ສຳນັກຂ່າວເອເອຟພີ ແລະຣອຍເຕີ ລາຍງານເມື່ອວັນທີ 16 ເມສາ 2017 ຜ່ານມາວ່າ ປະຊາຊົນຊາວຕວກກີ ໄດ້ພາກັນອອກໄປລົງປະຊາມະຕິວ່າ ຈະເຫັນດີ ກັບການປ່ຽນແປງລັດຖະທຳມະນູນ ເປັນລະບອບປະທານາທິບໍດີ ຫຼືບໍ່,​ເຊິ່ງການປ່ຽນແປງດັ່ງກ່າວ ຈະເປັນການເພີ່ມອຳນາດໃນການບໍລິຫານປະເທດໃຫ້ແກ່ປະທານາທິບໍດີ ເຣເຈພ ເທຢິບ ແອຣ໌ໂດອານ ແຫ່ງຕວກກີ ແທນທີ່ອຳນາດການບໍລິຫານຈະຂອງສະມາຊິກສະພາຜູ້ແທນ

ທັງນີ້ມີປະຊາຊົນຕຸວກກີ ທີ່ມີສິດລົງປະຊາມະຕິມີປະມານ 55.3 ລ້ານກວ່າຄົນ ຖ້າວ່າປະຊາຊົນມີມະຕິສະໜັບສະໜູນກໍຈະເປັນການເປີດທາງໃຫ້ທ່ານ ແອຣ໌ໂດອານ ມີອຳນາດຫຼາຍກວ່າຜູ້ນຳຄົນອື່ນໆ ຂອງຕວກກີຜ່ານມາ ແລະຈະເຮັດໃຫ້ທ່ານ ແອຣ໌ໂດອານ ເປັນຜູ້ນຳຕວກກີໄປຈົນຮອດປີ 2029

ຜົນການສຳຫຼວດກ່ອນໜ້ານີ້ພົບວ່າ ມີຜູ້ລົງຄະແນນຕອບຮັບຫຼາຍກວ່າຜູ້ປະຕິເສດ ແຕ່ກໍມີຄະແນນນຳພຽງເລັກນ້ອຍເທົ່ານັ້ນ