະຊາຊົນລາວທຸກຄົນ ທີ່ຢູ່ ສ.ເກົາຫຼີ ໃຫ້ພາກັນອຸ່ນອຽນທຸ່ນທ່ຽງ, ມີສະຕິ, ບໍ່ໃຫ້ແຕກຕື່ນຈົນເກີນໄປ ແລະຕັ້ງໃຈປະຕິບັດໜ້າທີ່ຂອງຕົນເປັນປົກກະຕິ. ເຖິງຢ່າງໃດກໍຕາມ ຖ້າຫາກມີເຫດການຫຍັງທີ່ບໍ່ຄາດຄິດເກີດຂຶ້ນ ສະຖານທູດຈະແຈ້ງໃຫ້ທຸກຄົນຊາບໃນເວລາອັນຮີບດ່ວນ, ພ້ອມກັນນີ້ກໍໃຫ້ພາກັນຕິດຕາມສະຖານະການ ກ່ຽວກັບບັນຫາດັ່ງກ່າວຢ່າງໃກ້ຊິດ ແລະຢ່າງມີສະຕິ ເພາະມີບາງແຫຼ່ງຂ່າວອາດຈະນຳສະເໜີຂ່າວທີ່ມີລັກສະນະເກີນຄວາມເປັນຈິງ ເພື່ອຮຽກຮ້ອງຄວາມສົນໃຈຈາກຜູ້ອ່ານ.
