ຫຼັງຈາກການສຶກສາວິໄຈຕໍ່ເນື່ອງເປັນເວລາ 20 ປີ ທີມນັກວິທະຍາສາດໄດ້ຄົ້ນພົບທະວີບໃໝ່ ທີ່ຈົມຢູ່ໃຕ້ເກາະນິວຊີແລນມາດົນນານຫຼາຍຮ້ອຍລ້ານປີ ພວກເຂົາໄດ້ຕັ້ງຊື່ທະວີບນີ້ວ່າ ຊີແລນເດຍ (Zealandia) ແລະຫວັງວ່າມັນຈະຖືກບັນຈຸເປັນທະວີບທີ 8 ໃນອະນາຄົດ
ຜົນການສຶກສາໃໝ່ນີ້ ຖືກພິມລົງໃນວາລະສານ The Geological Society of America ເຊິ່ງທະວີບລຶກລັບດັ່ງກ່າວຖືກເຊື່ອງຕົວໄວ້ໃນບໍລິເວນຕາເວັນຕົກສ່ຽງໃຕ້ຂອງມະຫາສະໝຸດປາຊີຟິກ ເຊິ່ງຍາວຕັ້ງແຕ່ເກາະ New Caledonia ໄປຈົນເກາະເໜືອ ແລະເກາະຂອງປະເທດນິວຊີແລນ
ພື້ນທີ່ 94% ຂອງທະວີບຊີແລນເດຍ ຂະໜາດ 1.9 ລ້ານຕາລາງໄມ ຖືກຈົມຢູ່ໃຕ້ນໍ້າທະເລ ຂະໜາດຂອງທະວີບດັ່ງກ່າວທີ່ຈົມຢູ່ໃຕ້ນໍ້າມີຂະໜາດກວ້າງໃຫ່ທຽບເທົ່າກັບ 2 ໃນ 3 ຂອງທະວີບອອສເຕຣເລຍ ເຊິ່ງນັ້ນໝາຍຄວາມວ່າ ນິວຊີແລນ ແລະເກາະ New Caledonia ເປັນສ່ວນຍອດຂອງທະວີບທີ່ພົ້ນນໍ້າຂຶ້ນມາ ທີ່ວັດຕາມຫຼັກພູມສາດ
ທາງດ້ານນັກວິທະຍາສາດບອກວ່າ ທະວີບແຫ່ງນີ້ມີເກນເໝາະສົມຖືກຈັດເປັນອັນດັບທີ 8 ທຸກປະການເຊັ່ນ ລະດັບຄວາມສູງ ເມື່ອທຽບກັບພື້ນທີ່, ຄວາມຫຼາກຫຼາຍທາງທໍລະນີວິທະຍາ ໄປຈົນເຖິງເປືອກຂອງງທະວີບທີ່ໜາກວ່າພື້ນຂອງມະຫາສະໝຸດ, ການຄົ້ນພົບດັ່ງກ່າວ ບໍ່ໄດ້ເກີດຂຶ້ນຈາກຄວາມບັງເອີນ ແຕ່ເກີດຈາກການສຶກສາທີ່ຍາວນານກວ່າ 20 ປີ ທີ່ເຊື່ອວ່າເກາະທີ່ແຍກຕົວໂດດດ່ຽວນິວຊີແລນນີ້ ອາດມີຜືນແຜ່ນດິນເປັນຂອງຕົນເອງ